JST, Jemes 2:1. Komperem long Jemes 2:1
Ol memba oli no mas luk wan man o woman mo ting se hem i hae moa bitim wan narafalawan bakegen.
1 Ol brata. Yufala i no save gat fet long Lod Jisas Kraes, Lod blong glori, be yet, yufala i gat respek long ol narafala man o woman.
JST, Jemes 2:14–21. Komperem long Jemes 2:14–22
Fet we i no gat wok i go wetem, i samting we i ded, mo i no save sevem man.
14 ?I gat wanem i gud long man, ol brata blong mi, blong wan man i talem se hem i gat fet mo i no mekem ol wok? ?Bae fet i save sevem hem?
15 Yes, wan man i save talem: “Bae mi soem long yu se mi gat fet nating mi no mekem wok;” be mi talem: “Soemaot fet blong yu long mi, we i no gat wok i go wetem, mo bambae mi soemaot long yu bilif blong mi tru long ol wok blong mi.”
16 From, sapos wan brata o wan sista i no gat klos mo i no gat kaekae, mo wan long yufala i talem long hem se: “God i blesem yu. Yu go putum klos blong yu wom i stap, mo bae yu gat kaekae;” be afta hem i no givim olgeta samting ia we bodi blong hem i nidim, nao ?olsem wanem nao fet blong yu i givhan long brata o sista ia?
17 Fet i olsem. Sapos i no gat wok i go wetem, nao hem i ded, i stap hemwan.
18 From hemia, !yu mas save, O man nating, se fet we i no gat wok i go wetem, i ded mo i no save sevem yu!
19 Yu yu bilif se i gat wan God i stap; hemia i gud; olgeta devel tu oli bilif olsem, mo oli stap seksek from; yu yu mekem yu kam semmak long olgeta, we yu gat rong i stap.
20 ?Be olsem wanem long papa blong yumi, Ebraham, we God i mekem hem i kam stret tru long ol wok blong hem, taem hem i bin givim Aesak, boe blong hem, antap long olta?
21 ?Yu luk olsem wanem fet i go wetem ol wok blong hem, mo tru long ol wok blong hem, fet blong hem i kam stret evriwan?