Benneg 75
Paltiing a naited babaen ni Joseph Smith a Propeta, iti Amherst, Ohio, idi 25 ti Enero 1832 (History of the Church, 1:242–245). Napasamak ti immun-una a taripnong. Iti daytoy a taripnong nakanunongan ken naordenan ni Joseph Smith a Presidente ti Nangato a Kinasaserdote. Sumagmamano nga elder, a nakasagang iti parikut a mangipaawat kadagiti tao iti mensaheda, ti nagtarigagay a mangadal iti ad-adda a pannakailawlawag dagiti pagrebbenganda. Simmaruno daytoy a paltiing.
1–5, Magun-od dagiti napudno nga elder a mangikasaba iti ebanghelio ti agnanayon a biag; 6–12, Agkararagkayo tapno maawattayo ti Mangliwliwa, a mangisuro iti amin a banag; 13–22, Agtugawto iti pangukoman dagiti elder kadagiti mangsuppiat iti mensaheda; 23–36, Nasken nga umawat iti kaamaan dagiti misionario iti tulong manipud iti Simbaan.
1 Pudno, pudno, kunak kadakayo, siak nga agsao a kas iti timek ti Espirituk, nga Alpha ken Omega, ti Apo ken ti Diosyo—
2 Imdenganyo, O dakayo a nangted iti nagnaganyo a mapan mangipakdaar iti ebangheliok, ken manggaik iti bangkagko.
3 Adtoy, kunak kadakayo a mapankayo ket saankayo nga agbati, wenno agbalin a sadut ngem agtrabahokayo iti kabaelanyo—
4 Pigsaanyo ti agsao a kas iti aweng ti trumpeta, a mangipakdaar iti kinapudno a maibatay kadagiti paltiing ken bilin nga intedko kadakayo.
5 Iti kasta, no napudnokayo agimetkayonto iti adu nga apit, ken makoronaankayonto iti dayaw, ken dayag, ken saan nga ipapatay, ken agnanayon a biag.
6 Ngarud, pudno kunak iti katulongak a ni William E. McLellin, ibabawik ti pakumit nga intedko kenkuana a mapan kadagiti dumaya a pagilian;
7 Ket ikkak iti baro a pakumit ken baro a bilin, a siak, ti Apo, dusaek gapu iti panagtantanabutobna iti pusona;
8 Ken nagbasol; nupay kasta, pakawanek ket kunak manen kenkuana, Mapanka kadagiti pagilian iti abagatan.
9 Ket pasurotenyo kenkuana ti katulongak a ni Luke Johnson, ket ipakdaarda dagiti banag nga imbilinko kadakuada—
10 Nga umawag iti nagan ti Apo para iti Mangliwliwa, a mangisuronto kadakuada iti amin a banag a nasken kadakuada—
11 Nga agkararagda a kanayon tapno saanda nga aglulok; ket no aramidenda la ketdi daytoy, addaakto kadakuada agingga iti panungpalan.
12 Adtoy, daytoy ti pagayatan ti Apo a Diosyo maipanggep kadakayo. Pudno a kasta. Amen.
13 Ket manen, pudno kastoy ti kinuna ti Apo, pagdaliasatenyo ni katulongak nga Orson Hyde ken ti katulongak a ni Samuel H. Smith kadagiti pagilian iti dumaya, ket ipakdaarda dagiti banag nga imbilinko kadakuada; ket no la ketdi napudnoda, ngarud, addaakto kadakuada agingga iti panungpalan.
14 Ket manen, pudno kunak iti katulongak a ni Lyman Johnson, ken iti katulongak a ni Orson Pratt, agdaliasatdanto met kadagiti pagilian iti dumaya; ket adtoy, ket imutektekan, addaakto met kadakuada, agingga iti panungpalan.
15 Ket manen, kunak iti katulongak a ni Asa Dodds, ken iti katulongak a ni Calves Wilson, nga agdaliasatdanto met kadagiti pagilian iti lumaud, ket ipakdaarda ti ebangheliok, a kas iti imbilinko kadakuada.
