1 N te moan tai e tataekinaki te euangkerio rinanon te Nati. Ao te euangkerio bon te taeka, ao te taeka e mena iroun te Nati, ao te Nati e mena iroun te Atua, ao te Nati bon mai iroun te Atua.

2 Boni Ngaia n te moan tai are e mena iroun te Atua.

3 Bwaai ni kabane a karikaki irouna; ao ngke akea ngaia e na aki karikaki te bwai teuana ae e karikaki.

4 E mena irouna te euangkerio, ao te euangkerio bon te maiu, ao te maiu bon otaia aomata;

5 Ao te oota e ota n te aonaba, ao te aonaba e aki ataia.

6 Iai te aomata ae kanakomaiaki iroun te Atua, are arana bon Ioane.

7 Bon ngaia are e roko n te aonaba bwa te tia kakoaua, bwa e na kaota koauan te oota, ni kaota koauan te euangkerio rinanon te Nati, nakoia ni kabane, bwa aonga aomata ni kakoaua rinanona.

8 Bon tiaki ngaia te oota anne, ma e roko bwa e na kaota koauan te oota anne,

9 Are bon te oota ae koaua, are kaotaia aomata ni kabane ake a roko n te aonaba;

10 Are Natin te Atua. Ngaia are e mena n te aonaba, ao te aonaba e karaoaki irouna, ao te aonaba e aki kinaa.

11 E roko nakoia ake oin ana aomata, ao ake oin ana aomata aki butimwaia.

12 Ma ni kabane ake a butimwaia, e anga nakoia te mwaaka bwa a na riki bwa natin te Atua, ti nakoia naake a kakoaua arana.

13 E bungiaki, tiaki n te rara, tiaki n te nano n iriko, tiaki n te nano n aomata, ma bon iroun te Atua.

14 Ao bon ngaia te taeka are e riki ni iriko, ao e maeka i buakora, ao ti noora mimitongina, te mimitong n aron ana Rikitemanna te Tama, ae onrake n te akoi ao te koaua.

15 Ioane e kakoaua ibukina, ao e takarua, ni kangai, Bon aio teuare I taekinna, Teuare e roko imwiu, e a riki bwa moau, bwa bon ngaia moau ma ngkoa.

16 Bwa n te moan tai bon iai te Taeka, are te Nati, are e riki n iriko, ao e kanakomaiaki nakoira bwa nanon te Tama. Ao ni kabane ake a kakoaua arana a na karekea bwanininna. Ao man bwanininna ti a tia ni bane ni karekea, te aki mamate ao te maiu ae akea tokina naba, rinanon ana akoi.

17 Bwa e anga te tua rinanon Mote, ma te maiu ao te koaua a roko rinanon Iesu Kristo.

18 Bwa te tua e kaineti ma tuan te rabwata, are tokina te mate; ma te euangkerio e kaineti te mwaaka ni maiu n aki totoki, rinanon Iesu Kristo, are te Rikitemanna, are e mena ni bwanibwanin te Tama.

19 Ao akea te aomata ae tia n noora te Atua n te tai teuana, ma ti are e tia ni kakoaua ibukin te Nati, akea te aomata ae kona ni kamaiuaki bwa ti ri nanona.

20 Ao aei bon ana rongorongo Ioane, ngke I-Iutaia a kanakoia ibonga ao tibun Rewi mai Ierutarem, bwa a na titirakinna; Antai ngkoe?

21 Ao e kaotia, ao e aki kaakea ae ngaia Eriati; ma e kaotia, ni kangai; Tiaki ngai te Kristo.

22 Ao a titirakinna, ni kangai; N te aro ra ae ngkoe Eriati? Ao e taku, Tiaki ngai Eriati are e na kaoki bwaai ni kabane. Ao a titirakinna, ni kangai, Ngkoe te burabeti anne? Ao e kaeka, Tiaki.

23 I mwina a taku nakoina, Antai Ngkoe? bwa ti aonga n anga te kaeka nakoia naake a kanakomaira. Tera taekinam i bon iroum?

24 E taku, Ngai bwanaan temanna are e takarua n te rereua, Kaeta kawain te Uea, n aron are e taekinna te burabeti ae Etaiati.

25 Ao nake a kanakoaki boni mai irouia Baritaio.

26 Ao a titirakinna, ao a taku nakoina: Ko aera ngkai ko bwabetito, ngkana tiaki ngkoe te Kristo, ao tiaki Eriati are e na kaoki bwaai ni kabane, ao tiaki naba te burabeti arei?

27 Ioane e kaekaia, ni kangai; I bwabetito n te ran, ma e tei temanna i buakomi, ae kam aki ataia;

28 Bon ngaia teuare I kakoaua ibukina. Bon ngaia te burabeti arei, are Eriati, are, e roko imwiu, e a riki bwa moau, are I aki tau bwa N na kabwara kabaean ana kau, ke are I aki tau bwa N na onea mwina, bwa e na bwabetito, tiaki ti n te ran, ma bon ma te ai, ao ma te Tamnei ae Raoiroi.

29 N te bong are i mwiina Ioane e noora Iesu ngke e nakoina, ao e taku; Nooria Ana Tiibu te Teei te Atua, are e anaa buren te aonaba!

30 Ao Ioane e kaota koauana nakoia aomata, ni kangai, Bon aio teueare I taekinna; Imwiiu e na roko te aomata are e riki bwa moau; bwa boni ngaia moau ma ngkoa, ao I kina, ao bwa e riai ni kaotaki nakon Iteraera; ngaia are I a roko ni bwabetito n te ran.

31 Ao Ioane e kaota koauana ni kangai; Ngke e bwabetitoaki irou, I noora te Tamnei n ruo mai karawa n ai aron te taobe, ao e tiku i aona.

32 Ao I kina, bwa teuare e kanakoai bwa N na bwabetito n te ran, ngaia are taku nakoiu; Ane ko nooria bwa e ruo te Tamnei nako aona, ao e tiku i aona, boni ngaia are e bwabwabetito n te Tamnei are Raoiroi;

33 Ao I nooria, ao I kaota koauana bwa bon aio Natin te Atua.

34 Baikai a karaoaki i Betabara, are e raroa nako ma Ioretan, ike e bwabetito iai Ioane.

42 Ao e kairia nakon Iesu. Ao Iesu ngke e nooria, e taku, Boni ngkoe Timon, are natin Iona, ko na aranaki bwa Keba, are, ngkana e rairaki, te tia mamata, ke te atibu. Ao nakai bon taan akawa. Ao n te tai naba arei a katikui bwaai ni kabane, ao a irira Iesu.