ປຈສ, ປະຖົມມະການ 50:24–38. ປຽບທຽບໃສ່ກັບ ປະຖົມມະການ 50:24–26; 2 ນີໄຟ 3:4–22
ໂຢເຊັບໃນເອຢິບ ທຳນາຍກ່ຽວກັບໂມເຊປົດປ່ອຍຊາວອິດສະຣາເອນຈາກຄວາມເປັນທາດຂອງຊາວເອຢິບ; ກ່ຽວກັບກິ່ງງ່າຂອງລູກຫລານຂອງໂຢເຊັບ ຖືກນຳໄປສູ່ແດນໄກ, ບ່ອນທີ່ພວກເຂົາຈະຖືກຈື່ຈຳໃນພັນທະສັນຍາຂອງພຣະຜູ້ເປັນເຈົ້າ; ກ່ຽວກັບພຣະເຈົ້າເອີ້ນສາດສະດາໃນຍຸກສຸດທ້າຍຊື່ໂຈເຊັບໃຫ້ຕໍ່ບັນທຶກຂອງຢູດາ ແລະ ຂອງໂຢເຊັບ ເຂົ້າກັນ; ແລະ ກ່ຽວກັບອາໂຣນຮັບໃຊ້ເປັນຜູ້ກ່າວແທນໂມເຊ.
24 ແລະ ໂຢເຊັບໄດ້ກ່າວກັບອ້າຍນ້ອງຂອງລາວວ່າ, ຂ້ອຍຕາຍ, ແລະ ໄປຫາບັນພະບຸລຸດຂອງຂ້ອຍ; ແລະ ຂ້ອຍລົງໄປສູ່ຫລຸມສົບຂອງຂ້ອຍດ້ວຍຄວາມຊື່ນຊົມ. ພຣະເຈົ້າຂອງຢາໂຄບ ບິດາຂອງຂ້ອຍ ຈະຢູ່ກັບພວກເຈົ້າ, ເພື່ອປົດປ່ອຍພວກເຈົ້າຈາກຄວາມທຸກຍາກລຳບາກ ໃນວັນເວລາແຫ່ງຄວາມເປັນທາດຂອງພວກເຈົ້າ; ເພາະພຣະຜູ້ເປັນເຈົ້າໄດ້ມາຢ້ຽມຢາມຂ້ອຍ, ແລະ ຂ້ອຍໄດ້ຮັບຄຳສັນຍາຈາກພຣະຜູ້ເປັນເຈົ້າ, ວ່າຈາກຜົນແອວຂອງຂ້ອຍ, ອົງພຣະຜູ້ເປັນເຈົ້າຈະຍົກກິ່ງງ່າທີ່ຊອບທຳຂອງຜົນແອວຂອງຂ້ອຍຂຶ້ນມາ; ແລະ ກັບພວກເຈົ້າ, ຜູ້ຊຶ່ງຢາໂຄບ ບິດາຂອງຂ້ອຍໄດ້ຕັ້ງຊື່ວ່າ ອິດສະຣາເອນ, ຈະຍົກສາດສະດາຜູ້ໜຶ່ງຂຶ້ນ; (ບໍ່ແມ່ນພຣະເມຊີອາ ຜູ້ທີ່ຖືກເອີ້ນວ່າ ຊີໂລ;) ແລະ ສາດສະດາຜູ້ນີ້ຈະປົດປ່ອຍຜູ້ຄົນຂອງເຮົາອອກຈາກເອຢິບ ໃນວັນເວລາແຫ່ງຄວາມເປັນທາດຂອງພວກເຈົ້າ.
