5 Anajwan ut, chirix xwiib’aleb’ laa walal, laj Efrain ut laj Manases, li ke’yo’la chawu sa’ li ch’och’ Egipto, rub’elaj naq kinwulak aawik’in Egipto; k’e reetal, eb’ a’an weheb’, ut li Dios reheb’ lin yuwa’ taarosob’tesiheb’; jo’ chanru ajwi’ laj Reuben ut aj Simehon te’osob’tesiiq a’an, xb’aan naq weheb’; jo’kan naq k’ab’a’inb’ilaqeb’ jo’ chanru ajwi’ lin k’ab’a’. (Jo’kan naq Israel kiyeeman reheb’.)

6 Ut ani li taayo’laaq aawik’in chirixeb’ a’an, aawehaqeb’, ut k’ab’a’inb’ilaqeb’ jo’ chanru xk’ab’a’eb’ li raseb’ sa’ li reechanihomeb’, sa’eb’ li jar teepal; jo’kan naq lix teepal laj Manases ut laj Efrain kiyeeman reheb’.

7 Ut laj Jakob kixye re laj Jose, Naq li Dios reheb’ lin yuwa’ kixk’utb’esi rib’ chiwu aran Lus, sa’ li ch’och’ Kanahan, kixxaqab’ aatin chiwu, naq tixk’e we laa’in ut re li wiyajil, li ch’och’ choq’ jun eechanihomej li taawanq chi junelik.

8 Jo’kan ut, at walal, a’an kinrosob’tesi sa’ aawaklesinkil chi wank choq’ moos chiwu, rik’in xkolb’al lin junkab’al chiru li kamk;

9 Rik’in xkolb’aleb’ lin tenamit, eb’ laa was aawiitz’in, chiru li we’ej li kiniman chaq sa’ li ch’och’; jo’kan naq li Dios reheb’ laa yuwa’ tatrosob’tesi, ut eb’ li ruuchinihom aajuruch’, re naq osob’tesinb’ilaqeb’ chi taqenaq sa’ xb’eeneb’ laa was aawiitz’in, ut sa’ xb’een lix junkab’al laa yuwa’;

10 Xb’aan naq laa’at katq’axok-u, ut lix junkab’al laa yuwa’ ke’xkub’si rib’ chawu, jo’ chanru ajwi’ kik’utman chaq chawu, rub’elaj naq katk’ayiik toj Egipto xb’aan li ruq’eb’ laa was; jo’kan naq eb’ laa was te’xkub’si rib’ chawu, chiru li junjunq tasal tenamit, chiruheb’ li ruuchinihom aajuruch’ chi junelik;

11 Xb’aan naq laa’at tatwanq choq’ saqen chiru lin tenamit, re xkolb’aleb’ sa’ xkutankil lix preexileb’, chiru li moosil; ut re xk’amb’al chaq li kolb’a-ib’ rik’ineb’, naq chi junajwa k’utzub’anb’ileb’ rub’el li maak.