Seksyon 85
Revelasyon Joseph Smith, Pwofèt la te resevwa nan Kirtland, Ohio, 27 Novanm 1832. Seksyon sa a se yon ekstrè nan yon lèt Pwofèt la te voye bay William W. Phelps, ki te abite nan Independence, Missouri. Se te yon repons pou kesyon konsènan Sen ki te demenaje ale nan Siyon yo, men ki pa t suiv kòmandman pou konsakre pwopriyete yo epi akozdesa yo pa t resevwa eritaj yo selon lòd yo te etabli nan Legliz la.
1–5, Konsekrasyon se kondisyon pou nou resevwa eritaj nan Siyon; 6–12, Yon moun puisan ak djanm pral bay sen yo eritaj yo nan Siyon.
1 Se devwa grefye Senyè a, li te lonmen an, pou kenbe istwa ak rejis jeneral legliz la konsènan tout bagay ki pase nan Siyon, epi konsènan tout moun ki konsakre pwopriyete, epi ki resevwa eritaj legalman nan men evèk la;
2 Ak fason yo viv, lafwa yo ak zèv yo; epi tou konsènan aposta yo ki apostazye apre yo fin resevwa eritaj yo.
3 Se yon bagay ki kontrè ak volonte epi ak kòmandman Bondye pou moun ki pa resevwa eritaj yo nan konsekrasyon, daprè lalwa li te bay la, pou l kapab fè pèp li a peye ladim nan, pou prepare yo pou jou vanjans ak dife a, ta gen non yo sou lis ansanm avèk pèp bondye a.
4 Ni tou pou kenbe jeneyaloji yo, oubyen kite l kote moun kapab jwenn li sou nenpòt nan rejis oubyen nan istwa legliz la.
5 Senyè tout Lame yo di, moun p ap jwenn non yo, ni non Papa yo, ni non pitit yo nan liv lalwa Bondye a.
6 Wi, ti vwa dous ki pale nan moun epi ki pèse tout bagay la, epi ki souvan fè zo m tranble pandan l ap manifeste a di:
7 Epi se pral konsa, mwen menm Senyè Bondye a, m pral voye yon moun ki pisan epi ki djanm, ki gen baton pouvwa a nan men li a, ki abiye avèk limyè kòm kouvèti a, epi bouch li pral pale pawòl, pawòl etènèl; pandan zantray li pral yon fontèn verite, pou mete kay Bondye a nan lòd, epi pou ranje ak tiraj osò eritaj sen yo ki gen non yo ekri, ak non Papa yo ak non pitit yo, nan liv lalwa Bondye a;
8 Alòske moun sa a Bondye te aple epi l te lonmen an, ki lonje men l pou l ranfòse lach Bondye a pral tonbe anba frap lanmò tankou yon pyebwa ki tonbe anba flanm vivan zeklè.
9 Epi tout sa ki pa gen non yo ekri nan liv souveni an yo p ap jwenn eritaj nan jou sa a, men, y ap koupe fè de bout, epi y ap jwenn pozosyon pami enkredil yo kote ki gen kriye ak manje dan.
10 M pa di bagay sa yo poutèt pa m; se poutèt sa jan Senyè a pale a se konsa l ap akonpli tou.
11 Epi moun ki fè pati Gran Prètriz la, epi ki pa gen non yo ekri nan liv lalwa a, oubyen ki te apostazye yo, oubyen yo te soti nan legliz la, menm jan ak moun ki gen pi piti prètriz la, oubyen manm yo, nan jou sa a yo p ap jwenn eritaj pami sen Bondye Ki Pi Wo a;
12 Se poutèt sa, y ap trete yo tankou pitit prèt la, jan nou wè nan rejis dezyèm chapit ki nan swasanteyinyèm ak dezyèm vèsè liv Esdras.