25 ແລະ ເຫດການຈະບັງເກີດຂຶ້ນຄື ພວກເຂົາຈະກະຈັດກະຈາຍໄປອີກ; ແລະ ກິ່ງງ່າໜຶ່ງຈະຖືກຫັກອອກໄປ, ແລະ ຈະຖືກພາໄປຫາປະເທດທີ່ຢູ່ໃນແດນໄກ; ເຖິງຢ່າງໃດກໍຕາມ ພວກເຂົາຈະຖືກຈົດຈຳໄວ້ໃນພັນທະສັນຍາຂອງພຣະຜູ້ເປັນເຈົ້າ, ເວລາພຣະເມຊີອາສະເດັດມາ; ເພາະພຣະອົງຈະຖືກສະແດງໃຫ້ປະຈັກແກ່ພວກເຂົາໃນຍຸກສຸດທ້າຍ, ດ້ວຍພຣະວິນຍານແຫ່ງອຳນາດ; ແລະ ຈະນຳພວກເຂົາອອກຈາກຄວາມມືດ ເຂົ້າສູ່ຄວາມສະຫວ່າງ; ອອກຈາກຄວາມມືດທີ່ປິດບັງ, ແລະ ອອກຈາກຄວາມເປັນຊະເລີຍໄປຫາອິດສະລະ.
26 ພຣະຜູ້ເປັນເຈົ້າອົງເປັນພຣະເຈົ້າຂອງຂ້າພະເຈົ້າ ຈະຍົກຜູ້ພະຍາກອນຜູ້ໜຶ່ງຂຶ້ນມາໃຫ້ແກ່ຜົນແອວຂອງຂ້າພະເຈົ້າ ຊຶ່ງຈະເປັນຜູ້ພະຍາກອນທີ່ປະເສີດ.
27 ອົງພຣະຜູ້ເປັນເຈົ້າຂອງບັນພະບຸລຸດຂອງຂ້າພະເຈົ້າ ໄດ້ກ່າວກັບຂ້າພະເຈົ້າດັ່ງນີ້: ເຮົາຈະຍົກຜູ້ພະຍາກອນທີ່ປະເສີດຜູ້ໜຶ່ງຂຶ້ນຈາກຜົນແອວຂອງເຈົ້າ. ແລະ ລາວຈະເປັນຜູ້ທີ່ໜ້ານັບຖືຢ່າງສູງໃນບັນດາຜົນແອວຂອງເຈົ້າ; ແລະ ເຮົາຈະໃຫ້ບັນຍັດແກ່ລາວເພື່ອລາວຈະໄດ້ກະທຳວຽກງານສິ່ງໜຶ່ງເພື່ອຜົນແອວຂອງເຈົ້າ, ຜູ້ເປັນພີ່ນ້ອງຂອງລາວ.
28 ແລະ ລາວຈະນຳພວກເຂົາມາສູ່ຄວາມຮູ້ຂອງພັນທະສັນຍາ ຊຶ່ງເຮົາໄດ້ເຮັດໄວ້ກັບບັນພະບຸລຸດຂອງເຈົ້າ; ແລະ ລາວຈະເຮັດວຽກງານໃດກໍຕາມທີ່ເຮົາຈະບັນຊາລາວ.
29 ແລະ ເຮົາຈະເຮັດໃຫ້ລາວຍິ່ງໃຫຍ່ໃນສາຍຕາຂອງເຮົາ; ເພາະລາວຈະເຮັດວຽກງານຂອງເຮົາ; ແລະ ລາວຈະຍິ່ງໃຫຍ່ເໝືອນຜູ້ທີ່ເຮົາໄດ້ກ່າວວ່າ ເຮົາຈະຍົກຂຶ້ນໃຫ້ເຈົ້າ, ເພື່ອປົດປ່ອຍຜູ້ຄົນຂອງເຮົາ, ໂອ້ ເຊື້ອສາຍອິດສະຣາເອນ, ອອກຈາກແຜ່ນດິນເອຢິບ; ເພາະເຮົາຈະຍົກຜູ້ພະຍາກອນຜູ້ໜຶ່ງຂຶ້ນ ເພື່ອປົດປ່ອຍຜູ້ຄົນຂອງເຮົາອອກຈາກແຜ່ນດິນເອຢິບ; ແລະ ລາວຈະຖືກເອີ້ນວ່າ ໂມເຊ. ແລະ ໂດຍຊື່ຂອງລາວ, ລາວຈະຮູ້ວ່າ ລາວເປັນເຊື້ອສາຍຂອງເຈົ້າ; ເພາະລາວຈະໄດ້ຮັບການລ້ຽງດູໂດຍທິດາຂອງກະສັດ, ແລະ ຈະຖືກເອີ້ນວ່າເປັນບຸດຊາຍຂອງນາງ.
