Mwakoro 75
Kaotioti ae kaotaki rinanon Iotebwa Timiti te Burabeti, i Amherst, Ohio, n Tianuare 25, 1832. Te mwakoro aei kanoana bon uoua kaotioti aika kaokoro (te moan i nanon kibu 1 nakon 22 ao te kauoua i nanon kibu 23 nakon 36) are titebo te bong are a kaotaki iai. Te tai anne bon te maungatabu are e kamatoaki n te katei bai ao e katabuaki iai Iotebwa Timiti bwa te Beretitenti n te Nakoanibonga ae Rietata. Tabeman unimwaane, a tangiria n reiakina ae mwaiti riki i aon tabeia ngkai. E rimwiaki n taian kaotioti aikai.
1–5, Unimwaane aika kakaonimaki ake a tataekina te euangkerio a na karekea te maiu ae akea tokina; 6–12, Tataro bwa kam na karekea te Tia Karaunano, are e anga reirei ni bwaai ni kabane; 13–22, Ana tekateka unimwaane ni motiki taekaia naake a totokoa aia rongorongo; 23–36, Aia utu mitinare a na karekea te ibuobuoki man te Ekaretia.
1 E koaua, e koaua, ae I tuangkami, Ngai ae I taetae man bwanaan Tamneiu, are te Arebwa ao te Omeka, ami Uea ao Atuami—
2 Ongora, O ngkami ake kam anga arami bwa kam na nako ni katanoata au euangkerio, ao n ereere n au nne ni kurebe.
3 Nooria, I tuangkami bwa bon au kantaninga bwa kam na nako ao tai tiku, ke n taningaroti ma mwakuri ma korakorami—
4 Tabekaarake bwanaam n ai aron tangin te buu, ni katanoata te koaua ni kaineti ma taian kaotioti ma tuua ake I a tia n anganingkami.
5 Ao, ngkana kam kakaonimaki a na katokaaki i aomi ikota ni wiita aika mwaiti, ao ni baunaki ma te karineaki, ao te mimitong, ao te aki maamate, ao te maiu ae akea tokina.
6 Mangaia are, e koaua ae I tuangko au tia mwakuri ae William E. McLellin, I kamauna te tabe are I anganna bwa e na nako nakon aaba ake i mainiku;
7 Ao I anga nakoina te tabe ae boou ao te tua ae boou, are mai iai Ngai, te Uea, I katuaea ibukin ngurenguren nanona;
8 Ao e bure; e ngae n anne, I kabwara ana bure ao ni manga tuangnga, Naako nakon aaba ake i maiaki.
9 Ao e riai au tia mwakuri ae Luke Johnson n nako ma ngaia, ni katanoatai bwaai ake I a tia n tuangiia—
10 Ni wetea aran te Uea ibukin te Tia Karaunano, are e na reireinia bwaai ni kabane ake a riai ibukia—
11 N tataro n taai nako bwa a na aki mamaara iai; ao ngkana a teimatoa ni karaoa aei, N na mena irouia ni karokoa te toki.
12 Nooria, aio ana kantaninga te Uea ae Atuami ni kaineti ma ngkami. Eng. Amen.
13 Ao e koaua ae e manga taku te Uea, e riai au tia mwakuri ae Orson Hyde ao au tia mwakuri ae Samuel H. Smith ni mwananga nakon aaba ake i mainiku, ao ni katanoatai bwaai ake I a tia n tuangiia; ao ngkana a teimatoa ni kakaonimaki, taraia, N na mena irouia ni karokoa te toki.
14 Ao e koaua ae I a manga tuangkami au tia mwakuri ae Lyman Johnson, ao nakon au tia mwakuri ae Orson Pratt, a na mwananga naba nakon aaba ake i mainiku; ao nooria, ao taraia, N na mena irouia naba, ni karokoa te toki.
15 Ao I a manga tuangkami au tia mwakuri ae Asa Dodds, ao nakon au tia mwakuri ae Calves Wilson, bwa a na mwananga naba nakon aaba ake i maeao, ao ni katanoata au euangkerio, n aron ae I a tia n tuangiia.
