3 Ut kik’ulman naq laj Abram kixhupub’ rib’, ut kixpatz’ xk’ab’a’ li Qaawa’.

4 Ut li Dios ki’aatinak rik’in, ut kixye: Eb’ lin tenamit ke’xjalb’ehi rib’ rik’in lin na’leb’, ut ink’a’ ke’xpaab’eb’ lin k’ojob’anb’il k’anjel, li keb’ink’e reheb’ lix yuwa’eb’;

5 Ut ink’a’ ke’ab’ink chiru li yuluk inb’aan, ut li muqlaak, malaj li kub’iha’ li keb’intaqla wi’;

6 Ke’xjalb’ehi b’an rib’ rik’in li taqlahom, ut ke’xk’ul sa’ xb’eeneb’ xch’ajb’aleb’ li kok’al, ut li rachb’il kik’;

7 Ut ke’xye naq lix kik’el laj Abel li tiik xch’ool kihoyman choq’ reheb’ li maak; ut moko ke’xnaw ta k’a’ru li wankeb’ wi’ chi teneb’anb’il chiwu.

8 A’ut choq’ aawe, k’e reetal, laa’in tink’uub’ lin sumwank aawik’in, ut laa’aqat jun yuwa’b’ej re k’iila tenamit.

9 Ut li sumwank a’in nink’uub’, naq eb’ laa walal aak’ajol te’nawmanq ru sa’ xyanqeb’ chixjunileb’ li tenamit. Chi moko chik tatk’ab’a’imanq laj Abram, a’b’an laj Abraham tatk’ab’a’imanq; xb’aan naq xatink’e jo’ jun yuwa’b’ej re k’iila tenamit.

10 Ut tatink’e jo’ q’axal aj uuchinel, ut tenamit teb’inyo’ob’tesi aawik’in, ut te’chalq chaq awa’b’ej aawik’in, ut rik’in laa wiyajil.

11 Ut laa’in tinxaqab’ jun sumwank aawik’in re xsetb’al xtz’uumal li tz’ejwalej, ut taawanq choq’ insumwank wik’in laa’in ut aawik’in laa’at, ut eb’ laa wiyajil chawix, chiru jar tasal lix tenamiteb’; re naq taanaw chi junelik naq eb’ li kok’al moko wankeb’ ta chi teneb’anb’il chiwu toj reetal naq waqxaqib’ chihab’ xyu’ameb’.

12 Ut taak’e aach’ool chixpaab’ankil chixjunil li sumwank li kin’ok wi’ sa’ sumwank rik’ineb’ laa yuwa’; ut taapaab’eb’ li taqlahom li kink’e aawe rik’in tz’aqal lix tz’uumal we, ut laa’in tinwanq choq’ Dios chawu laa’at ut laa wiyajil moqon chawix.

23 Toja’ naq laj Abraham kixhupub’ rib’ ut kisaho’ xch’ool, ut kixye sa’ xch’ool, Taayo’laaq jun alalb’ej chiru li jun cient chihab’ xyu’am, ut li xSara li lajeeb’ ro’k’aal chihab’ xyu’am taa’alanq.

24 Ut laj Abraham kixye re li Dios, Chiwanq taxaq laj Ismael chi tiik xch’ool chawu!