30 ແລະ ອີກເທື່ອໜຶ່ງ, ເຮົາຈະຍົກຜູ້ພະຍາກອນຜູ້ໜຶ່ງຂຶ້ນຈາກຜົນແອວຂອງເຈົ້າ; ແລະ ເຮົາຈະໃຫ້ອຳນາດແກ່ລາວ ເພື່ອຈະນຳຄຳເວົ້າຂອງເຮົາອອກມາສູ່ລູກຫລານຂອງຜົນແອວຂອງເຈົ້າ; ແລະ ບໍ່ພຽງແຕ່ເພື່ອການນຳຄຳເວົ້າຂອງເຮົາອອກມາເທົ່ານັ້ນ, ພຣະຜູ້ເປັນເຈົ້າໄດ້ກ່າວ, ແຕ່ຈະເຮັດໃຫ້ພວກເຂົາໝັ້ນໃຈໃນຄຳເວົ້າຂອງເຮົາ, ຊຶ່ງຈະອອກໄປໃນບັນດາພວກເຂົາແລ້ວໃນຍຸກສຸດທ້າຍ;
31 ດັ່ງນັ້ນ, ຜົນແອວຂອງເຈົ້າຈະບັນທຶກ; ແລະ ຜົນແອວຂອງຢູດາຈະບັນທຶກ; ແລະ ເລື່ອງທີ່ຈະຖືກບັນທຶກໄວ້ໂດຍຜົນແອວຂອງເຈົ້າ, ແລະ ເລື່ອງທີ່ຈະຖືກບັນທຶກໄວ້ຈາກຜົນແອວຂອງຢູດາຈະເຕີບໂຕພ້ອມກັນ, ຊຶ່ງນຳໄປຫາການເຮັດໃຫ້ຄຳສອນທີ່ຜິດນັ້ນຍອມຈຳນົນ ແລະ ກຳຈັດການຂັດແຍ້ງ, ແລະ ສະຖາປະນາສັນຕິສຸກໃນບັນດາຜົນແອວຂອງເຈົ້າ, ແລະ ນຳພວກເຂົາມາສູ່ຄວາມຮູ້ເຖິງບັນພະບຸລຸດຂອງພວກເຂົາໃນຍຸກສຸດທ້າຍ, ແລະ ນຳມາສູ່ຄວາມຮູ້ເລື່ອງພັນທະສັນຍາຂອງເຮົາ, ພຣະຜູ້ເປັນເຈົ້າໄດ້ກ່າວ.
32 ແລະ ຈາກຄວາມອ່ອນແອ ລາວຈະຖືກເຮັດໃຫ້ເຂັ້ມແຂງຂຶ້ນ, ໃນວັນນັ້ນເມື່ອວຽກງານຂອງເຮົາຈະອອກໄປໃນບັນດາຜູ້ຄົນທັງປວງຂອງເຮົາ, ຊຶ່ງຈະນຳພວກເຂົາກັບຄືນ, ຜູ້ເປັນເຊື້ອສາຍອິດສະຣາເອນ, ໃນຍຸກສຸດທ້າຍ.
33 ແລະ ເຮົາຈະອວຍພອນຜູ້ພະຍາກອນຜູ້ນັ້ນ, ແລະ ຜູ້ທີ່ພະຍາຍາມທຳລາຍລາວຈະຍອມຈຳນົນ; ເພາະຄຳສັນຍານີ້ເຮົາມອບໃຫ້ເຈົ້າ; ເພາະເຮົາຈະຈື່ຈຳເຈົ້າຈາກລຸ້ນສູ່ລຸ້ນ; ແລະ ຊື່ຂອງລາວຈະຖືກເອີ້ນວ່າ ໂຈເຊັບ, ແລະ ຈະເປັນຕາມຊື່ຂອງບິດາຂອງລາວ; ແລະ ລາວຈະເປັນເໝືອນດັ່ງເຈົ້າ; ເພາະເລື່ອງທີ່ພຣະຜູ້ເປັນເຈົ້າຈະນຳອອກມາໂດຍມືຂອງລາວ ຈະນຳຜູ້ຄົນຂອງເຮົາໄປສູ່ຄວາມລອດ.
