Mwakoro 67
Kaotioti ae kaotaki rinanon Iotebwa Timiti te Burabeti, i Hiram, Ohio, n moan Nobembwa 1831. Te tai anne bon te maungatabu ae e onoti, ao boretiakin taian kaotioti ake a kaman karekeaki mai iroun te Uea rinanon te Burabeti a rinanoaki man karaoaki nanoia (taraa te kabwarabwara n mwakoro 1). William W. Phelps e a tibwa tia ni katea ana tabo ni boreti te Ekaretia i Independence, Missouri. Te maungatabu e baireia bwa e na boretiaki taian kaotioti n te Book of Commandments (Boki n Tua) ao a na boretiaki 10,000 katoto (are e kakerikakaki i mwina nakon 3,000 katoto ibukin kaangaanga aika aki kantaningaki). A mwaiti taari aika a kaota aia koaua ae nene bwa taian kaotioti ake a ikotaki ibukin boretiakia a bon rangi ni koaua, n aron are kaotaki koauana iroun te Tamnei ae Raoiroi nakoia. E koreaki n rongorongon Iotebwa Timiti bwa i mwin karekean te kaotioti are e ataaki bwa mwakoro 1, iai tabeua maroro aika reke ni kaineti ma te taetae are e kamanenaaki n taian kaotioti. E rimwiiaki n te kaotioti aei.
1–3, E ongo aia tataro te Uea ao e tararuaia Ana unimwaane; 4–9, E kaewenakoa te aomata ae te kabanea ni wanawana bwa e na karaoa aekan Ana kaotioti ae te kabanea ni karako; 10–14, Unimwaane aika kakaonimaki a na kamaiuaki iroun te Tamnei ao n noora ubun te Atua.
1 Nooria ao ongora, O ngkami unimwaanen au ekaretia, ake kam a tia ni ikotingkami ni kabane, are I a tia n ongo ami tataro, are nanomi ae I ataia, ao are e tangiria nanomi e a tia n roko imatau.
2 Nooria ao taraia, a mena matau i aomi, ao karawa ma aonaba a mena i nanon baiu, ao taian kaubwai ake akea tokiia bon au bwai n anga.
3 Kam keiaki ni kakoaua bwa kam na riai ni karekea te kakabwaia are kam na anganaki; ma nooria, e koaua ae I tuangkami bwa iai te maaku inanomi, ao e koaua bwa aio bukin ae kam aki karekea.
4 Ao ngkai Ngai, te Uea, I anganingkami kakoauaan koauan tua ake a wene i matami.
5 Matami a mena i aon au tia mwakuri ae Iotebwa Timiti te Ataei, ao ana taetae ae kam ataia, ao kabwakana ae kam ataia; ao kam ukoukora te atatai i nanomi bwa kam aonga ni kabwarabwaraa raoi riaon ana taetae; aio kam bon ataia naba.
6 Ngkai, kakaea te rongorongo man te Boki n Tua, are te kabane ni karako mai buakona, ao rinea temanna ae te kabanea ni wanawana i buakomi;
7 Ke, ngkana iai i buakomi ae kona ni karaoa teuana n aekakina, ngkanne kam kona n taekinna bwa kam aki ataia bwa a bon koaua;
8 Ma ngkana kam aki kona ni karaoa teuana n aekakina, kam mena i aan te kabuakakaaki ngkana kam aki kakoaua bwa a bon koaua.
9 Bwa kam ataia bwa akea ae aki raoiroi iai, ao ane e raoiroi e roko mai eta, mai iroun Taman taian oota.
10 Ao e koaua ae I a manga tuangkami bwa aio tibwangami, ao te berita I anganingkami bwa kam a tia ni katabuaki nakon te mwakuri ni ibuobuoki aei, bwa ngkana kam teimatoa ni kaaki mai iroumi te bakantang ao te maaku, ao ni kananorinanoingkami i matau, bwa e aki tau ami nanorinano, e na raeuakaki te roki ao kam na noorai ao n ataia bwa boni Ngai—tiaki man te aro n aomata ke te iango n rabwata, ma man te tamnei.
11 Bwa akea te aomata ae e a tia n noora te Atua n te tai teuana n te rabwata, ma tii ngkana e kamaiuaki iroun Tamnein te Atua.
12 Akea naba n te aro n aomata ae kona ni maiu i matan te Atua, ke n te iango n rabwata.
13 Kam aki kona ni maiu i matan te Atua ngkai, ke aia mwakuri ni ibuobuoki anera; mangaia are, reitinako n te taotaonakin nano ni karokoa kam a kororaoi.
14 E riai n aki tanrikaaki ami iango; ao ngkana kam a tau, n oin au tai, kam na nooria ao n ataia bwa anne ae kam anganaki ni bain au tia mwakuri ae Iotebwa Timiti te Ataei. Amen.