Vaega 70
Faaaliga na tuuina mai e ala mai ia Iosefa Samita le Perofeta, i Hairama, Ohaio, i le aso 12 o Novema, 1831. Ua ta’u mai i le talafaasolopito a le Perofeta e i ai ni konafesi faapitoa e fa na fai mai i le aso 1 sei oo i le aso 12 o Novema, atoa. I le faaiuga o nei faatasiga, na iloilo ai le tāua tele o faaaliga ia o le a faasalalauina mulimuli ane o le Tusi o Poloaiga ma avea ma Mataupu Faavae ma Feagaiga. O le faaaliga lenei na tuuina mai i le mae’a ai ona palotaina i le konafesi faapea o faaaliga ua “taua i le Ekalesia nai lo oa o le Lalolagi atoa.” Ua faasino i ai e le talafaasolopito a Iosefa Samita ia faaaliga “o le faavae o le Ekalesia i aso nei e gata ai, ma o se faamanuiaga i le lalolagi, ua faailoa mai ai o ki o mealilo o le malo o lo tatou Faaola ua toe faatuatuaina mai i tagata.”
1–5, Ua tofia tausimea e lomia faaaliga; 6–13, O i latou o e e galulue i mea faaleagaga ua agavaa mo o latou totogi; 14–18, E tatau ona tutusa le Au Paia i mea faaletino.
1 Faauta, ma faalogo mai, E outou e ua aumau i Siona, ma outou uma o tagata o la’u ekalesia o e ua mamao ese atu, ma faalogo mai i le afioga a le Alii lea Ou te tuu atu i la’u auauna o Iosefa Samita, Le Itiiti, ma i la’u auauna foi o Matini Harisi, ma i la’u auauna foi o Oliva Kaotui, ma i la’u auauna foi o Ioane Uitimera, ma i la’u auauna foi o Sini Rikitone, ma i la’u auauna foi o Viliamu V. Phelps, e ala atu i se poloaiga ia te i latou.
2 Aua Ou te tuu atu ia te i latou se poloaiga; o le mea lea ia faalogo mai ma lagona, aua ua faapea ona fetalai mai o le Alii ia te i latou—
3 O A’u, o le Alii, na tofia i latou, ma faauu i latou e avea ma tausimea o faaaliga ma poloaiga ua Ou tuu atu ia te i latou, ma ia o le a Ou tuu atu ia te i latou i taimi o mulimuli mai;
4 Ma o le a Ou manaomia mai ia te i latou se tala o lenei mea-tausi i le aso o le faamasinoga.
5 O le mea lea, ua Ou tofia i latou, ma o la latou valaauga lenei i le ekalesia a le Atua, e pulea ia faaaliga ma poloaiga ma mea e tau i ai, ioe, o manuia mai ai.
6 O le mea lea, Ou te tuu atu se poloaiga ia te i latou, ia latou lē tuuina atu nei mea i le ekalesia, pe i le lalolagi;
7 Ae ui i lea, e tusa ai ma lo latou mauaina o ni mea e sili atu i mea e manaomia mo mea e tatau ai mo i latou ma o latou manaoga, ia tuu atu i lo’u faleteuoloa;
8 Ma o ia manuia ia faapaiaina mo e e nonofo i Siona, ma mo a latou tupulaga, e tusa ai ma le avea o i latou ma suli e tusa ai ma tulafono o le malo o le Atua.
9 Faauta, o le mea lenei e manaomia e le Alii mai tagata taitoatasi o ia o se tausimea, e pei ona uma ona tofia ai pe o le a tofia ai e A’u lava, o le Alii, i soo se tagata, pe o le a tofia i ai.
10 Ma faauta, e leai se tasi o e auai i le ekalesia a le Atua soifua e tuusaoloto mai i lenei tulafono;
11 Ioe, po o le epikopo, po o le sui o lē e tausia le faleteuoloa o le Alii, po o ia o lē ua tofia o se tausimea faaletino.
12 O ia o lē ua tofia e faatautaia mea faaleagaga, o ia lava lea ua agavaa mo lona totogi, e pei lava o i latou o e e tofia o ni tausimea efaatautaia mea faaletino;
13 Ioe, e sili atu lava ona tele, o lea tele e faatele atu ia te i latou e ala i faaaliga a le Agaga.
14 Ae ui i lea, ia outou tutusa ia outou mea faaletino, ma o lenei mea ia faia ma le lē lototoa’i, a lē o lea o le a taofia le tele o faaaliga a le Agaga.
15 O lenei, Ou te tuu atu lenei poloaiga i a’u auauna mo lo latou lelei a’o latou soifua, mo se faaaliga o a’u faamanuiaga i luga o o latou ulu, ma mo se taui o lo latou filiga ma mo lo latou saogalemu;
16 Mo meaai ma mo lavalava; mo se tofi; mo fale ma mo fanua, i soo se tulaga lava e tuu i ai i latou e A’u, o le Alii, ma soo se mea lava e auina atu i ai i latou e A’u, o le Alii.
17 Aua sa latou faamaoni i mea e tele, ma lelei ona latou faia e tusa ai ma lo latou lē agasala.
18 Faauta, o A’u, o le Alii, Ou te alofa mutimutivale ma o le a Ou faamanuia ia te i latou, ma o le a latou ulu atu i le olioli o ia mea. E faapea lava. Amene.