Vaega 9
Faaaliga na tuuina mai e ala mai ia Iosefa Samita le Perofeta, ia Oliva Kaotui, i Haramoni, Penisilevania, Aperila 1829. Ua apoapoaiina Oliva ia onosai ma ua timaia ia lotomalie e tusitusi mo le taimi nei, mea e faalau mai e le tagata faaliliu, nai lo le taumafai e faaliliu.
1–6, E i ai isi talafaamaumau mai anamua e lei faaliliuina; 7–14, O le Tusi a Mamona e faaliliu e ala i le suesue ma i le faamaoniga faaleagaga.
1 Faauta, Ou te fai atu ia te oe, lo’u atalii e, ona sa e lē faaliliu e tusa ai ma le mea na e manao i ai mai ia te a’u, ma amata ona e toe tusitusi mo la’u auauna, o Iosefa Samita, Le Itiiti, ua faapea lava ona Ou manao e tatau ona e faaauau pea seia oo ina e faamaeaina lenei talafaamaumau, lea ua Ou tuuina atu ia te ia.
2 Ma lea, faauta, ua i ai ia te a’u ni isi talafaamaumau, o le a Ou tuu atu ia te oe le mana e mafai ai ona e fesoasoani e faaliliu.
3 Ia onosai, lo’u atalii e, ona o le poto ua ia te a’u, ma ua lē tatau ai ona e faaliliu i le taimi nei.
4 Faauta, o le galuega ua valaaulia oe e te faia o le tusitusi lea mo la’u auauna o Iosefa.
5 Ma, faauta, ona sa e lē faaauau pea e pei ona sa e amata mai ina ua amata ona e faaliliu, o lea na Ou aveesea ai lenei avanoa mai ia te oe.
6 Aua e te muimui, lo’u atalii e, ona o le poto ua ia te a’u ua Ou faia ai ia te oe i lenei ala.
7 Faauta, sa e lē malamalama; sa e manatu o le a Ou tuu atu ia te oe lena mea, ae e te lei mafaufau i ai ae na o lou ole mai ai ia te a’u.
8 Ae, faauta, Ou te fai atu ia te oe, e ao ina e suesue i ai i lou mafaufau; ona ao lea ona e ole mai ia te a’u pe ua tonu, ma afai ua tonu, o le a Ou faia ia mu lou loto i totonu ia te oe; o lea, o le a e lagona ai ua tonu.
9 Ae afai ua lē sao, o le a e lē maua ni lagona faapena, ae o le a e maua se mafaufauga lē manino o le a fai ia galo ai ia te oe le mea ua sese; o lea, e lē mafai ona e tusia mea ua paia vagana ai ua tuu atu ia te oe mai ia te a’u.
10 O lenei a na e iloa lenei mea po ua mafai ona e faaliliu; ae ui i lea, ua lē tatau ona e faaliliu nei.
11 Faauta, sa tatau ai ina ua e amata mai; peitai sa e fefe, ma ua tuanai le taimi, ma ua lē tatau nei;
12 Aua, ua e lē tagai ea ua Ou tuu atu i la’u auauna o Iosefa le malosi ua lava, e faalava ai? Ma Ou te lei tausalaina se tasi o oulua.
13 Ia fai lenei mea ua Ou poloaiina ai oe, ma o le a e manuia. Ia faamaoni, ma ia lē tuu atu i se faaosoosoga.
14 Ia tu mausali i le galuega ua Ou valaauina ai oe, ma o le a leai se lauulu o lou ulu e leiloa, ma o le a siitia a’e oe i luga i le aso gataaga. Amene.