Vaega 72
Faaaliga na tuuina mai e ala mai ia Iosefa Samita le Perofeta, i Katelani, Ohaio, i le aso 4 o Tesema, 1831. E toatele toeaina ma tagata o le Ekalesia sa potopoto e aoao o latou tiute ma faagaeetia atili i aoaoga a le Ekalesia. O lenei vaega o se tuufaatasiga lea o faaaliga e tolu na maua i le aso e tasi. O le fuaiupu 1 e oo i le 8 ua faailoa mai ai le valaauga o Newel K. Whitney o se epikopo. Ona valaaulia ma faauu ai lea o ia, ma ina ua uma lena, ona maua mai ai lea o mea ua tusia i le fuaiupu 9 e oo i le 23, ua tuu mai ai ni faamatalaga faaopoopo e faatatau i tiute o se epikopo. Mulimuli ane, na tuuina mai fuaiupu 24 e oo i le 26, o loo faapea ona tuuina mai ai faatonuga e faatatau i le faapotopotoina i Siona.
1–8, E tatau i toeaina ona tuu atu se tala o a latou mea-tausi i le epikopo; 9–15, O le epikopo e tausia le faleteuoloa ma tausi i e ua matitiva ma lē tagolima; 16–26, O epikopo e faamaonia le agavaa o toeaina.
1 Faalogo mai ia, ma lagona le siufofoga o le Alii, E, outou e o e ua faapotopoto faatasi outou lava, o e o faitaulaga sili o la’u ekalesia, o e ua tuuina atu i ai le malo ma le mana.
2 Aua e moni ua faapea ona fetalai mai o le Alii, ua tatau ia te a’u ona tofia se epikopo mo outou, pe mai ia te outou, mo le ekalesia i lenei vaega o le tovine o le Alii.
3 Ma e moni ua poto ona outou faia i lenei mea, ona ua faatulafonoina e le Alii, mai lima o tausimea taitoatasi, ia tuu atu se tala o lana mea-tausi, i le olaga nei ma i le faavavau.
4 Aua o ia o lē e faamaoni ma atamai i le olaga nei e faitau agavaa e mautofi i maota ua saunia mo ia e lo’u Tamā.
5 E moni Ou te fai atu ia te outou, ia tuu atu e toeaina o le ekalesia o loo i lenei vaega o lo’u tovine se tala o la latou mea-tausi i le epikopo, o lē o le a Ou tofia i le vaega lenei o lo’u tovine.
6 O nei mea ia tuu i talafaamaumau, e tuu atu i le epikopo i Siona.
7 Ma o le tiute o le epikopo o le a faailoa atu i poloaiga ua uma ona tuu atu ma le leo o le konafesi.
8 Ma o lenei, e moni Ou te fai atu ia te outou, o la’u auauna o Newel K. Whitney o le tagata lea ia tofia ma faauuina i lenei valaauga. O le finagalo lea o le Alii lo outou Atua, lo outou Togiola. Ia faapea lava. Amene.
9 O le afioga a le Alii, e faaopoopo i le tulafono ua uma ona tuuina atu, e faailoa atu ai le tiute o le epikopo o lē ua uma ona faauuina mo le aulotu i le vaega lenei o le tovine, o lenei moni lava—
10 Ia tausi le faleteuoloa o le Alii; taulimaina tupe a le ekalesia i le vaega lenei o le tovine;
11 Ia tusia se tala o toeaina e pei ona poloaiina muamua; ma faatautaia mea latou te mananao ai, o e ia latou totogi mo mea latou te maua, e tusa ai ma mea latou te maua e totogi ai;
12 Ina ia mafai foi ona faapaiaina o lenei mea mo le lelei o le ekalesia, mo e ua matitiva ma e ua lē tagolima.
13 Ma o ia o lē ua lē i ai se mea na te totogi ai, ia faia se tala ma tuulima atu i le epikopo o Siona, o lē o le a totogiina le aitalafu mai mea o le a tuu atu e le Alii i ona lima.
14 Ma o galuega a e faamaoni o e e galulue i mea faaleagaga, i le taulimaina o le talalelei ma mea o le malo mo le ekalesia, ma i le lalolagi, o le a totogi a’i le aitalafu i le epikopo i Siona;
15 O lea o le totogi o le aitalafu e sau mai le ekalesia, ona e tusa ma le tulafono, o tagata taitoatasi uma o e e o mai i Siona, e ao ina latou fofola atu mea uma i luma o le epikopo i Siona.
16 Ma o lenei, e moni Ou te fai atu ia te outou, aua e tatau i toeaina taitoatasi i lenei vaega o le tovine ona tuu atu se tala o lana mea-tausi i le epikopo i le vaega lenei o le tovine—
17 O se tusi faamaonia mai le faamasino po o le epikopo i le vaega lenei o le tovine, i le epikopo i Siona, e faia ia talia ai tagata taitoatasi, ma tali ai mea uma, mo se tofi, ma talia ai o ia o se tausimea poto ma se tagata faigaluega faamaoni;
18 A lē o lea o le a lē talia o ia e le epikopo o Siona.
19 Ma o lenei, e moni Ou te fai atu ia te outou, ia tuu atu i toeaina taitoatasi o e o le a tuu atu se tala i le epikopo o le aulotu i le vaega lenei o le tovine, ia faamaonia atu e le aulotu po o aulotu, o loo galue ai o ia, ina ia mafai ona ia faamaonia o ia lava ma ana tala i mea uma.
20 O lenei foi, ia tuu atu i a’u auauna o e ua tofia o ni tausimea i mea tau tusi o la’u ekalesia, ia latou maua le aiā mo se fesoasoani mai le epikopo po o epikopo, i mea uma—
21 Ina ia mafai ona lomia o faaaliga, ma o atu i tuluiga o le lalolagi; ina ia mafai foi ona latou maua o tupe o le a manuia ai le ekalesia i mea uma;
22 Ina ia mafai ai foi ona latou faamaonia i latou lava i mea uma, ma faitauina o ni tausimea popoto.
23 Ma o lenei, faauta, o le a avea lenei mea o se faataitaiga mo paranesi salalau uma o la’u ekalesia, i soo se laueleele lava o le a faatutuina ai i latou. Ma o lenei Ou te faaiu a’u upu. Amene.
24 O ni upu itiiti e faaopoopo i tulafono o le malo, e faatatau i tagata o le ekalesia—i latou ia e tofia i le Agaga Paia e o a’e i Siona, ma i latou o e ua maua le avanoa e o atu ai i Siona—
25 Ia tuu atu ia te i latou e o ma ave i le epikopo se tusi faamaonia mai ni toeaina se toatolu o le ekalesia, po o se tusi faamaonia mai le epikopo;
26 A lē o lea, o ia o lē e alu a’e i le laueleele o Siona o le a lē faitauina o se tausimea poto. O se faataitaiga foi lenei. Amene.