24 Ut laj Jose kixye reheb’ li rech alal, Kamk we, ut xik we rik’ineb’ lin yuwa’; ut xik we sa’ lin muqleb’aal rik’in sahil ch’oolejil. Li Dios re lin yuwa’ aj Jakob chiwanq eerik’in, re eekolb’al chaq sa’ ch’a’ajkilal sa’ xkutankil lee moosil; xb’aan naq li Qaawa’ xinrula’ani, ut kintaw jun xyeechi’ihom li Qaawa’, naq rik’ineb’ chaq li ruuchinihom injuruch’, li Qaawa’ tixwaklesi jun ruq’ che’ tiik xch’ool chalen chaq injuruch’; ut choq’ eere laa’ex, li k’ab’a’inb’ilex Israel xb’aan lin yuwa’ aj Jakob, jun profeet; (maawa’aq li Mesias, a’an laj Xiloh yeeb’il re;) ut li profeet a’in tixkol chaq lin tenamit chiru Egipto sa’ xkutankil lee moosil.

25 Ut taak’ulmanq naq te’jek’imanq wi’chik, ut taatoqe’q jun ruq’ che’, ut taak’ame’q sa’ jun najtil ch’och’; a’b’anan te’wanq chi jultikanb’il sa’eb’ lix sumwank li Qaawa’, naq taak’ulunq li Mesias; xb’aan naq a’an taak’utb’esimanq chiruheb’ sa’ roso’jik li kutan, sa’ li Musiq’ej re wankilal; ut taarisiheb’ chaq sa’ q’ojyin toj chi saqenkil; sa’ chaq li muqmuukil q’ojyin, ut sa’ chaq li preexil toj sa’ li ach’ab’aak.

26 Jun aj ilol na’leb’ li Qaawa’ lin Dios tixwaklesi, li taawanq choq’ aj ilol na’leb’ sik’b’il ru choq’ reheb’ li ruuchinihom injuruch’.

27 Jo’ka’in naxye we li Qaawa’ Dios reheb’ lin yuwa’, Jun aj ilol na’leb’ sik’b’il ru tinwaklesi chaq sa’ xyanqeb’ li ruuchinihom aajuruch’, ut a’an q’axal taataqsiiq xwankil sa’ xyanqeb’ li ruuchinihom aajuruch’; ut re a’an tink’e xtaqlankil naq tixb’aanu jun li k’anjel choq’ reheb’ li ras riitz’in, li ruuchinihom aajuruch’.

28 Ut a’an tixk’ameb’ chixnawb’al li sumwank li kink’uub’ rik’ineb’ laa yuwa’; ut a’an tixb’aanu jo’ k’ihal li k’anjel tintaqla wi’.

29 Ut tinnimob’resi ru sa’ wilob’aal, xb’aan naq a’an tixb’aanu lin k’anjel; ut nimaq ru a’an chanchan li kinye eere naq tinwaklesi choq’ eere, re xkolb’al lin tenamit, ex xjunkab’al laj Israel, chiru chaq li ch’och’ Egipto; xb’aan naq jun aj ilol na’leb’ tinwaklesi re xkolb’al chaq lin tenamit chiru li ch’och’ Egipto; ut a’anaq aj Moises taayeemanq re. Ut rik’in li k’ab’a’ej a’in tixnaw naq a’an xkomon laa junkab’al; xb’aan naq taach’olaniiq xb’aan lix rab’in li rey, ut xyum a’an taayeemanq re.

30 Ut jo’kan wi’chik, jun aj ilol na’leb’ tinwaklesi sa’ xyanqeb’ chaq li ruuchinihom aajuruch’, ut re a’an tink’e wankilal re xk’eeb’al chi k’utmank li waatin chiruheb’ li riyajil aajuruch’; ut moko ka’aj ta wi’ re xk’eeb’al chi k’utmank li waatin, chan li Qaawa’, re aj b’an wi’ xq’unb’esinkileb’ xch’ool chirix li waatin, li akaq elenaq sa’ xyanqeb’ sa’ roso’jik li kutan;

