5 Ket ita, dagiti dua nga annakmo a lallaki, a da Efraim ken Manases, a naitao kenka iti daga ti Egipto, sakbay nga immayak kenka idiay Egipto; imutektekam, kukuak ida, ket bendisionan ida ti Dios dagiti ammak; a kas kada Ruben ken Simeon mabendisionandanto, ta kukuak ida; gapuna maawagandanto iti naganko. (Naawaganda ngarud iti Israel.)

6 Ket dagiti putotem a maud-udi ngem dagitoy, kukuamto ida, ket maawagandanto iti nagan dagiti kabsatda nga agtawid, kadagiti tribu; ngarud managanandanto iti tribu ni Manases ken ni Efraim.

7 Ket kinuna ni Jacob ken ni Jose, Idi nagparang kaniak ti Dios dagiti ammak idiay Luza, iti daga ti Canaan; nagsapata kaniak, nga itedna kaniak, ken kadagiti bukelko, ti daga nga agnanayon a sanikuami.

8 Ngarud, O anakko, binendisionannak iti panangpatanurko kenka nga agbalin a katulongak, iti panangisalakanko iti balayko iti patay;

9 Iti panangisalakanko kadagiti taok, dagiti kakabsatmo, iti bisin a nakaro iti daga; gapuna a ti Dios dagiti ammam bendisionannaka, ken dagiti bunga ti lomom, tapno nasaysayaat ti pannakabendisionda ngem dagiti kabsatmo, ken iti balay ti amam;

10 Ta nagballigika, ket nagtamed kenka ti balay ti amam, a kas iti naipakita kenka, sakbay nga inlakodaka dagiti kakabsatmo idiay Egipto; gapuna agtamedto kenka dagiti kakabsatmo, iti kada kaputotan, iti bunga ti lomom iti agnanayon;

11 Ta sikanto ti silaw dagiti taok, a mangruk-at kadakuada kadagiti aldaw a pannakabaludda, iti pannakaadipenda; ken mangyeg iti pannakaisalakanda, iti panagtamedda amin iti basol.