1 From hemia, yumi no mas lego ol prinsipol blong doktrin blong Kraes, be yumi mas gohed blong kam stret gud evriwan; mo yumi nomo putum bakegen fandesen blong sakem sin from ol ded wok, mo blong gat fet long God,

2 blong ol doktrin blong baptaes, blong fasin blong putum han antap long hed blong man, mo blong ol dedman oli laef bakegen long ded, mo blong jajmen we i blong taem we i no save finis.

3 Mo bae yumi gohed i go kasem fasin blong kam stret evriwan sapos God i letem.

4 From hem i mekem se i no posibol, blong olgeta we hem i bin givim laef long olgeta long wan taem, mo olgeta we oli bin testem presen blong heven, mo olgeta we oli bin kasem Tabu Spirit,

5 mo olgeta we oli bin testem gudfala tok blong God, mo ol paoa blong wol we bae oli kam,

6 Olgeta ia, sapos oli lusum bilif blong olgeta, bae oli no save kam niu bakegen tru long fasin blong sakem sin; from se oli stap nilim Pikinini blong God long kros bakegen, mo oli stap mekem sem long hem long fes blong ol man.

7 From dei i stap kam, we graon ia we i stap dring long ren we i stap foldaon antap long hem, mo olgeta man we oli stap long graon ia, mo oli stap wok long graon ia oli kakae ol gudfala kaekae we oli stap gro long hem, we ol man ia, naoia oli stap kasem ol blesing we oli kam long God, bae God i klinim olgeta tru long faea.

8 From graon we i gat ol ropnil mo ol rabis gras nomo oli gro long hem, God i no wantem graon ia, mo bambae i spolem; from hemia, ol graon ia oli no tekem gudfala frut, mo God i sakemaot olgeta long faea, from long en blong hem, faea bae i bonem olgeta.

9 Be nomata yumi toktok olsem, yumi we God i lavem yumi, God i gat ol moa gud samting long mi mo yu, mo ol samting we oli kam blong Lod i sevem laef blong yumi.

10 From God i no wan man we i nogud mo i no stret; from hemia, bambae hem i no fogetem wok blong yu, mo wok we yu mekem wetem lav, we yu bin mekem mo stap mekem yet long olgeta Sent blong hem.