Tasal 82
K’utb’esinb’il na’leb’ k’eeb’il re laj Jose Smith li Profeet, sa’ Independence, sa’ li Condado Jackson, Missouri, 26 Abril 1832. Kik’eeman sa’ jun ch’utam reheb’ taqenaqil aj tij ut xb’eenil sa’ li Iglees. Sa’ li ch’utam, laj Jose Smith kik’ulub’aman jo’ Awa’b’ej re li Taqenaqil Tijonelil, a’ li opiis li ak kik’ojob’aman wi’ chaq sa’ jun ch’utub’aj-ib’ reheb’ li taqenaqil aj tij, xb’eenil, ut komon, sa’ Amherst, Ohio, 25 Enero 1832 (chi’ilmanq xtiklajik li tasal 75). Li k’utb’esinb’il na’leb’ a’in naxye wi’chik li b’eresink li ak kik’eeman junxil sa’ jun chik li k’utb’esink (tasal 78) re xk’ojob’ankil jun li molam—li Molam sa’ Junajil nayeeman re (chi b’eresinb’il xb’aan laj Jose Smith, li aatin “k’anjelil” moqon kik’ehe’ choq’ ruuchil li aatin “molam”)—re xjolominkil lix k’anjel li Iglees re k’ayink ut puktesink.
1–4, B’ar wi’ naab’al li k’eeb’il, naab’al li teneb’anb’il; 5–7, Li Q’ojyin na’awa’b’ejin sa’ li ruchich’och’; 8–13, Li Qaawa’ wan chi teneb’anb’il naq naqab’aanu li k’a’ru naxye; 14–18, Sion tento taatamq sa’ chaq’al ru ut santilal; 19–24, Li junjunq chi winq chixsik’ xchaab’ilal li ras riitz’in.
1 Chi yaal, chi yaal, ninye eere, ex inmoos, naq a’ yaal jo’ xekuy eemaak cherib’il eerib’, chi jo’kan laa’in, li Qaawa’ ninkuy eemaak laa’ex.
2 A’b’anan wankeb’ sa’ eeyanq li xe’maakob’ chi numtajenaq; relik chi yaal, chejunilex ajwi’ xexmaakob’; a’b’an chi yaal ninye eere, cheril eerib’ chalen anajwan, ut meekanab’ eerib’ chi maakob’, maare anchal taat’ane’q rahil raqb’a-aatin sa’ xb’een eejolom.
3 Xb’aan naq rik’in li ani k’eeb’il naab’al re, naab’al li teneb’anb’il; ut ani namaakob’ chiru xnimal li saqen, xnimal li tojb’a-maak taak’ehe’q sa’ xb’een.
4 Nekepatz’ ink’ab’a’ re xk’ulb’al li k’utb’esinb’il na’leb’, ut a’an nink’e eere, ut a’ yaal jo’ ink’a’ nekepaab’ lin yehom, li nink’e eere, aj q’etol aatin nekexkana; ut li tiik ruhil q’ajkamunk ut li raqb’a-aatin, a’an li tojb’a-maak li nak’eeman xb’aan lin chaq’rab’.
5 Jo’kan ut, li k’a’ru ninye re li jun ninye re chixjunil: Chexyo’leq, xb’aan naq laj xik’ ilonel naxhel xnimal lix awa’b’ejil, ut li q’ojyin na’awa’b’ejin;
6 Ut lix josq’il li Dios naloch chirixeb’ li wankeb’ sa’ li ruchich’och’, ut maajun nab’aanunk re li us, xb’aan naq chixjunileb’ xe’el chaq sa’ li b’e.
7 Ut anajwan, chi yaal ninye eere, laa’in, li Qaawa’, maajun maak tink’e sa’ eeb’een; chapomaq eeb’e ut mexmaakob’ chik; a’b’anan re li aamej a’an li namaakob’ te’sutq’iiq wi’chik li maak re junxil, chan li Qaawa’ lee Dios.
8 Ut jo’kan wi’chik, ninye eere, nink’e eere jun ak’ taqlahom, re taaruuq teetaw ru li rajom inch’ool cherix;
9 Malaj, sa’ jalan chik aatin, nink’e eere lee b’eresinkil, chan ru texb’eeq chiwu, re taasutq’isimanq eere choq’ eekolb’al.
10 Laa’in, li Qaawa’, wankin chi teneb’anb’il naq nekeb’aanu li k’a’ru ninye; a’b’an naq ink’a’ nekeb’aanu li k’a’ru ninye, maajun yeechi’ihom nekek’ul.
