Benneg 85
Paltiing a naited babaen ni Joseph Smith a Propeta, iti Kirtland, Ohio, idi 27 ti Nobiembre 1832 (History of the Church, 1:298–299). Naadaw daytoy a benneg iti surat ti Propeta ken ni W.W. Phelps, nga agnanaed idi iti Independence, Missouri. Naited daytoy a sungbat dagiti saludsod maipanggep kadagiti Santo nga immakar iti Zion ngem saan a nakaawat iti tawid a maibatay iti nabangon a timpuyog ti Simbaan.
1–5, Maawat dagiti tawid iti Zion babaen ti pannangted-pateg; 6–12, Maysa a nabileg ken napigsa ti mangtedto kadagiti Santo iti tawidda iti Zion.
1 Pagrebbengan ti eskribiente ti Apo, a tinudinganna, a mangisurat iti pakasaritaan, ken ti sapasap a kasuratan ti simbaan kadagiti amin a banag a napasamak iti Zion, ken amin dagiti nagidaton iti sanikuada, ken umawat kadagiti tawid a nainkalintegan manipud iti obispo;
2 Ken kasta met ti wagas ti panagbiagda, ti pammatida, ken dagiti aramidda; ken kasta met dagiti simmina a kimmalilis iti kinapudno kalpasan ti pannakaalada kadagiti tawidda.
3 Maisuppiat iti pagayatan ken bilin ti Dios a dagiti saan nga immawat iti tawidda babaen ti pannangted-pateg, a mainugot iti paglinteganna, nga intedna, tapno mapagbayadna dagiti taona iti apagkapullo, tapno makapagsaganada iti aldaw ti panagibales ken pannakapuor, no mailista dagiti naganda kadagiti tao ti Dios.
4 Wenno saan a maidulin ti kapupuonda, wenno adda a masarakan iti ania man kadagiti listaan wenno pakasaritaan ti simbaan.
5 Saanto a makita dagiti naganda, wenno ti nagnagan dagiti ammada, wenno ti nagnagan dagiti annakda a naisurat iti libro ti paglintegan ti Dios, kinuna ti Apo ti Pangen.
6 Wen, kastoy ti kuna ti naalumamay a bassit a timek, a mayarasaas ken sumeksek iti amin a banag, ken kaaduanna a mamagkintayeg kadagiti tulangko bayat ti panangipasimudaagna, a kunkunana:
7 Ket mapasamakto a siak, ti Apo a Dios, mangibaonakto iti maysa a nabileg ken napigsa, a nakaiggem iti setro ti bileg, a nagkawes iti naibalkot a lawag, a pagaonan ti ngiwatna iti balikas, dagiti agnanayon a balikas; idinto a ti nagunegna pagburayokan ti kinapudno, a mangurnos iti balay ti Dios, a mangbinglabinglay kadagiti tawid dagiti santo a masarakan ti nagnaganda, ket ti nagnagan dagiti ammada, ken dagiti annakda, a nailista iti libro ti paglintegan ti Dios;
8 Idinto a dayta a tao, nga inawagan ti Dios ken tinudinganna, a mangaramat iti imana a mangtimbeng iti daong ti Dios, idasayto ti pana ni patay, a kas iti kayo a pisien ti nasilap a pana ti kimat.
9 Ket amin dagiti saan a makita a naisurat iti libro a pakalaglagipan awanto ti masapulanda a tawid iti dayta nga aldaw, ngem mawarawaradanto, ket addanto bingayda iti lugar dagiti saan a mamatpati, a yan dagiti agan-anug-og ken agngarngariet.
10 Saan a nagtaud kaniak dagitoy banag nga imbagak; ngarud, kas imbaga ti Apo, tungpalennanto.
11 Ket isuda nga adda iti Nangato a Kinasaserdote, a saan a makita ti naganda iti libro ti paglintegan, wenno dagiti nakita a kimmalilis, wenno naisina iti simbaan, kasta met ti nababbaba a kinasaserdote, wenno dagiti kameng, awanto ti tawid a makitada iti dayta nga aldaw kadagiti santo ti Kangatuan;
12 Ngarud, maaramidto kadakuada a kas kadagiti annak ti saserdote, a kas makitanto a naisurat iti maikadua a kapitulo ken maikanem-a-pulo-ket-maysa ken maikadua a bersikulo ti Esdras.