25 Na Melchizedek maa ne ndze do na ohyiraa Abram.

26 Afei nna Melchizedek yɛ obi a ɔwɔ gyedzi, ɔyɛ tsenenee ndwuma, na aber a ɔyɛ abofra no osuroo Nyame na osiiw ngyata ano na oduum gya n’ahoɔdzen.

27 Na dɛm no, Nyame gyee no too mu no, wɔhyɛɛ no ɔsɔfopanyin wɔ ahyɛmu nhyehyɛɛ a Nyame nye Enoch yɛɛ no mu,

28 Ɔyɛ dza ɔwɔ Nyankopɔn ne Ba no ne nhyehyɛɛ do no, nhyehyɛɛ a ɔbae a, ɔnnam nyimpa do, anaa nyimpa ne pɛ do; nna eso ɔnnam egya anaa nã do, onnyi nda ahyɛse anaa mfe ewiei, mbom ɔnam Nyame do;

29 Na wɔnam ɔnoara ne ndze a ɔdze frɛ do dze maa nyimpa, dɛ mbrɛ ne pɛ tse, dze maa dodowara a wɔgyee ne dzin dzii.

30 Osiandɛ Nyame odzii nankasa no ho nsew dze kãa ntam kyerɛɛ Enoch na n’asefo no; dɛ obiara a wɔbɛhyɛ no sɔfo wɔ nhyehyɛɛ yi na ɔfrɛ yi do no wɔ dɛ onya tum, a ofi gyedzi mu dze bubu mbepɔw, paa po mu, wew esu, daan hɔn fi hɔn kwan do;

31 Dze gyina aman nsordaafo enyim dze hyɛ hɔn fɛr, dze paapaa asaase mu, dze bubu mpokyerɛ biara mu, dze gyina Nyame enyim yɛ ndzɛmba nyinara dɛ mbrɛ ne pɛ tse, dɛ mbrɛ ne nhyɛ tse, akã etumfo na ahoɔdzenfo ahyɛ, na iyi yɛ Nyame ne Ba ne pɛ, nyia ɔwɔ hɔ no ansaana wɔrobɔtow wiadze ne fapem no.

32 Na mbarimba a wonyaa gyedzi yi, na wonyaa Nyame ne nhyehyɛɛ yi, wɔsakyeer hɔn a wɔannsɔ owu na wɔfaa hɔn kɔr sor.

33 Na afei, nna Melchizedek yɛ sɔfo wɔ nhyehyɛɛ yi mu, dɛm ntsi ɔdze asomdwee baa Salem na wɔfrɛɛ no asomdwee Ɔhenbabanyin.

34 Na no nkorɔfo yɛɛ ndwuma tsenenee, na wɔfataa sor, na wɔhwehwɛɛ Enoch kuropɔn a Nyame abɛfa no dadaw no, ɔtseew no fii asaase ho no, ɔdze esie ama nda a odzi ekyir yi, anaa wiadze n’ewiei no;

35 Na ɔsee dɛ, na odzii nsew kãa ho ntam, Dɛ sor na asaase wɔ dɛ wɔkã bɔ mu; na Nyame ne mba wɔ dɛ wɔsɔ hɔn hwɛ, dɛ wɔdze ogya mpo.

36 Na Melchizedek yi, ɔdze tseneneeyɛ bɔbɔɔ adze no, no nkorɔfo frɛɛ no ɔsor hen, anaa, ɔno nye dɛ asomdwee Hen.

37 Na ɔmaa ne ndze do, dɛ ɔyɛ sɔfopanyin na Nyankopɔn n’adzekoradan no hwɛfo, na ohyiraa Abram;

38 Ɔno a Nyame eyi no esi hɔ dɛ ɔngyegye ebupɛn du mfa mma ehiafo.

39 Ɔnam dɛm ntsi Abram tuaa ebupɛn du wɔ dza ɔwɔ nyina, n’ahonyadze nyinara a ɔwɔ, a Nyame dze ama no, dza ɔkyɛn dza ohia.

40 Na ɔbaa no dɛ, Nyame hyiraa Abram, na ɔmaa no ahonyadze, na enyidzi, na nsaase a ɔbɛyɛɛ ne daapem enyadze; dɛ mbrɛ n’ahyɛmu a ɔnye no edzi, na dɛ mbrɛ nhyira a Melchizedek dze hyiraa no no.