4 Ao Noa e katea te baonikarea nakon te Uea, ao e anai ni kabane maan aika itiaki, ao mannikiba aika itiaki ni kabane, ao e anga te karea ae kabuokaki i aon te baonikarea; ao n anga te kaitau nakon te Uea, ao e kimwareirei i nanona.

5 Ao e taetae te Uea nakon Noa, ao e kakabwaiaa. Ao Noa e aroka te boi ae karewerewe boina, ao e taku i nanona;

6 N na wetea aran te Uea, bwa e na aki manga kamaraia riki aontano bon ibukin te aomata, bwa kanoan ana iango te aomata e bon buakaka man kairakena; ao bwa e na aki manga orei bwaai aika maiu ni kabane, n aron are e tia ni karaoia, ngke e tiku te aonaba;

10 Ma, raraan iriko ni kabane ake I tia n angani ngkami ibukin te amwarake, e na kawawaeaki nako aontano, are e anaa te maiu mai iai, ao te raraa kam na aki kanna.

11 Ao e koaua, te raraa e na aki kawawaeaki, ma ti ibukin te iriko, ni kamanoa maiumi; ao raraaia maan ni kabane N na kainnanoa ami kaeka ni bukinakimi n aei.

12 Ao ane e kawawaea raraan te aomata, e na kawawaeaki raraana iroun te aomata; bwa te aomata e na aki kawawaea raraan te aomata.

13 Bwa I anga te tua, bwa ni kabane tarin te aomata e na kamanoa maiun te aomata, bwa I tia ni karaoa te aomata bwa katotongau.

14 Ao I anga te tua nakoimi, Kam na karikiua ao ni kamwaiti ngkami; n karokoia ni kamwaitiia i aon te aonaba, ao ni kamwaiti ngkami i aona.

15 Ao te Atua e taetae nakon Noa, ao nakoia natina mwaane ma ngaia, ni kangai, Ao Ngai, nooria, N na katea au berita ae tabu ma ngkoe, are I karaoia nakon am bakatibu ae Enoka, ni kaineti ma kanoam ake i mwim.

21 Ao nei wirara e na mena n te nang; ao N na taraia, bwa I aonga n uringa te berita ae tabu ae akea tokina, are I karaoia nakon am bakatibu ae Enoka; bwa, ngkana te aomata e riai ni kawakin au tua ni kabane, Tion e na manga roko i aon te aonaba, ana kawa Enoka are I tia n tabekia rake nakoiu.

22 Ao aio bon au berita ae tabu ae akea tokina, bwa ngkana kanoam a na mwanea te koaua, ao n tararake, ngkanne Tion e na tara naano, ao ni kabane karawa a na ruru ma te kukurei, ao te aonaba e na ruru ma te kimwareirei;

23 Ao te botaki ni kabuta n ana ekaretia te karimoa n nati e na ruo mai karawa, ao ni bwaina te aonaba, ao e na iai nnena ni karokoa e roko te toki. Ao aio bon au berita ae tabu ae akea tokina, are I karaoia ma am bakatibu ae Enoka.

24 Ao nei wirara e na mena n te nang, ao N na kamatoa au berita ae tabu nakoim, are I a tia ni karaoia i marenau ma ngkoe, ibukia ni kabane bwaai aika maiu n te iriko ake a na mena i aon te aonaba.

25 Ao te Atua e taku nakon Noa, Aio bon te kanikina ibukin te berita ae tabu are I tia ni karaoia i marenau ma ngkoe, ibukia ni kabane iriko ake a na mena i aon te aonaba.