Vaega 71
Faaaliga na tuuina mai ia Iosefa Samita le Perofeta ma Sini Rikitone, i Hairama, Ohaio, i le aso 1 o Tesema, 1831. Sa faaauau pea ona faaliliu e le Perofeta le Tusi Paia faatasi ma Sini Rikitone o lana failautusi seia oo ina maua mai le faaaliga lenei, ma faataatia ese ai i le taimi lea mo sina taimi le faaliliuga o le Tusi Paia ina ia mafai e i la’ua ona faataunuu o le faatonuga na tuuina mai i le faaaliga lenei. Sa poloaiina le au uso ia o atu e talai atu ina ia faamalūlūina lagona ita na tutupu mai e faasaga i le Ekalesia ona o le faasalalauga o tusi na tusia e Ezra Booth, o lē na liliuese.
1–4, Ua auina atu Iosefa Samita ma Sini Rikitone e folafola atu le talalelei; 5–11, O le a faafememeaiina fili o le Au Paia.
1 Faauta, ua faapea ona fetalai mai o le Alii ia te oulua, a’u auauna, o Iosefa Samita, Le Itiiti, ma Sini Rikitone, ua oo moni mai lava le taimi ua tatau ma ao ai ia te a’u ona tatala atu o oulua fofoga i le folafolaina atu o la’u talalelei, o mea o le malo, ma faamalamalama atu ona mealilo mai totonu o tusitusiga paia, e tusa ai ma lena vaega o le Agaga ma le mana o le a tuu atu ia te oulua, e pei lava ona Ou loto i ai.
2 E moni Ou te fai atu ia te oulua, folafola atu i le lalolagi i nofoaga o faataamilo ai, ma i le ekalesia foi, mo le va o se vaitau, seia oo ina faailoa atu ia te oulua.
3 E moni o se misiona lenei mo se vaitau, lea ua Ou tuu atu ia te oulua.
4 O le mea lea, ia oulua galulue i lo’u tovine. Valaau atu i e o nonofo i le lalolagi, ma molimau atu, ma saunia le ala mo poloaiga ma faaaliga o le a oo mai.
5 O lenei, faauta o le poto lenei; ai se e faitau, ia tuu atu ia te ia ia malamalama i ai ma taliaina foi;
6 Aua o ia o lē e taliaina o le a tuu tele atu i ai, le mana lava.
7 O le mea lea, faafememeai o oulua fili; valaau atu ia te i latou ia latou feiloa’i ma oulua i nofoaga faitele po o nofoaga patino; ma e tusa ai ma lo oulua faamaoni, o le a faaalia lo latou maasiasi.
8 O le mea lea, tuu atu ia te i latou e aumai o latou manatu malolosi e faasaga i le Alii.
9 E moni, ua faapea ona fetalai mai o le Alii ia te oulua—e leai se ’auupega ua faia e faasaga ia te oulua e manumalo;
10 Ma afai e i ai soo se tagata e siitia a’e lona leo e faasaga mai ia te oulua o le a faafememeaiina o ia i lo’u lava taimi e tatau ai.
11 O le mea lea, ia tausi i a’u poloaiga; ua moni ma faamaoni i latou. Ua faapea lava. Amene.