Mwakoro 81
Kaotioti ae kaotaki rinanon Iotebwa Timiti te Burabeti, i Hiram, Ohio, ni Maati 15, 1832. E weteaki Frederick G. Williams bwa te ibonga ae rietata ao te tia ibuobuoki n te Beretitentii n te Nakoanibonga ae Rietata. Bokin taian rongorongo a kaotia bwa ngke e karekeaki te kaotioti aei ni Maati 1832, e weteaki iai Jesse Gause nakon te nakoa n tia ibuobuoki nakon Iotebwa Timiti n te Moan Beretitentii. E ngae n anne, ngke e aki reitinako ni kakoroa nanon te wewete aei n te aro ae e riai, e a kanakoaki ngkanne te wewete nakon Frederick G. Williams. Te kaotioti (ae bonginaki ni Maati 1832) e na taraki bwa te mwaneka nakon te kariaia ni katean te Moan Beretitentii, ibukina bwa e kainanoa te nakoa n tia ibuobuoki n te rabwata anne ao ni kabwarabwara kakawakin te wewete. E beku te Tari Gause n te tai ae aki maan ma e kabaneaki man te Ekaretia n Ritembwa 1832. E katabuaki te Tari Williams nakon te nakoa are e kaotaki ni Maati 18, 1833.
1–2, Kiingin te abanuea a tauaki n taai nako iroun te Moan Beretitentii; 3–7, Ngkana Frederick G. Williams e kakaonimaki n ana mwakuri ni ibuobuoki, e na karekea te maiu ae akea tokina.
1 E koaua, e koaua, I tuangko au tia mwakuri ae Frederick G. Williams: Kakauongo nakon bwanaan teuare e taetae, nakon ana taeka te Uea ae Atuam, ao kakaonimaki nakon te wewete are ko na weteaki nako iai, n riki bwa te ibonga ae rietata n au ekaretia, ao te tia ibuobuoki nakon au tia mwakuri ae Iotebwa Timiti te Ataei;
2 Nakon are I a tia n anganna kiingin te abanuea, are a na tiku n taai nako iroun te Beretitentii n te Nakoanibonga ae Rietata:
3 Ngaia are, e koaua ae I butimwaia ao N na kakabwaia, ao ngkoe naba, ngkana ko teimatoa ni kakaonimaki n anga taeka n reirei ao ni butimwaai, n te nakoa are I a tia n rineiko nako iai, n tataro n taai nako, ni bwanaam ao inanom, i buakoia aomata ke n tii ngkoe, n am mwakuri naba ni katanoata te euangkerio n abaia ake a maiu, ao i buakoia tarim.
4 Ao ni karaoan bwaai aikai ko a karaoa ae raoiroi ae rangi ni korakora nakoia raom, ao ni karikirakea mimitongin teuare ngaia am Uea.
5 Mangaia are, bwaina te kakaonimaki; teei n te nakoa are I a tia n anganiko; buokiia ake a mamaara, tabekirake baai ake a tine, ao ni kakorakorai bubuaniwae aika aki konamaki.
6 Ao ngkana ko kakaonimaki ni karokoa te toki ko na baunaki n te aki maamate, ao te maiu ae akea tokina ni nne ni maeka are I a tia ni katauraoia ni mwengan Tamau.
7 Nooria, ao taraia, aikai ana taeka te Arebwa ao te Omeka, are Iesu Kristo. Amen.