Parathënia

Doktrina e Besëlidhje është një mbledhje e zbulesave hyjnore dhe deklaratave të frymëzuara të dhëna për ngritjen dhe rregullimin e mbretërisë së Perëndisë në tokë në ditët e fundit. Megjithëse shumica e seksioneve u drejtohen anëtarëve të Kishës së Jezu Krishtit të Shenjtorëve të Ditëve të Mëvonshme, mesazhet, paralajmërimet dhe këshillimet janë për të mirën e gjithë njerëzimit dhe përmbajnë një ftesë për gjithë njerëzit kudo, që të dëgjojnë zërin e Zotit Jezu Krisht, duke u folur për mirëqenien e tyre tokësore dhe për shpëtimin e tyre të përjetshëm.

Shumica e zbulesave në këtë përmbledhje u mor nëpërmjet Joseph Smith të Riut, profetit dhe presidentit të parë të Kishës së Jezu Krishtit të Shenjtorëve të Ditëve të Mëvonshme. Të tjerat u dhanë nëpërmjet disa prej pasuesve të tij në Presidenci (shih kretë e seksioneve 135, 136 e 138 dhe Deklaratat Zyrtare 1 e 2).

Libri i Doktrina e Besëlidhjeve është një nga veprat standarde të Kishës, së bashku me Biblën, Librin e Mormonit dhe Perlën me Vlerë të Madhe. Megjithatë, Doktrina e Besëlidhje është e pashoqe pasi nuk është një përkthim i një dokumenti të lashtë, por ka origjinë bashkëkohore dhe u dha nga Perëndia përmes profetëve të tij të zgjedhur për rivendosjen e veprës së tij të shenjtë dhe ngritjen e mbretërisë së Perëndisë në tokë në këto ditë. Në zbulesat, lexuesi dëgjon zërin e butë, por të prerë, të Zotit Jezu Krisht, duke folur përsëri në këtë periudhë të plotësisë së kohëve; dhe vepra që fillohet në të është përgatitore për ardhjen e tij të dytë, në përmbushjen e fjalëve të të gjithë profetëve të shenjtë që kur filloi bota dhe në përputhje me to.

Joseph Smith i Riu u lind më 23 dhjetor 1805 në Sharon, kontea e Windsor-it, Vermont. Gjatë vegjëlisë së tij, ai u zhvendos me familjen e tij për në Manchester, në New York-un perëndimor. Ishte ndërsa po jetonte pranë Manchester-it në pranverën e 1820-ës, kur ishte katërmbëdhjetë vjeç, që pati vegimin e tij të parë, në të cilin ai u vizitua personalisht nga Perëndia, Ati i Përjetshëm, dhe Biri i tij, Jezu Krishti. Atij iu tha në këtë vegim se kisha e vërtetë e Jezu Krishtit, që ishte ngritur në kohën e Dhjatës së Re dhe që kishte administruar plotësinë e ungjillit, nuk ishte më në tokë. Manifestime të tjera hyjnore pasuan, në të cilat ai u mësua nga shumë engjëj; atij iu tregua se Perëndia kishte për të një punë të veçantë për të bërë në tokë dhe se nëpërmjet tij Kisha e Jezu Krishtit do të rivendosej në tokë.

Pas pak kohe, Joseph Smith-i me anë të ndihmës hyjnore ishte në gjendje të përkthente dhe botonte Librin e Mormonit. Ndërkohë, ai dhe Oliver Cowdery u shuguruan në Priftërinë Aarone nga Gjon Pagëzori në maj 1829 (shih DeB 13) dhe pak pas kësaj, ata gjithashtu u shuguruan në Priftërinë Melkizedeke nga apostujt e lashtë: Pjetri, Jakobi dhe Gjoni (shih DeB 27:12). Shugurime të tjera pasuan, në të cilat çelësat e priftërisë iu dhanë atyre nga Moisiu, Elija, Eliasi dhe shumë profetë të lashtë (shih DeB 110; 128:18, 21). Këto shugurime ishin në fakt, një rivendosje e autoritetit hyjnor të njerëzve në tokë. Më 6 prill 1830, nën drejtimin qiellor, Profeti Joseph Smith organizoi Kishën dhe kështu, Kisha e vërtetë e Jezu Krishtit është edhe një herë vepruese si një institucion mes njerëzve, me autoritet për t’u mësuar ungjillin dhe për të administruar ordinancat e shpëtimit. (Shih Perla me Vlerë të Madhe, Historia e Joseph Smith-it 1:1–75 dhe DeB 20.)

Këto zbulesa të shenjta u morën në përgjigje të lutjes, në kohët e nevojës dhe rodhën nga situata të vërteta jetësore duke përfshirë njerëz realë. Profeti dhe bashkëpunëtorët e tij kërkuan udhërrëfim hyjnor dhe këto zbulesa vërtetojnë se ata e morën atë. Në zbulesat lexuesi sheh rivendosjen dhe shpalosjen e ungjillit të Jezu Krishtit, dhe shpalljen e periudhës së plotësisë së kohëve. Zhvendosja e Kishës drejt perëndimit, nga New York-u e Pennsylvania drejt Ohio-s, drejt Missouri-t, drejt Illinois-it dhe, së fundi, drejt Bazenit të madh të Amerikës perëndimore dhe ndeshjet e fuqishme të Satanit, ndërsa përpiqeshin të ndërtonin Sionin në tokë në kohët moderne, gjithashtu shfaqen në këto zbulesa.