16 Ao ane e kakaonimaki e na tokanikai i aon bwaai ni kabane, ao e na uotaki rake n te kabanea ni bong.
17 Ao I a manga tuangkami au tia mwakuri ae Major N. Ashley, ao au tia mwakuri ae Burr Riggs, a riai ni mwananga naba nakon aaba i maiaki.
18 Eng, a riai ni kabane nakanne ni mwananga, n aron ae I a tia n tuangiia, ao n nako man te auti teuana nako n te auti teuana, ao man te kaawa teuana nakon te kaawa teuana, ao man te kaawa ae bubura nakon te kaawa ae bubura.
19 Ao n auti nako are kam rin iai, ao a butimwaingkami, katuka ami kakabwaia i aon te auti anne.
20 Ao n auti nako are kam rin iai, ao a aki butimwaingkami, kam na waekoa n nako man te auti anne, ao ni ioi bubun waemi bwa te kakoaua ni kaitaraia.
21 Ao kam na kaonrakeaki ma te kimwareirei ao te kukurei; ao n ataa aei, bwa ni bongin te motikitaeka kam na motika taekan te auti anne, ao ni katuuaaia;
22 Ao e na beebete riki ibukiia beekan ni bongin te motikitaeka, nakoia kaain te auti anne; mangaia are, kabaea nukami ao kakaonimaki, ao kam na tokanikai i aon bwaai ni kabane, ao n uotaki rake n te kabanea ni bong. Eng. Amen.
23 Ao e a manga taku te Uea nakoimi, O ngkami unimwaanen au ekaretia, ake kam a tia n anga arami bwa kam aonga n ataa ana kantaninga ni kaineti ma ngkami—
24 Nooria, I tuangkami, bwa taben te ekaretia bwa e na ibuobuoki ni boutakaia aia utu naake, ao ni boutakaia naba aia utu naake a weteaki ao a riai n nako nakon te aonaba ni katanoata te euangkerio nakon te aonaba.
25 Ngaia are, Ngai, te Uea, I anganingkami te tua aei, bwa kam na karekei taabo ibukiia ami utu, ngkana a teimatoa tarimi ni kukurei ni kauki nanoia.
26 Ao a riai ni kabane ake a kona ni karekei taabo ibukiia aia utu, ao ana boutoka te ekaretia ibukiia, n aki kabwaka nakoia nakon te aonaba, tao ngkana nako mainiku ke nako maeao, ke nako meang, ke nako maiaki.
27 A riai ni bubuti ao a na anganaki, karebwerebwe ao e na kaukaki nakoia, ao ni kaotaki mai eta, mai iroun te Tia Karaunano, bwa iaa te tabo ae a na nako iai.
28 Ao e koaua ae I a manga tuangkami, bwa mwaane nako ake a kabaeaki bwa a na katauraoi maiuia aia utu, e riai teuanne ni katauraoi, ao e na bon aki kona ni kabua ana baunuea; ao e riai ni mwakuri n te ekaretia.
29 A riai aomata nako ni botumwaaka ni bwaai ni kabane. Ao te aomata ae taningaroti e na akea ana tabo n te ekaretia, ma tii ngkana e raira nanona ao ni kaeti arona.
30 Ngaia are, e riai au tia mwakuri ae Simeon Carter ao au tia mwakuri ae Emer Harris n ikotaki n te mwakuri n ibuobuoki;
31 Ao au tia mwakuri naba ae Ezra Thayre ao au tia mwakuri ae Thomas B. Marsh;
32 Au tia mwakuri naba ae Hyrum Smith ao au tia mwakuri ae Reynolds Cahoon;
33 Ao au tia mwakuri naba ae Daniel Stanton ao au tia mwakuri ae Seymour Brunson;
34 Ao au tia mwakuri naba ae Sylvester Smith ao au tia mwakuri ae Gideon Carter;
35 Ao au tia mwakuri naba ae Ruggles ao au tia mwakuri ae Stephen Burnett;
36 Ao au tia mwakuri naba ae Micah B. Welton ao au tia mwakuri naba ae Eden Smith. Eng. Amen.