Benneg 71
Paltiing a naited kada Joseph Smith a Propeta ken Sidney Rigdon, iti Hiram, Ohio, idi 1 ti Disiembre, 1831 (History of the Church, 1:238–239). Intuloy ti Propeta nga impatarus ti Biblia a ni Sidney Rigdon ti para suratna agingga a naawat daytoy a paltiing, a naisanud pay laeng iti dayta a panawen tapno maikkanda iti gundaway a mangtungpal iti panangiwanwan a naited ditoy. Mapan dagiti kakabsat a mangasaba tapno maalep-epda ti sumagibar a rikna a rimmaba a maisuppiat iti Simbaan a bunga ti pannakaipablaak ti sumagmamano a warnakan kadagiti sinurat ni Ezra Booth, a kimmalilis.
1–4, Naibaon da Joseph Smith ken Sidney Rigdon a mangipakdaar iti ebanghelio; 5–11, Mapagulimek dagiti kabusor dagiti Santo.
1 Adtoy, kastoy ti kinuna ti Apo kadakayo a katulongak a Joseph Smith, Jun., ken Sidney Rigdon, a panawenen a pudno a kasapulan ken nasken kaniak a rumbeng nga ungapenyo dagiti ngiwatyo a mangipakdaar iti ebanghelio, kadagiti banag iti pagarian, a mangilawlawag kadagiti datdatlag a nagtaud kadagiti nasantuan a kasuratan, a maibatay iti dayta bingay ti Espiritu ken bileg a maitedto kadakayo, a kas iti pagayatak.
2 Pudno kunak kadakayo, ipakdaaryo iti lubong iti amin a lugar iti aglawlaw, kasta met iti simbaan, iti uneg ti maysa a panawen, agingga a maibaga kadakayo.
3 Pudno a daytoy ti mision iti panawen, nga intedko kadakayo.
4 Gapuna, agtrabahokayo iti bangkagko. Awaganyo dagiti agindeg iti daga, ket isuratyo, ken saganaanyo ti idadateng dagiti bilin ken paltiing.
5 Ita, adtoy nainsiriban daytoy; asino man a makabasa, nasken a maawatanna ken awatenna met;
6 Ta isu nga umawat nalablabonto ti awatenna, a bileg.
7 Gapuna, tikawenyo dagiti kabusoryo; awaganyo ida a sumango kadakayo iti man tallaong wenno iti nalimed; ket no la ketdi napudnokayo maipakitanto ti pannakaibabainda.
8 Gapuna, paikuyogyo kadakuada ti napigsa a kalinteganda a maisuppiat iti Apo.
9 Pudno, kastoy ti kinuna ti Apo kadakayo—awan ti agballigi nga igam a naaramid a maibusor kadakayo;
10 Ket ti asino man a tao nga agtimek iti napigsa a maibusor kadakayo matikawto iti naituding a panawenko.
11 Gapuna, tungpalenyo dagiti bilinko; pudno ken napudnoda. Pudno a kasta. Amen.