ປຈສ, 1 ໂກຣິນໂທ 7:1–2, 5, 26, 29–33, 38. ປຽບທຽບໃສ່ກັບ 1 ໂກຣິນໂທ 7:1–2, 5, 26, 29–38
ໂປໂລສອນວ່າ ການແຕ່ງງານເປັນສິ່ງທີ່ໜ້າເພິ່ງປາດຖະໜາ. ເຖິງຢ່າງໃດກໍຕາມ, ຄົນທີ່ຖືກເອີ້ນໃຫ້ເປັນຜູ້ສອນສາດສະໜາ, ຈະຮັບໃຊ້ພຣະເຈົ້າໄດ້ດີກວ່າ ຖ້າເຂົາເຈົ້າຍັງໂສດ ໃນໄລຍະທີ່ເຂົາເຈົ້າປະຕິບັດສາດສະໜາກິດຂອງເຂົາເຈົ້າ.
1 ບັດນີ້ ກ່ຽວກັບສິ່ງທີ່ພວກເຈົ້າໄດ້ຂຽນເຖິງຂ້າພະເຈົ້າ, ບອກວ່າ, ເປັນການດີທີ່ຜູ້ຊາຍບໍ່ແຕະຕ້ອງຜູ້ຍິງ.
2 ເຖິງຢ່າງໃດກໍຕາມ, ຂ້າພະເຈົ້າກ່າວວ່າ ເພື່ອຫລີກເວັ້ນຈາກການຫລິ້ນຊູ້, ຊາຍທຸກຄົນຄວນມີເມຍຂອງຕົນ, ແລະ ຍິງທຸກຄົນກໍຄວນມີຜົວຂອງຕົນ.
5 ຢ່າແຍກກັນຢູ່, ນອກຈາກໄດ້ຕົກລົງກັນກ່ອນເປັນການຊົ່ວຄາວ, ເພື່ອອຸທິດຕົນໃນການຖືສິນອົດເຂົ້າ ແລະ ອະທິຖານ; ແລະ ໃຫ້ກັບມາຢູ່ນຳກັນອີກ, ເພື່ອບໍ່ໃຫ້ຊາຕານມາຊັກຈູງໃຫ້ພວກເຈົ້າຫລົງເຮັດຜິດ.
26 ສະນັ້ນ ຂ້າພະເຈົ້າຈຶ່ງເຫັນວ່າ ມັນເປັນການດີສຳລັບຄວາມລຳບາກທີ່ມີຢູ່ດຽວນີ້, ທີ່ຊາຍຄົນໜຶ່ງຈະຢູ່ຕາມຖານະທີ່ຕົນເປັນຢູ່ ເພື່ອລາວອາດຈະເຮັດຄວາມດີໄດ້ຫລາຍຂຶ້ນ.
29 ແຕ່ຂ້າພະເຈົ້າກ່າວກັບພວກທ່ານທີ່ຖືກເອີ້ນໃຫ້ມາສູ່ການປະຕິບັດສາດສະໜາກິດ. ເພາະຂ້າພະເຈົ້າກ່າວເລື່ອງນີ້, ອ້າຍນ້ອງທັງຫລາຍເອີຍ, ກໍເພາະວ່າເວລາທີ່ເຫລືອຢູ່ກໍສັ້ນເຂົ້າມາແລ້ວ, ທີ່ພວກທ່ານຈະຖືກສົ່ງໄປສູ່ການປະຕິບັດສາດສະໜາກິດ. ເຖິງແມ່ນຜູ້ທີ່ແຕ່ງງານແລ້ວ ກໍໃຫ້ເປັນເໝືອນກັບວ່າຍັງບໍ່ໄດ້ແຕ່ງງານ; ເພາະພວກທ່ານໄດ້ຖືກເອີ້ນ ແລະ ຖືກເລືອກ ໃຫ້ເຮັດວຽກງານຂອງພຣະຜູ້ເປັນເຈົ້າ.
30 ແລະ ກັບຄົນທີ່ຮ້ອງໄຫ້, ກໍເໝືອນກັບວ່າບໍ່ຮ້ອງໄຫ້; ແລະ ກັບຄົນທີ່ປິຕິຍິນດີ, ໃຫ້ເປັນເໝືອນບໍ່ປິຕິຍິນດີ, ແລະ ຄົນທີ່ຊື້, ໃຫ້ເປັນເໝືອນດັ່ງບໍ່ໄດ້ສິ່ງໃດເລີຍ;
31 ແລະ ໃຫ້ຜູ້ທີ່ໃຊ້ສິ່ງຂອງໃນໂລກນີ້, ເປັນເໝືອນກັບວ່າບໍ່ໄດ້ໃຊ້ມັນ; ເພາະລະບົບຂອງໂລກນີ້ ກຳລັງລ່ວງພົ້ນໄປ.
32 ອ້າຍນ້ອງທັງຫລາຍເອີຍ, ແຕ່ຂ້າພະເຈົ້າຢາກໃຫ້ພວກທ່ານຂະຫຍາຍການເອີ້ນຂອງພວກທ່ານ. ຂ້າພະເຈົ້າບໍ່ຢາກໃຫ້ພວກທ່ານກະວົນກະວາຍໃຈ. ເພາະຊາຍທີ່ບໍ່ແຕ່ງງານ, ຈະເປັນຫ່ວງນຳສິ່ງທີ່ເປັນຂອງພຣະຜູ້ເປັນເຈົ້າ, ຈະພະຍາຍາມເຮັດໃຫ້ພຣະຜູ້ເປັນເຈົ້າພໍພຣະໄທ; ສະນັ້ນ ລາວຈຶ່ງໄດ້ຮັບໄຊຊະນະ.
33 ແຕ່ຊາຍທີ່ແຕ່ງງານແລ້ວ, ຈະເປັນຫ່ວງນຳສິ່ງທີ່ເປັນຂອງໂລກ, ຈະພະຍາຍາມເອົາໃຈເມຍຂອງຕົນ; ສະນັ້ນ ມັນຈຶ່ງແຕກຕ່າງ, ເພາະລາວຈະຖືກຂັດຂວາງ.
38 ສະນັ້ນ ຜູ້ໃດທີ່ຍອມຕົນເຂົ້າການແຕ່ງງານ ກໍເຮັດດີຢູ່; ແຕ່ຜູ້ໃດທີ່ບໍ່ຍອມຕົນເຂົ້າການແຕ່ງງານ ກໍເຮັດດີກວ່າ.