4 Ut laj Noe kixyiib’ jun artal choq’ re li Qaawa’, ut kixchap re chixjunil li xul moko tz’aj ta, ut re chixjunil li xik’anel xul moko tz’aj ta, ut kixmayeja k’atb’il mayej sa’ xb’een li artal; ut kib’antioxin chiru li Qaawa’, ut kisaho’ sa’ xch’ool.

5 Ut li Qaawa’ kiraatina laj Noe, ut kirosob’tesi. Ut laj Noe kirutz’ jun sahil sununk, ut a’an kixye sa’ xch’ool;

6 Tinpatz’ xk’ab’a’ li Qaawa’, re naq a’an ink’a’ chik tixmajewa li ch’och’ xmaakeb’ li winq, xb’aan naq ink’a’ us lix k’oxlahom lix ch’ool li winq chalen chaq sa’ xsaajil; ut re naq a’an ink’a’ chik tixsak’ jun sutaq chik chixjunil li k’a’ru yo’yo, jo’ ak’ xb’aanuhom a’an, naq toj nakana li ruchich’och’;

10 A’ut lix kik’el chixjunil li tib’elej li kink’e eere choq’ tzakemq, taahoymanq chiru li ch’och’, li isinb’ilaq wi’ xyu’am, ut lix kik’el ink’a’ teetzeka.

11 Ut chi yaal, ink’a’ taahoymanq li kik’elej, ka’ajwi’ re taawanq tzakemq, re xkolb’al lee yu’am, ut lix kik’el li junjunq chi xul tinpatz’ reeqaj sa’ lee ruq’.

12 Ut ani nahoyok re xkik’el li winq, xb’aan li winq taahoye’q xkik’el; xb’aan naq li winq ink’a’ tixhoy xkik’el li winq.

13 Xb’aan naq jun taqlahom nink’e, naq li ras riitz’in li junjunq chi winq tixkol xyu’am li winq, xb’aan naq jo’ tz’aqal injalam-uuch naq kinyo’ob’tesi li winq.

14 Ut jun taqlahom nink’e eere, Chex’uuchinq ut chexk’ihanq; chex’alanq chi naab’al sa’ li ruchich’och’, ut chexk’ihanq chi sa’.

15 Ut li Dios kiraatina laj Noe, ut eb’ li ralal rochb’een, ut kixye: Ut laa’in, k’ehomaq reetal, laa’in tinxaqab’ lin sumwank eerik’in, li kink’uub’ rik’in lee yuwa’ aj Enok, chirix lee riyajil moqon chik cherix.

21 Ut taawanq li kaqla sa’ li choql; ut laa’in tin’iloq re, re taajultiko’q we li sumwank li junelik taakanaaq, li kink’uub’ rik’in laa yuwa’ aj Enok; naq, jo’q’e te’xpaab’ li winq chixjunil lin taqlahom, taachalq wi’chik Sion sa’ li ruchich’och’, lix tenamit laj Enok li kinxok chaq wik’in.

22 Ut a’in lin sumwank li junelik taakanaaq, naq jo’q’e naq eb’ laa walal aak’ajol te’xk’ulub’a li yaal chire xch’ooleb’, ut te’iloq taqe’q, chirix a’an Sion taa’iloq taq’a, ut chixjunil li choxa taachiq’manq xb’aan sahil ch’oolejil, ut li ruchich’och’ taasiksotq rik’in xsahil xch’ool;

23 Ut li jolomil ch’utlajik re li iglees re li xb’een yo’lajenaq taakub’eeq chaq sa’ choxa, ut taareechani li ruchich’och’, ut taawanq xna’aj toj reetal taachalq li roso’jik. Ut a’in lin sumwank li junelik taawanq, li kink’uub’ rik’in laa yuwa’ aj Enok.

24 Ut taawanq li kaqla sa’ li choql, ut tinxaqab’ lin sumwank choq’ aawe, li kink’uub’ aawik’in laa’at ut wik’in laa’in, choq’ re li junjunq chi yo’yookil yo’ob’tesihom, re chixjunil li tz’ejwalej li taawanq sa’ xb’een li ch’och’.

25 Ut li Dios kixye re laj Noe, A’in li reetalil li sumwank li kink’ojob’ aawik’in laa’at wik’in laa’in; choq’ re chixjunil li tz’ejwalej li taawanq sa’ xb’een li ch’och’.