Joseph Smith Nkyerɛase a Ɔyɛe Wɔ Bible no mu Nyiyimu no Bi

Dza odzi do yi yɛ nyiyimu mu bi wɔ Joseph Smith Nkyerɛase (JSN) a ɔyɛe wɔ Bible, Ɔhen James dze no. Ewuradze na okenyaan Nkɔnhyɛnyi Joseph Smith dɛ nokwar a ɔwɔ Bible, Ɔhen James dze no nwoma no mu a ayew anaa asesã fitsi asɔpɔkan no a wɔkyerɛɛw nsɛmfua no, ɔnsan mfa mbra. Nokwar yinom a wɔdze asan aba no ama nkyerɛkyerɛ enyim ada hɔ pefee na woetu kyerɛwsɛm ntseasee mu mpon.

Osiandɛ Ewuradze yii nokwar binom a asɔpɔkan nwoma n’akyerɛwfo no dzii kan kyerɛwee no kyerɛɛ Joseph ntsi, Joseph Smith Nkyerɛase no nntse dɛ Bible nkyerɛase nkaa no mu biara a ɔwɔ wiadze yi mu. Ne dɛm ho ntsi, kasafua nkyerɛase a ɔda do no ne ntseasee wɔ akwan soronko a ɔtserɛw mu, osiandɛ Joseph ne nkyerɛase yɛ nyikyerɛ kyɛn dɛ ɔyɛ nkyerɛase ara kɛkɛ a ofi kasa kor mu kɔ kor so mu.

Joseph Smith ne nkyerɛasee a ɔyɛɛ wɔ Bible, Ɔhen James dze no nye Nkyerɛkyerɛ na Ahyɛmudzi mu ɔfã dodowara sɛ anaa wɔakã ho asɛm (hwɛ ɔfã 37, 45, 73, 76, 77, 86, 91, nye 132). Moses nwoma no na Joseph Smith—Matthew so yɛ nsɛm bi a woyii fii Joseph Smith Nkyerɛase no mu.

Sɛ epɛ nsɛm bi so a ɔfa Joseph Smith Nkyerɛasee akã ho a, hwɛ “Joseph Smith Nkyerɛase (JSN)” wɔ Kyerɛwsɛm Kwankyerɛ no mu no.

Mfatoho a odzi do yi kyerɛ nhwɛdo a woeyiyi efi Joseph Smith Nkyerɛase no mu:

JSN, Matthew 4:1, 5–6, 8–9. Fa to Matthew 4:1, 5–6, 8–9 ho; wɔayɛ nsesã a ɔtse dɛm wɔ Luke 4:2, 5–11 mu

Sunsum no na odzi Jesus enyim na nnyɛ Satan bi.

1 Nna Sunsum no dze Jesus kɔr sar no do, dɛ ɔrokɔ Nyame enyim.

5 Nkyii wɔfaa Jesus kɔr kuropɔn krɔnkrɔn no mu, na Sunsum no dze no kesii temple ne bea-sorɔnsorɔm no do.

6 Nkyii abɔnsam baa no hɔ na ɔsee no dɛ, Sɛ ɔwo nye Nyankopɔn ne Ba no a tow wo ho kyen famu, osiandɛ wɔakyerɛw dɛ, Ɔbɛhyɛ n’abɔfoe mbra wɔ wo ho, na wɔbɔsoa wo hɔn nsamu, mma aammfa wo nan ammpem bo da.

8 Na bio, nna Jesus wɔ Sunsum mu, na ɔfaa no kɔr bepɔw tsentsenntsen bi do, na ɔkyerɛɛ no wiadze ahenman nyina, nye no mu enyimnyam.

9 Na abɔnsam no baa no hɔ bio, na ɔsee no dɛ, Yinom nyina na medze mebɛma wo, sɛ ebɔkotow asɔr me a.

Ntõtõho yi a woetsim yie akyerɛw no nye nsɛnsin a ɔwɔ Joseph Smith ne nkyerɛase a ɔyɛe wɔ Ɔhen James ne Bible ho no. Osiandɛ ne nkyerɛase no dze nkasafua a ɔwɔ Bible nwoma no mu sanee bae no, nyiyimu no ne nkanee botum asesã kakra efi wo nwoma dze no ho.

Ntõtõho yi kyerɛ nkyekyɛmu a ɔwɔ wo Bible no mu a ɔwɔ dɛ edze to Joseph Smith nkyerɛase ho.

Nsɛm yi kyerɛ mu fa nkyerɛkyerɛ a Joseph Smith dze ne nkyerɛase buei enyi pefee no.

Iyi nye nwoma no mu nsɛm dɛ mbrɛ Joseph Smith kyerɛɛ ase no. (Wɔdze akyerɛwmba soronko akã ho ama wɔaakyerɛ nsonsonee a ɔda Ɔhen James dze no mu nsɛm mu.)