31 Jo’kan naq eb’ li ruuchinihom aajuruch’ te’tz’iib’aq, ut li ruuchinihom xjuruch’ laj Juda te’tz’iib’aq; ut li k’a’ru tz’iib’anb’ilaq xb’aan li ruuchinihom aajuruch’, ut jo’kan ajwi’ li k’a’ru tz’iib’anb’ilaq xb’aan li ruuchinihom xjuruch’ laj Juda, te’nimanq ut te’xjunaji rib’ choq’ re xsachb’al li b’alaq’il tzol’leb’, ut xkub’sinkil li wech’ok-ib’, ut xxaqab’ankil li tuqtuukilal sa’ xyanqeb’ li ruuchinihom aajuruch’, ut xk’amb’aleb’ chixnawb’al chirix lix yuwa’eb’ sa’ roso’jikeb’ li kutan; ut chixnawb’al ajwi’ chirix lin sumwank, chan li Qaawa’.

32 Ut sa’ xyi chaq xq’unal lix metz’ew a’an taakawob’resiiq xmetz’ew, sa’ li kutan naq taaxik lin k’anjel sa’ xyanqeb’ chixjunil lin tenamit, li te’k’ojob’aaq wi’ li ani wankeb’ sa’ lix junkab’al laj Israel, sa’ roso’jikeb’ li kutan.

33 Ut laj ilol na’leb’ a’an tinwosob’tesi, ut eb’ li neke’sik’ok re xsachb’al te’sache’q xna’leb’; xb’aan naq laa’ex texjultiko’q we chiru li junjunq tasal tenamit; ut a’an aj Jose taak’ab’a’imanq, ut a’anaq ajwi’ xk’ab’a’ lix yuwa’; ut a’an chanchanaq ajwi’ jo’ laa’at; xb’aan naq li k’a’ru tixk’e li Qaawa’ chi k’ute’k rik’in li ruq’ tixk’am lin tenamit sa’ li kolb’a-ib’.

34 Ut li Qaawa’ kixxaqab’ aatin chiru laj Jose naq tixkol rix li riyajil chi junelik, ut kixye, Tinwaklesi laj Moises, ut jun xuq’ taawanq sa’ ruq’, ut a’an tixch’utub’eb’ lin tenamit, ut tixk’ameb’ xb’e jo’ jun teep chi karneer, ut tixsak’ xha’il li Kaqi Palaw rik’in lix xuq’.

35 Ut taawanq raqb’a-aatin rik’in, ut tixtz’iib’a li raatin li Qaawa’. Ut ink’a’ tixye k’iila aatin, xb’aan naq laa’in tintz’iib’a lin chaq’rab’ choq’ re rik’in ru’uj tz’aqal li wuq’. Ut tinxaqab’ jun aj yehol aatin choq’ re, ut a’an aj Aaron taak’ab’a’imanq.

36 Ut taab’aanumanq aawe sa’ ajwi’ roso’jik li kutan, jo’ chanru ajwi’ kinxaqab’ aatin. Jo’kan naq laj Jose kixye reheb’ li ras riitz’in, li Dios texrula’ani chi yaal, ut texrisi chaq sa’ li ch’och’ a’in, toj sa’ li ch’och’ li kixxaqab’ wi’ aatin xk’eeb’al choq’ re laj Abraham, ut choq’ re laj Isaak, ut re laj Jakob.

37 Ut laj Jose kixch’olob’ k’iila k’a’aq re ru chik reheb’ li ras riitz’in, ut kixk’e chixxaqab’eb’ aatin li ralal xk’ajol laj Israel, kixye reheb’, li Dios texrula’ani chi yaal, ut laa’ex teek’am lin b’aqel chalen chaq arin.

38 Chi jo’kan kikam laj Jose naq jun cient rik’in lajeeb’ chihab’ xyu’am; ut ke’xyul rik’in sununkil b’an ut ke’xk’e sa’ xkaxonil kamenaq sa’ Egipto, ut ink’a’ kimuqe’ xb’aaneb’ li ralal xk’ajol laj Israel, re naq taak’ame’q ut taak’ojob’amanq sa’ li muqleb’aal kamenaq rik’in lix yuwa’. Ut chi jo’kan kijultiko’ reheb’ li xaqab’anb’il aatin li ke’xxaqab’ wi’ aatin rik’in.