9 Apan siya kinsa molimud kanako sa atubangan sa mga tawo, ilimud sa atubangan sa mga anghel sa Dios.

10 Karon ang iyang mga tinun-an nasayud nga siya miingon niini, tungod kay sila namulong og dautan batok kaniya sa atubangan sa mga katawhan; kay sila nahadlok sa pag-ila kaniya sa atubangan sa mga tawo.

11 Ug sila nangatarungan diha sa ilang mga kaugalingon, nag-ingon, Siya nasayud sa atong mga kasingkasing, ug siya namulong ngadto sa atong paghukom, ug kita dili mapasaylo. Apan siya mitubag kanila, ug miingon ngadto kanila,

12 Si kinsa ang mamulong og usa ka pulong batok sa Anak sa Tawo, ug maghinulsol, siya pagapasayloon, apan ngadto kaniya kinsa nanamastamas batok sa Espiritu Santo, siya dili pagapasayloon.

41 Kay, tan-awa, siya moabut diha sa unang pagtukaw sa kagabhion, ug siya usab moabut sa ikaduhang pagtukaw, ug usab siya moabut diha sa ikatulo nga pagtukaw.

42 Ug sa pagkatinuod Ako moingon nganha kaninyo, Siya miabut na, ingon nga kini nahisulat mahitungod kaniya; ug usab sa diha nga siya moabut diha sa ikaduha nga pagtukaw, o moabut sa ikatulo nga pagtukaw, bulahan kadto nga mga sulugoon sa diha nga siya moabut, nga siya makakita nga naghimo sa ingon;

43 Kay ang Ginoo niadto nga mga sulugoon magbakus sa iyang kaugalingon, ug mohimo kanila sa paglingkod aron mangaon, ug mobarug ug moalagad kanila.

44 Ug karon, sa pagkatinuod Ako moingon niini nga mga butang nganha kaninyo, aron kamo masayud niini, nga ang pag-anhi sa Ginoo ingon sa usa ka kawatan diha sa kagabhion.

45 Ug kini sama ngadto sa usa ka tawo kinsa mao ang tagbalay, kinsa, kon siya dili magbantay sa iyang mga butang, ang kawatan moabut diha sa takna diin siya wala magdahum, ug mokuha sa iyang mga butang, ug mobahin-bahin kanila taliwala sa iyang mga kauban.

46 Ug sila miingon diha sa ilang mga kaugalingon, Kon ang maayo nga tawo sa balay nasayud sa unsa nga takna ang kawatan moabut, siya makabantay unta, ug dili motugot nga ang iyang balay pagalungkabon ug mawala ang iyang mga butang.

47 Ug siya miingon ngadto kanila, Sa pagkatinuod Ako moingon nganha kaninyo, busa pangandam usab kamo; kay ang Anak sa Tawo moabut sa takna nga kamo wala maghunahuna.

48 Unya si Pedro miingon ngadto kaniya, Ginoo, ikaw ba namulong niini nga sambingay ngari kanamo, o ngadto sa tanan?

49 Ug ang Ginoo miingon, Ako mamulong ngadto niadto kinsa ang Ginoo mohimo og mga magmamando ibabaw sa iyang panimalay, aron sa paghatag sa iyang mga anak sa ilang bahin sa pagkaon sa tukma nga panahon.

50 Ug sila miingon, Kinsa man kana nga matinud-anon ug maalamon nga sulugoon?

51 Ug ang Ginoo miingon ngadto kanila, Kana mao ang sulugoon kinsa nagtukaw, sa paghatag sa iyang bahin sa pagkaon sa tukma nga panahon.

52 Bulahan kana nga sulugoon kinsa makita sa iyang Ginoo, kon siya moabut, nga nagbuhat.

53 Mahitungod sa kamatuoran Ako moingon nganha kaninyo, nga siya mohimo kaniya nga magmamando ibabaw sa tanan nga siya aduna.

54 Apan ang dautan nga sulugoon mao siya kinsa wala makita nga nagbantay. Ug kon kana nga sulugoon wala makita nga nagbantay, siya moingon sa iyang kasingkasing, Ang akong Ginoo naglangay sa iyang pag-anhi; ug mosugod sa pagbunal sa mga sulugoon nga lalaki, ug sa mga sulugoon nga babaye, ug sa pagpangaon, ug sa pag-inom, ug aron sa paghubog.

55 Ang Ginoo niana nga sulugoon moabut niana nga adlaw nga siya wala magpaabut, ug diha sa usa ka takna nga siya wala masayud, ug mosalikway kaniya, ug motudlo kaniya sa iyang bahin uban sa mga dili matuohon.

56 Ug kana nga sulugoon kinsa nasayud sa kabubut-on sa iyang Ginoo, ug wala mangandam sa pag-anhi sa iyang Ginoo, ni mobuhat sumala sa iyang kabubut-on, mahiagum sa daghan nga mga pagbunal.

57 Apan siya nga wala masayud sa kabubut-on sa Ginoo, ug mihimo og mga butang nga takus sa mga pagbunal, pagabunalan og diyutay. Kay ngadto kang kinsa daghan ang gihatag, kaniya daghan ang gikinahanglan; ug ngadto kang kinsa ang Ginoo nakapasalig og daghan, kaniya ang mga tawo mangayo og labaw pa.