25 Ut laj Melkisedek kixtaqsi lix yaab’ xkux ut kirosob’tesi laj Abram.

26 Anajwan laj Melkisedek a’an jun winq re paab’aal, li kik’anjelank re li tiikilal; ut naq toj al kixxuwa ru li Dios, ut kixtz’apeb’ re li kaqkojl, ut kixchup xkawilal li xam.

27 Ut chi jo’kan, chirix k’ulub’aak xb’aan li Dios, kik’ojob’aman jo’ taqenaqil aj tij jo’ chanru lix k’anjelil li sumwank li kixk’uub’ li Dios rik’in laj Enok,

28 A’an jo’ chanru lix k’anjelil li Ralal li Dios; a’ li k’anjelil li kichal, moko xb’aan ta li winq, chi moko li rajom xch’ool li winq; chi moko xb’aan yuwa’b’ej malaj na’b’ej; chi moko xb’aan xtiklajik li kutan chi moko roso’jik li chihab’; a’b’an xb’aan li Dios;

29 Ut kiq’axtesiik reheb’ li winq rik’in li b’oqe’k xb’aan tz’aqal lix yaab’ xkux, jo’ chanru tz’aqal li rajom xch’ool a’an, choq’ reheb’ jo’ k’ihal li ke’paab’ank re lix k’ab’a’.

30 Xb’aan naq li Dios, chirix xaqab’ank aatin chiru laj Enok ut chiruheb’ li riyajil rik’in jun xaqab’anb’il aatin sa’ lix k’ab’a’ ajwi’ a’an; naq li junjunq li k’ojob’anb’ilaq jo’ chanru li k’anjelil ut b’oqok a’in taawanq xwankil, rik’in paab’aal, chixpuk’b’aleb’ li tzuul, chixjachb’aleb’ ru li palaw, chixchaqihob’resinkileb’ li ha’, chirisinkileb’ chaq li ha’ sa’ xb’eheb’;

31 Chixramb’aleb’ li teep aj pleet reheb’ li jar tenamit, chixjachb’al ru li ch’och’, chixtoqb’al li junjunq chi b’ak’leb’, chi xaqliik chiru li Dios; chixb’aanunkil chixjunil li k’a’aq re ru jo’ chanru li rajom xch’ool a’an, jo’ chanru lix taqlahom, chixkub’sinkil xwankileb’ li taqlanelil ut li wankilal; ut a’in xb’aan li rajom xch’ool li Ralal li Dios li kiwan chalen chaq rub’elaj lix k’ojlajik li ruchich’och’.

32 Ut eb’ li winq li ke’wan li paab’aal a’in rik’ineb’, li ke’taqe’ toj sa’ li k’anjelil a’in re li Dios, ke’jaltesiman ru ut ke’k’ame’ taqe’q sa’ choxa.

33 Anajwan ut, laj Melkisedek a’an aj tij re li k’anjelil a’in, jo’kan naq kiru chixtawb’al li tuqtuukilal sa’ Salem, ut li Awa’b’ej re tuqtuukilal kiyeeman re.

34 Ut eb’ lix tenamit ke’xk’anjela li tiikilal, ut ke’ru chixtawb’al li choxa, ut ke’xsik’ lix tenamit laj Enok li kixk’am li Dios junxil chaq, naq kixjach chaq ru rik’in li ruchich’och’, ut kixk’uula chaq choq’ re roso’jikeb’ li kutan, malaj li roso’jik li ruchich’och’;

35 Ut a’an kixye, ut kixxaqab’ rik’in xaqab’anb’il aatin, naq li choxa ut li ruchich’och’ te’junajimanq; ut eb’ li ralal li Dios te’yale’q rix jo’ rik’in xam.

36 Ut laj Melkisedek a’in, chirix xxaqab’ankil li tiikilal, li rey re choxa kiyehe’ re xb’aan lix tenamit, malaj sa’ jalan chik aatin, li Rey re tuqtuukilal.

37 Ut kixtaqsi lix yaab’ xkux, ut kirosob’tesi laj Abram, rik’in naq a’an li taqenaqil aj tij, ut aj ilol re lix k’uuleb’aal kab’l li Dios;

38 Li xaqab’anb’il chaq xb’aan li Dios re xk’ulb’al li lajetqil choq’ reheb’ li neb’a’.

39 Jo’kan ut, laj Abram kixtoj chiru a’an xlajetqil chixjunil li k’a’ru re, xkomon chixjunil li b’ihomal li eechaninb’il xb’aan, li kixk’e chaq li Dios re chi numenaq sa’ xb’een li nak’anjelak re.

40 Ut kik’ulman, naq li Dios kirosob’tesi laj Abram, ut kixk’e re a’an b’ihomal, ut loq’alil, ut eb’ li ch’och’ choq’ jun reechanihom li junelik taakanaaq, jo’ chanru li sumwank li kixk’uub’ chaq, ut jo’ chanru li osob’tesink li ki’osob’tesiik wi’ chaq xb’aan laj Melkisedek.