25 Ao Merekitereka e tabekaa rake bwanaana ma ni kakabwaia Aberam.

26 Ngkai Merekitereka bon te aomata ae onimaki, are kakaraoa ae raoiroi; ao ngke e ataei e mamaka te Atua, ao e kaini wiia raian, ao e tiringa kabuebuen te ai.

27 Ao ngaia are, ngke e tia ni kariaiakaki iroun te Atua, e katabuaki bwa te ibonga ae rietata ni kaineti ma te karinan n te berita ae tabu are karaoia te Atua ma Enoka,

28 Bon katootongan ana waaki Natin te Atua; are te karinan are roko, tiaki mai iroun te aomata; tiaki n nanon te aomata; tiaki mai iroun te tama ke te tina; tiaki man moanakin boong ke tokin ririki; ma mai iroun te Atua;

29 Ao a bon anganaki aomata n te wewete n oin bwanaana, ni kaineti ma oin nanona, nakoia ni kabane ake a kakoaua arana.

30 Bwa te Atua e tia n tuea nakon Enoka ao nakoia kanoana ma te tuea i bon irouna; bwa ni kabane ake a katabuaki nakon te karinan aei ao te wewete a na riai ni iai irouia te mwaaka, man te onimaki, n urui maunga, ni bwenaua marawa, ni kamwaui raan, ni bita kawaia;

31 Ni katukuia bwa a na kakaitara tanga ni buaka n taian aba, ni bwenaua aontano, n urui ni kabane kabaebae, n tei i matan te Atua, ni karaoi bwaai ni kabane ni kaineti ma nanona, ni kaineti ma ana baire, kataenikaia aia tautaeka ueea ao mwaaka; ao aio man nanon Natin te Atua are iai i mwaain karikan te aonaba.

32 Ao aomata ake iai irouia te onimaki aei, ake a nako nakon ana karinan te Atua aei, a bitaki rabwataia ao a uotaki rake nako karawa.

33 Ao ngkai, Merekitereka bon te ibonga n te karinan aei; ngaia are e karekea te rau i Salem, ao e aranaki bwa Natinuean te rau.

34 Ao ana aomata a kakaraoa ae raoiroi, ao a karekea karawa, ao a ukoukora ana kaawa Enoka are e a kaman anaia te Atua, ni kaokoroa man te aonaba, n tia ni kawakinna nakon boong aika kaitira, ke tokin te aonaba;

35 Ao n tia n taku, ao n tuea ma te tuea, bwa karawa ao te aonaba a na ikotaki; ao natin te Atua a na riai ni kataaki kanga n ai aron te ai.

36 Ao Merekitereka aei, ngke e tia ni kateimatoa te raoiroi, e aranaki bwa uean karawa irouia ana aomata, ke, n taeka riki tabeua, te Uea n raoi.

37 Ao e tabeka rake bwanaana, ao e kakabwaia Aberam, kioina ngkai ngaia te ibonga ae rietata, ao te tia kawakina ana bata ni kaikobwai te Atua;

38 Ngaia teuare e tia n rineia te Atua bwa e na butimwaai kabwianibwai ibukia kainnano.

39 Mangaia are, Aberam e kabwaka nakoina kabwianibwaian ni kabane ana bwai, ni kabane kaubwai ake e bwaini, are te Atua e tia n anganna ae raka riki nakon are kainnanoia.

40 Ao e koro bukina, bwa te Atua e kakabwaia Aberam, ao e anga nakoina taian kaubwai, ao te karineaki, ao aaba bwa ana bwai n aki totoki; ni kaineti ma te berita ae tabu are e tia ni karaoia, ao ni kaineti ma te kakabwaia are Merekitereka e tia ni kakabwaia iai.