5 Ao ngkai, ni kaineti ma natim mwaane ake uoman, Eberaim ao Manate, ake a bungiaki nakoim n te aba ae Aikubita, i mwaain ae I roko nakoim i Aikubita; nooria, bon au bwai, ao Atuaia au bakatibu e na kakabwaiaia, n ai aroia naba Reuben ao Timeon a na kakabwaiaki, bwa bon au bwai; mangaia are a na ingoanaki n arau. (Ngaia are a bon aranaki bwa Iteraera.)

6 Ao natim ake a bungiaki imwiia, bon am bwai, ao a na ingoanaki n araia tariia n rikiaia, n taian baronga, ngaia are a bon aranaki bwa ana baronga Manate ao Eberaim.

7 Ao Iakobwa e taku nakon Iotebwa, Ngke Atuaia au bakatibu e kaoti nakoiu i Ruti, n te aba are Kanaan, e tuea nakoiu, bwa e na anganai, ao nakoia kanoau, te aba bwa aia bwai n aki totoki.

8 Ngaia are, O natiu, e tia ni kakabwaiaai ni kaikawaiko bwa ko na riki bwa te tia mwakuri ibukiu, ni kamaiua batau man te mate;

9 Ni kainaomatakiia au aomata, aika tarim, man te rongo are e kakaiaki n te aba, mangaia are Atuaia am bakatibu e na kakabwaiako, ao uaan biritom, bwa a na kakabwaiaki i aoia riki tarim, ao i aoia riki batan tamam.

10 Bwa ko a tia n tokanikai, ao batan tamam a tia ni bobaraki nakoim, n aron are e kaotaki nakoim i mwaain ae kabonakoaki nako Aikubita ni baia tarim; mangaia are tarim a na bobaraki nakoim, man te roro teuana nakon te roro teuana, nakoia uaan biritom n aki totoki.

11 Bwa ko na riki bwa te oota nakoia au aomata, ni kamaiuia n aia bong n tautaekanaki, man te tautoronaki; ao ni karokoa te kamaiuaki nakoia, ngke a bane ni bwaokoko i aan te bure.