24 Ao Iotebwa e taku nakoia tarina, N na mate, ao N na nako nakoia au bakatibu, ao N na ruo nakon ruanimateu ma te kimwareirei. Atuan tamau ae Iakobwa e na raoni ngkami, ni kaotinakoi ngkami man rawawata ni bongin tautoronakimi; bwa te Uea e a tia ni kawarai, ao I a tia ni karekea ana berita te Uea, bwa man uaan biritou, te Uea ae te Atua e na kateirakea te mwanga ae raoiroi man biritou; ao nakoim, ngke are e tia tamau Iakobwa n araniko bwa Iteraera, te burabeti, (tiaki te Mesia are e aranaki bwa Shilo;) ao te burabeti aei e na kaotinakoia au aomata mai Aikubita n bongin tautoronakimi.

25 Ao e na koro bukina bwa a na manga kamaenakoaki; ao te mwanga teuana e na oteaki, ao e na uotaki nakon te aba ae raroa nako, e ngae n anne a na uringaki n ana berita aika tabu te Uea, ngkana e roko te Mesia, bwa e na kaotaki nakoia ni bong aika kaitira, n te Tamnei ae mwaaka, ao e na kaotinakoia man te rotongitong nakon te ota, man te rotongitong ae raba, ao man te tautaekanaki nakon te inaomata.

26 Te Uea ae Atuau e na kateirakea te tia mamata, are e na riki bwa te tia mamata ae rine nakoia uaan biritou.

27 E taku te Uea ae Atuaia au bakatibu nakoiu, N na kateirakea te tia mamata ae rine man uaan biritom, ao e na korakora karineakina i buakoia uaan biritom; ao nakoina N na angana te tua bwa e na karaoa te mwakuri ibukiia uaan biritom, aika tarina.

28 Ao e na kairiia nakon atakin berita aika tabu ake I tia ni karaoi ma am bakatibu; ao e na karaoi nako mwakuri ake N na tuangnga.

29 Ao N na karikia bwa e na kakannato imatau, bwa e na karaoa au mwakuri; ao e na kakannato n aron teuare I tia n taku bwa N na kateirakea nakoimi, bwa e na kairiia au botanaomata, O te bata are Iteraera, man te aba ae Aikubita; bwa N na kateirakea te tia mamata bwa e na kairiia au botanaomata ni kaotinakoia man te aba ae Aikubita; ao e na aranaki bwa Mote. Ao man te ara aei e na ataia bwa ngaia bon man batam; bwa e na kaikawaaki iroun natin te uea te aine, ao e na aranaki bwa natina te mwaane.

30 Ao teuana riki, N na kateirakea te tia mamata man uaan biritom, ao nakoina N na anganna te mwaaka ni kaoti au taeka nakoia kanoan biritom; ao tiaki ti ibukin kaotakin au taeka, e taku te Uea, ma e na karekea irouia kakoauaan au taeka, are e na kaman tia n roko ibukoia ni boong aika kaitira.

31 Mangaia are uaan biritom a na koroia, ao uaan biriton Iuta ana koroia, ao te bwai are e na koreaki irouia uaan biritom, ao are e na koreaki naba irouia uaan biriton Iuta, a na uaia n rikirake nakon kaotan kairuan reirei aika a kewe, ao ni katoki itabarara, ao ni karekea te rau imarenaia uaan biritom, ao ni kairiia nakon ataakin aia bakatibu ni boong aika kaitira; ao nakon naba ataakin au berita aika tabu, e taku te Uea.

32 Ao man te mamara e na kakorakoraki, n te bong are e na wakinaki iai au mwakuri i buakoia ni kabane au botanaomata, are e na kaokiia, ake kaain te bata are Iteraera, ni boong aika kaitira.

33 Ao te tia mamata anne N na kakabwaia, ao naake a ukoukora kamaunaana a na bon katokaki, bwa aei te berita ae I anga nakoim; bwa N na ururingko man te roro teuana nakon te roro teuana, ao arana e na aranaki bwa Iotebwa, ao e na bon ingoanaki n aran tamana, ao e na katootongko, bwa te bwai are e na kaotia te Uea ni baina e na uotiia au botanaomata nakon te kamaiuaki.

34 Ao te Uea e tuea nakon Iotebwa bwa e na kawakiniia kanoana n aki totoki, ni kangai, N na karikirakea Mote, ao e na iai te kai inanon baina, ao e na bobotia ni ikotia au botanaomata, ao e na kairiia n aron te nanai, ao e na orea ranin Taari are Uraura ma ana kai.

35 Ao e na iai irouna te motikitaeka, ao e na korea ana taeka te Uea. Ao e na aki taekin taeka aika mwaiti, bwa N na korea nakoina au tua n oin taboni baiu. Ao N na karekea te tia taetae ibukina, ao arana e na aranaki ba Aaron.

36 Ao e na karaoaki nakoim naba ni boong aika kaitira, n aron ae I tia n tuea. Ngaia are, e taku Iotebwa nakoia tarina, e koaua ae na kawari ngkami te Atua, ao ni kaotinakoi ngkami man te aba aei, nakon te aba are e tuea nakon Aberaam, ao nakon Itaaka, ao nakon Iakobwa.

37 Ao Iotebwa e kamatoai bwaai riki tabeua aika mwaiti nakoia tarina, ao e karaoa te tuea nakoia tibun Iteraera, ni kangai nakoia, e koaua ae na kawari ngkami te Atua, ao kam na uotarake riiu mai ikai.

38 Ngaia are Iotebwa e mate ngke tebubua ao tebwina ana ririki, ao a karaoa rabwatana bwa e na aki buakaka, ao a karinna n te baoki ni mate i Aikubita, ao e kawakinaki n aki taunaki irouia tibun Iteraera, bwa e aonga ni uotaki rake ao ni kaweneaki n te bwaro ma tamana. Ao a uringa te tuea are a tuea iai nakoina.