16 Ket isu a napudno parmekennanto amin a banag, ket maitag-ayto iti maudi nga aldaw.
17 Ket manen, kunak iti katulongak a ni Major N. Ashley, ken iti katulongak a ni Burr Riggs, pagdaliasatenyo met ida iti pagilian iti abagatan.
18 Wen, pagdaliasatenyo amin dagitoy, a kas imbilinko kadakuada, a mamalaybalay, ken mamurukpurok, ken maniudadsiudad.
19 Ket iti ania man a balay a serkanyo, ket awatendakayo, ibatiyo ti bendisionyo iti dayta a balay.
20 Ket iti ania man a balay a serkanyo, ket saandakayo nga awaten, pumanawkayo a dagus iti dayta a balay, ket pagpagenyo ti tapok dagiti dapanyo a kas pammaneknek a maibusor kadakuada.
21 Ket mapnokayonto iti rag-o ken kinaragsak; ket ammoyo daytoy, nga iti aldaw ti panangukom dakayonto ti ukom iti dayta a balay, ket kednganyo ida;
22 Ket nalaglag-anto kadagiti pagano iti aldaw ti panangukom, ngem iti dayta a balay; ngarud, patibkerenyo dagiti lomoyo ket agbalinkayo a napudno, ket maparmekyonto amin a banag, ket maitag-aykayonto iti maudi nga aldaw. Pudno a kasta. Amen.
23 Ket manen, kastoy ti kinuna ti Apo kadakayo, O dakayo nga elder ti simbaanko, a nangted kadakayo iti nagnaganyo tapno maammuanyo ti pagayatanna maipanggep kadakayo—
24 Adtoy, kunak kadakayo, a pagrebbengan ti simbaan ti mangtarabay a mangtulong kadagiti kaamaan dagidiay, ken kasta met a mangtulong kadagiti kaamaan dagiti natudingan ken kasapulan a maibaon iti lubong a mangipakdaar iti ebanghelio iti lubong.
25 Gapuna, siak, ti Apo, itedko daytoy a bilin kadakayo, tapno makagun-odkayo iti lugar para kadagiti kaamaanyo, no la ketdi siaayat dagiti kabsatyo a manglukat iti puspusoda.
26 Ket diyo ipalubos iti amin a kasta a makagun-od iti luglugar a para kadagiti kaamaanda, ken tulong ti simbaan para kadakuada mapan iti lubong, iti man daya wenno iti laud, wenno iti amianan, wenno iti abagatan.
27 Pagdawatenyo ida ket umawatdanto, agtuktokda ket mailukatandanto, ket mapakaammuandanto manipud iti ngato, a kas iti Mangliwliwa, no sadino ti papananda.
28 Ket manen, pudno kunak kadakayo, a tunggal lalaki a naikkan iti pagrebbengan nga ipaayan ti kaamaanna, nasken nga ipaayanna, ket saannanto a mapukaw ti koronana; ket pagtrabahuenyo iti simbaan.
29 Nasken a naregta ti tunggal lalaki iti amin a banag. Ket awan ti lugar ti sadut iti simbaan, malaksid no agbabawi ken aturenna dagiti wagasna.
30 Gapuna, pagkappengenyo ti katulongak a ni Simeon Carter ken ti katulongak a ni Emer Harris iti panagserbi;
31 Ken kasta met ti katulongak a ni Ezra Thayre ken ti katulongak a ni Thomas B. Marsh;
32 Kasta met ti katulongak a ni Hyrum Smith ken ti katulongak a ni Reynolds Cahoon;
33 Ken kasta met ti katulongak a ni Daniel Stanton ken ti katulongak a ni Seymour Brunson;
34 Ken kasta met ti katulongak a ni Sylvester Smith ken ti katulongak a ni Gideon Carter;
35 Ken kasta met ti katulongak a ni Ruggles Eames ken ni katulongak nga Stephen Burnett;
36 Ken kasta met ti katulongak a ni Micah B. Welton ken kasta met ti katulongak a ni Eden Smith. Pudno a kasta. Amen.