1 Ilo jinoin gospel eo kar kwaļo̧k kōn Nejin. Im gospel eo ekar naan eo, im naan eo eaar pād ippān Nejin, im Nejin ekar pād ippān Anij, im Nejin eaar jān Anij.

2 Ejja in wōt ekar ilo jinoin ippān Anij.

3 Men otemjeļo̧k rekar kōm̧anm̧an jān E; im ijello̧kun E ekar ejjeļo̧k jabdewōt men kōm̧anm̧ani ko me em̧ōj kōm̧anm̧ani.

4 Ilo E ekar gospel eo, im gospel eo ar mour eo, im mour eo ekar meram eo an armej raņ;

5 Im meram eo ej romaak ilo laļ, im laļ ejaje e.

6 Eaar wōr juon em̧m̧aan jilkintok jān Anij, eo etan ar Jon.

7 Ejja in wōt eaar itok ilo laļ n̄an juon rikam̧ool, n̄an kam̧ool kōn meram eo, n̄an kam̧ool kōn gospel eo kōn Nejin, n̄an aolep, bwe kōn e armej raņ ren maron̄ tōmak.

8 E eaar jab meram eo, a eaar itok n̄an kam̧ool kōn meram eo,

9 Eo eaar meram em̧ool eo, eo ej kōmeramļo̧k armej otemjej ej itok ilo laļ;

10 Em̧ool eo Nejin Anij. E eo ekar pād ilo laļ, im laļ kar kōm̧anm̧an jān E, im laļ ar jab jeļā E.

11 E eaar itok n̄an ro An, im ro An rekar jab bōk E.

12 A jon̄an lōn̄in wōt ro rekar bōk E, n̄an er Eaar leļo̧k kajoor eo n̄an erom ro nejin Anij; n̄an er wōt ro rej tōmak ilo Etan.

13 E eaar ļotak, jab jān bōtōktōk, im jab jān ankilaan kanniōk, im jab jān ankilaan armej, a jān Anij.

14 Im ejja naan eo wōt eaar erom kanniōk, im kar jokwe ilubwiljid, im jaar lo An aiboojoj, aiboojoj eo an Nejin Emake Keotak in Jemān, eobrak kōn jouj im m̧ool.

15 Jon eaar kam̧ool kōn E, im eaar lam̧ōj, im ba, En̄in eo kōn E iaar kōnono; E eo ej itok ālikū, eļapļo̧k jān eō; bwe E eaar m̧okta jān eō.

16 Bwe ilo jinoin ekar Naan eo, em̧ool Nejin, eo ekar erom kanniōk, im kar jilkintok n̄an kōj jān ankilaan Jemān. Im jon̄an lōn̄in eo ej tōmak ilo Etan naaj bōk jān tarlep eo An. Im tarlep eo An jaar aolep bōke, em̧ool jab wabanban im mour indeeo, kōn jouj eo An.

17 Bwe kien eo kar letok kōn Moses, a mour im m̧ool rekar itok kōn Jisōs Kraist.

18 Bwe kien eo ekar ālikintok juon kien kanniōk, n̄an kajeikiki mej; a gospel eo eaar ilo̧kan kajoor eo an juon mour eban jem̧ļo̧k, kōn Jisōs Kraist, eo Nejin Eaar Keotake, eo ej ilo ubōn Jemān.

19 Im ejjeļo̧k armej eaar lo Anij ilo jabdewōt iien, ijello̧kun wōt Eaar kam̧ool kōn Nejin; bwe ijello̧kun wōt n̄e ej kōn E ejjeļo̧k armej emaron̄ mour.

20 Im en̄in ej kam̧ool eo an Jon, ke riJu ro rekar jilkinļo̧k pris ro im riLivai ro jān Jerusalem, n̄an kajjitōk ippān; Wōn kwe?

21 Im eaar kwaļo̧k būruōn, im jab kaarmejjete bwe E ekar Elias; a kwaļo̧k būruōn, im ba; N̄a ij jab RiKraist eo.

22 Im raar kajjitōk ippān, im ba; Innām ekōjkan am Elias? Im E ba, N̄aij jab Ilaija eo en kar kōjepļaaktok aolep men otemjeļo̧k. Im raar kajjitōk ippān, Kwe rikanaan en ke? Im eaar uwaak, Jaab.

23 Innām raar ba n̄an e, Wōn kwe? bwe kōmin maron̄ leļo̧k uwaak eo n̄an ro rekar jilkintok kōm. Ta kwōj ba kōn kwe make?

24 Eaar ba, n̄aij ainikien juon eo ej lam̧ōj ilo āne jem̧aden, Kom̧in kajim̧we iaļ eo an Irooj, āinwōt rikanaan Aiseia eaar ba.

25 Im ro kar jilkinļo̧k er rekar jān Parisi ro.

26 Im raar kajjitōk ippān, im ba n̄an e; Innām etke kwōj peptaij, eļan̄n̄e kwōj jab RiKraist, im jab Elias eo en kar kōjepļaaktok aolep men otemjeļo̧k, im jab rikanaan en?

27 Jon eaar uwaake er, im ba; Ij peptaij kōn dān, a ewōr juon ej jutak ilubwiljimi, eo kom̧ ij jab jeļā kake;

28 Ej kōn E ij kam̧ool. E ej rikanaan en, em̧ool Elias, eo, itok ālikū, ej eo em̧m̧anļo̧k jān eō, eo kworan eran neen ij jab tōllo̧ke n̄an jeļati, ak eo ijo jikin iban maron̄ kanne; bwe E enaaj peptaij, jab kōn dān wōt, a kōn kijeek, im kōn Jetōb Kwōjarjar.

29 Raan eo ilju Jon ej lo Jisōs ej itok n̄an ippān, im ba; Lo Lamb an Anij, eo ej bōkļo̧k jero̧wiwi an laļ!

30 Im Jon eaar kwaļo̧k kam̧ool kōn E n̄an armej ro, im ba, En̄in ej Eo iaar ba kake; Ālikū ej itok juon em̧m̧aan eo em̧m̧anļo̧k jān eō; bwe ekar m̧okta jān eō, im iaar jeļā E, im bwe naaj kar kaalikkar E n̄an Israel; kōn menin ij itok n̄an peptaij kōn dān.

31 Im Jon eaar kam̧ool, im ba; Ke Eaar peptaij jān eō, Iaar lo Jetōb eaar wanlaļtak jān lan̄ āinwōt juon m̧uļe, im eaar pād Ioon.

32 Im iaar jeļā E; bwe E eo eaar jilkintok eō n̄an peptaij kōn dān, ejja eo wōt Eaar ba n̄an eō; Ioon eo kwōnaaj lo Jetōb ej wanlaļtak, im pād wōt Ioon, ejja in wōt ej eo ej peptaij kōn Jetōb Kwōjarjar.

33 Im iaar lo, im kwaļo̧k kam̧ool bwe En̄in ej Nejin Anij.

34 Men kein rekar kōm̧m̧an ilo Betabara, ijjuweo jān Jordan, ijo Jon eaar peptaij ie.

42 Im eaar bōktok e n̄an Jisōs. Im ke Jisōs ar lo e, Eaar ba, Kwe Saimōn, em̧m̧aan nejin Jona, naaj kūr eok Sipas, eo ej, jān oktan, juon rilolo, ak juon dekā. Im rekar em̧m̧aan rieo̧n̄ōd. Im er ekar em̧ōkaj aer likūt men otemjej, im kar ļoore Jisōs.