JSN, Genesis 9:4–6. Fa to Genesis 8:20–22 ho
Nsuyirii no ekyir no, Noah bisa Ewuradze dɛ mma ɔnndom asaase no bio.
4 Na Noah sii afɔrmbukyia maa Ewuradze, na ɔfaa mbowa a hɔn ho tsew nyinara mu bi, na ntumbowa a hɔn ho tsew nyinara mu bi, na ɔbɔɔ ɔhyew-afɔr wɔ afɔrmbukyia no do; na ɔdze ndaase maa Ewuradze, na odzii ehurusi wɔ n’akoma mu.
5 Na Ewuradze kasaa kyerɛɛ Noah, na ohyiraa no. Na Noah tsee ohuam no ne nkã, na ɔsee wɔ n’akoma mu dɛ;
6 Mobɔbɔ Ewuradze ne dzin, ama ɔanndom asaase no bio ara da wɔ nyimpa ntsi, osiandɛ nyimpa n’akoma mu nsusui muo dze fitsi ne mbabun no; na dɛ ɔnnkɛsɛɛ adze a nkwa wɔ mu biara bio ara da, tse dɛ mbrɛ ɔayɛ yi, mber tsentsen a asaase no wɔ hɔ yi:
JSN, Genesis 9:10–15. Fa to Genesis 9:4–9 ho
Nyimpa wɔ nkontaabu ma dɛ okyi mbowa na nyimpa hɔn bɔgyaa gu. Nyame nye Noah na ne mbabanyin yɛ ahyɛmudzi nhyehyɛɛ kor noara a ɔnye Enoch yɛe no.
10 Mbom, bɔgya a ɔwɔ honam biara a medze ama hom dɛ edziban no, wobekyi egu famu, ɔno na oyi no nkwa no, na bɔgya no mma hom nndzi.
11 Na nokwar, onnyi dɛ wɔkã bɔgya gu gyedɛ wɔ edziban ho ntsi; hom dze bɔbɔ hom nkwa ho ban; na abowa biara no bɔgyaa mobɔhwehwɛ no wɔ hom nsamu.
12 Na obiara a obekyi nyimpa no bɔgyaa no, wɔbɛnam nyimpa do ekyi no bɔgyaa; osiandɛ onnyi dɛ nyimpa kyi nyimpa no bɔgyaa.
13 Mbrasɛm a mema, dɛ nyimpa no nua biara bɔkora nyimpa no nkwa, osiandɛ wɔ mankasa mo su do na meyɛɛ nyimpa.
14 Na mbrasɛm a medze ma hom, Hom nwo na wɔndɔr, wɔnwo pii wɔ asaase na wɔndɔr wɔ mu.
15 Na Nyame see Noah nye ne mbabanyin a wɔkã no ho, see dɛ, Na Emi, hwɛ menye wo bedzi ahyɛmu, dza menye w’egya Enoch dzii no a ɔfa no w’asefo a wodzi w’ekyir no ho.
JSN, Genesis 9:21–25. Fa to Genesis 9:16–17 ho
Nyankopɔn dze nyankontɔn no bew sor ma ɔbɛyɛ nkaadze wɔ N’ahyɛmudzi a ɔnye Enoch na Noah dzii no. Nda a odzi ewei no Abakamba N’Asɔr mu ɔdodow ehyiadzi no bɛba abɛkã asaase do atseneneefo ho.
21 Na nyankontɔn no bɛbew mununkum no mu; na mobɔhwɛ do, ama maakaa ahyɛmudzi a ɔwɔ hɔ daapem a menye w’egya Enoch dzii, dɛ, ber a adasa bedzi me mbrasɛm do no, Zion bɛsan aba asaase no do bio; Enoch kuropɔn a muhwimii maa mo ho no.
22 Na iyi nye m’ahyɛmudzi a ɔwɔ hɔ daapem, dɛ ber a w’asefo bɛgye nokwar no ato mu, na wɔahwɛ sor no, nna Zion bɔhwɛ ase, na ɔsorsor nyinara behihim wɔ enyigye mu, na asaase no bɔwosow wɔ ehurusi mu;
23 Na abakamba n’asɔr mu ɔdodow ehyiadzi no befi sor aba ase, na ɔabɛfa asaase no ayɛ ne dze, na obenya tsebew akɛpem ber a ewiei no bɛba. Na iyi nye m’ahyɛmudzi a ɔwɔ hɔ daapem a menye hom egya Enoch dzii no.
24 Na nyankontɔn no bɛbew mununkum no mu, na mama m’ahyɛmudzi no etsim wɔ hom mu, a mayɛ a ɔda emi na hom ntamu, ama honam nyinara a nkwa wɔ mu a wɔbɛba asaase no do.
25 Na Nyame see Noah dɛ, Iyi nye ahyɛmu n’asɛnkyerɛdze, a medze etsim hɔ wɔ emi na ɔwo ntamu; ama honam a wɔbɛba asaase no do nyinara.