11 Jo’kan ut, chi yaal ninye eere, naq aajel ru choq’ reheb’ lin moos aj Edward Partridge ut aj Newel K. Whitney, laj A. Sidney Gilbert ut laj Sidney Rigdon, ut lin moos aj Jose Smith, ut aj John Whitmer ut aj Oliver Cowdery, ut aj W. W. Phelps ut aj Martin Harris, naq te’wanq chi b’ak’b’ookeb’ chirib’ileb’ rib’ rik’in jun b’ak’leb’ ut jun sumwank li ink’a’ naru chi q’etmank rik’in q’etok aatin, ka’ajwi’ naq taachalq li raqb’a-aatin sa’ junpaat chirix, sa’ lee jar mertoomil—
12 Re xb’eresinkil li taa’uxmanq rik’ineb’ li neb’a’, ut chixjunil li k’a’aq re ru chirix li obispil sa’ li ch’och’ Sion jo’ ajwi’ sa’ li ch’och’ Kirtland;
13 Xb’aan naq laa’in xinwosob’tesi li ch’och’ Kirtland sa’ li kutan k’oxlanb’il inb’aan choq’ re lix chaab’ilaleb’ laj santil paab’anel re li Q’axal Taqenaq Xwankil, ut choq’ jun roqechal Sion.
14 Xb’aan naq Sion tento taatamq sa’ xchaq’al ru, ut sa’ santilal; tento taanimob’resimanq ru lix nub’aal; tento te’k’ehe’q xkawub’ li roqechal; relik chi yaal, ninye chi yaal eere, Sion tento taawakliiq ut tixk’e chirix lix chaq’al ru aq’.
15 Jo’kan ut, nink’e eere li taqlahom a’in, naq teeb’ak’ eerib’ rik’in li sumwank a’in, ut taab’aanumanq jo’ chanru lix chaq’rab’ li Qaawa’.
16 K’ehomaq reetal, wahi’ ajwi’ xchaab’ilal inna’leb’ choq’ re lee chaab’ilal.
17 Ut laa’ex tento texwanq chi juntaq’eet, malaj sa’ jalan chik aatin, tento naq juntaq’eetaq eewankil chixk’ulb’al li eechej, re taaruuq xtuqub’ankil li k’a’ru re lee mertoomil, li junjunq chi winq jo’ chanru li ajb’il xb’aan ut li nak’anjelak re, a’ yaal jo’ naq tiik li ajb’il xb’aan—
18 Ut chixjunil a’in choq’ re lix chaab’ilal lix iglees li yo’yookil Dios, re naq li junjunq chi winq naru chixchaab’ilob’resinkil li maatan k’eeb’il re, re naq li junjunq chi winq naru chixk’ulb’al chik xkomon li maatan, relik chi yaal, toj jun cient sut chik xkomon a’an, re taak’ehe’q sa’ lix k’uuleb’aal kab’l li Qaawa’, re taa’ok choq’ reechanihom chixjunil li iglees sa’ komonil—
19 Li junjunq chi winq yooq chixsik’b’al xchaab’ilal li ras riitz’in, ut chixb’aanunkil chixjunil li k’a’aq re ru chi junaj ru lix sa’ li ru sa’ lix loq’al li Dios.
20 Li k’anjelil a’in kinxaqab’ re naq taawanq choq’ jun k’anjelil li junelik taakanaaq choq’ eere, ut choq’ reheb’ li te’wanq moqon sa’ lee na’aj, a’ yaal jo’ ink’a’ nekexmaakob’.
21 Ut li aamej li namaakob’ chiru li sumwank a’in, ut naxkawob’resi li raam chirix, taab’aanumanq re jo’ chanru li chaq’rab’ re lin iglees, ut taaq’axtesimanq chiru lix chiq’lehom laj Satanas toj sa’ xkutankil li tojb’al-ix.
22 Ut anajwan, chi yaal ninye eere, ut a’in xchaab’ilal li na’leb’, tawomaq ani te’xk’am rib’ sa’ chaab’ilal eerik’in, rik’in li tumin li maak’a’ xtiikilal, ut eb’ a’an ink’a’ texxsacheb’.
23 Kanab’omaq wik’in laa’in li raqok aatin, xb’aan naq we laa’in, ut laa’in tinq’ajkamunq. Li tuqtuukilal chiwanq eerik’in; li wosob’tesihom chikanaaq eerik’in.
24 Xb’aan naq toj eere ajwi’ li awa’b’ejihom, ut jo’kanaq chi junelik, wi ink’a’ text’ane’q chaq sa’ lee xaqxookilal. Chi jo’kan. Amen.