34 ແລະ ພຣະຜູ້ເປັນເຈົ້າໄດ້ສາບານກັບໂຢເຊັບວ່າ ພຣະອົງຈະຮັກສາລູກຫລານຂອງລາວຕະຫລອດໄປ, ໂດຍກ່າວວ່າ, ເຮົາຈະຍົກໂມເຊຂຶ້ນ, ແລະ ໄມ້ຄ້ອນເທົ້າຈະຢູ່ໃນມືຂອງລາວ, ແລະ ລາວຈະເຕົ້າໂຮມຜູ້ຄົນຂອງເຮົາ, ແລະ ລາວຈະນຳພາພວກເຂົາໄປດັ່ງຝູງແກະ, ແລະ ລາວຈະຕີຜືນນ້ຳທະເລແດງດ້ວຍໄມ້ຄ້ອນເທົ້າຂອງລາວ.
35 ແລະ ລາວຈະໄດ້ຮັບການພິພາກສາ, ແລະ ຈະຂຽນພຣະຄຳຂອງພຣະຜູ້ເປັນເຈົ້າ. ແລະ ລາວຈະບໍ່ເວົ້າຫລາຍ, ເພາະເຮົາຈະຂຽນກົດຂອງເຮົາໃຫ້ລາວດ້ວຍນິ້ວມືຂອງເຮົາເອງ. ແລະ ເຮົາຈະໃຫ້ມີຜູ້ເວົ້າແທນລາວ, ແລະ ຊື່ຂອງລາວຈະຖືກເອີ້ນວ່າ ອາໂຣນ.
36 ແລະ ສິ່ງນີ້ຈະເກີດຂຶ້ນກັບເຈົ້າໃນຍຸກສຸດທ້າຍຄືກັນ, ແມ່ນແຕ່ດັ່ງທີ່ເຮົາໄດ້ສາບານໄວ້. ສະນັ້ນ, ໂຢເຊັບໄດ້ກ່າວກັບອ້າຍນ້ອງຂອງລາວວ່າ ພຣະເຈົ້າຈະມາຢ້ຽມຢາມພວກເຈົ້າຢ່າງແນ່ນອນ, ແລະ ນຳພວກເຈົ້າອອກຈາກແຜ່ນດິນນີ້, ໄປຫາແຜ່ນດິນທີ່ພຣະອົງສາບານວ່າຈະປະທານໃຫ້ແກ່ອັບຣາຮາມ, ແລະ ໃຫ້ແກ່ອີຊາກ, ແລະ ໃຫ້ແກ່ຢາໂຄບ.
37 ແລະ ໂຢເຊັບໄດ້ຢືນຢັນຫລາຍເລື່ອງອື່ນອີກກັບອ້າຍນ້ອງຂອງລາວ, ແລະ ໄດ້ໃຫ້ລູກຫລານຂອງອິດສະຣາເອນກ່າວຄຳປະຕິຍານ, ໂດຍກ່າວຕໍ່ພວກເຂົາວ່າ ພຣະເຈົ້າຈະມາຢ້ຽມຢາມພວກເຈົ້າຢ່າງແນ່ນອນ, ແລະ ພວກເຈົ້າຈະເອົາກະດູກຂອງຂ້ອຍໄປຈາກບ່ອນນີ້.
38 ສະນັ້ນ ໂຢເຊັບໄດ້ເສຍຊີວິດໄປຕອນມີອາຍຸໄດ້ໜຶ່ງຮ້ອຍສິບປີ; ແລະ ພວກເຂົາໄດ້ອາບນ້ຳຢາຮັກສາລາວໄວ້, ແລະ ພວກເຂົາໄດ້ຮັກສາສົບຂອງລາວໄວ້ໃນໂລງສົບ ໃນປະເທດເອຢິບ; ແລະ ລູກຫລານຂອງອິດສະຣາເອນໄດ້ຮັກສາສົບຂອງລາວໄວ້ຈາກການຝັງ, ເພື່ອວ່າລາວຈະຖືກນຳໄປຝັງໄວ້ໃນອຸບມຸງກັບບິດາຂອງລາວ. ແລະ ດັ່ງນັ້ນ ພວກເຂົາໄດ້ຈື່ຈຳຄຳສາບານຂອງພວກເຂົາ ທີ່ພວກເຂົາໄດ້ສາບານໄວ້ກັບລາວ.