Disa prej seksioneve të para përfshijnë çështje lidhur me përkthimin dhe botimin e Librit të Mormonit (shih seksionet 3, 5, 10, 17 dhe 19). Disa seksione të mëvonshme pasqyrojnë punën e Profetit Joseph Smith ndërsa bëri një përkthim të frymëzuar të Biblës, gjatë të cilit u morën shumë nga seksionet e mëdha doktrinore (shih, për shembull, seksionet 37, 45, 73, 76, 77, 86, 91 dhe 132, secili prej të cilëve ka disa lidhje të drejtpërdrejta me përkthimin e Biblës).

Në zbulesat, doktrinat e ungjillit paraqiten me shpjegime rreth çështjeve themelore të tilla si: natyra e Hyjnisë, origjina e njeriut, realiteti i Satanit, qëllimi i vdekshmërisë, domosdoshmëria për bindjen, nevoja për pendim, veprimet e Fuqisë së Shenjtë, ordinancat dhe kryerjet që çojnë në shpëtim, fati i tokës, gjendjet e ardhshme të njeriut pas Ringjalljes dhe Gjykimit, përjetësia e lidhjes së martesës dhe natyra e përjetshme e familjes. Në të njëjtën mënyrë, shpalosja shkallë-shkallë e strukturës administrative të kishës tregohet me thirrjen e peshkopëve, të Presidencisë së Parë, të Këshillit të të Dymbëdhjetëve, të të Shtatëdhjetëve dhe ngritjen e detyrave dhe kuorumeve të tjerë kryesuese. Së fundi, dëshmia që jepet për Jezu Krishtin—hyjninë e tij, madhështinë e tij, përsosjen e tij, dashurinë e tij dhe fuqinë e tij shëlbuese—e bën këtë libër me vlerë të madhe për familjen njerëzore dhe me më shumë vlerë se sa pasuritë e gjithë tokës.

Një numër zbulesash u botuan në Sion (Independence), Missouri, më 1833, nën titullin “A Book of Commandments for the Government of the Church of Christ” (Një Libër Urdhërimesh për Qeverisjen e Kishës së Krishtit). Lidhur me këtë botim pleqtë e Kishës dhanë dëshmi solemne se Zoti u kishte dëshmuar shpirtrave të tyre se këto zbulesa ishin të vërteta. Ndërsa Zoti vazhdoi të komunikonte me shërbëtorët e tij, një përmbledhje më e zgjeruar u botua dy vjet më vonë në Kirtland, Ohio, me titullin “Doctrine and Covenants of the Church of the Latter-day Saints”. (Doktrina e Besëlidhje të Kishës së Shenjtorëve të Ditëve të Mëvonshme). Këtij botimi më 1835, iu bashkëngjit dëshmia e shkruar e Dymbëdhjetë Apostujve, si vijon:

Emrat e të Dymbëdhjetëve ishin:

Në botimet e mëpasshme të Doktrina e Besëlidhje, zbulesa shtesë ose çështje të tjera për t’u shënuar janë shtuar, siç u morën dhe siç u pranuan nga kuvendet ose konferencat e përshtatshme të Kishës.

Duke filluar me botimin e 1835-ës, gjithashtu u përfshi një seri prej shtatë mësimesh teologjike; këto u titulluan “Lectures on Faith” (Leksione mbi Besimin). Këto ishin përgatitur për t’u përdorur në Shkollën e Profetëve në Kirtland, Ohio, nga 1834-a deri në 1835-ën. Edhe pse të dobishme për doktrinë dhe udhëzim, këto leksione janë hequr nga Doktrina e Besëlidhje që prej botimit të 1921-shit, sepse ato nuk u dhanë ose nuk u paraqitën si zbulesa për tërë Kishën.

Është e dukshme që disa gabime janë përfshirë në botimet e mëvonshme të botuara në anglisht, veçanërisht në pjesët historike të krerëve të seksioneve. Si pasojë, ky botim përmban korrigjime të datave dhe emrave të vendeve e gjithashtu pak korrigjime të tjera të vogla kurdo që u duk e përshtatshme. Këto ndryshime janë bërë që ta bëjnë materialin të përputhet me dokumentat historike. Tipare të tjera të veçanta të këtij botimi më të fundit përfshijnë përmirësime në referencat-kryq, në kretë e seksioneve dhe në përmbledhjet e temave-çështjeve, që të gjitha të cilat kanë si qëllim t’i ndihmojnë lexuesit të kuptojnë mesazhin e Zotit siç jepet në Doktrina e Besëlidhje dhe të gëzohen me të.

Hyrjet në seksionet e botimit anglisht të Doktrina e Besëlidhje përmbajnë referencat në History of the Church (Historinë e Kishës). History of the Church është një rrëfim historik me shtatë vëllime për Kishën e Jezu Krishtit të Shenjtorëve të Ditëve të Mëvonshme nga 1820-a deri më 1848-ën. Ngaqë këto vëllime nuk janë përkthyer dhe janë në dispozicion vetëm në anglisht, citimet e burimeve nga History of the Church në hyrjet e seksioneve të këtij botimi të Doktrina e Besëlidhje iu referohen vëllimeve në anglisht të kësaj historie.