16 Ug sila miingon ngadto kaniya, Kami, adunay balaod, ug mga propeta; apan alang niini nga tawo kami dili modawat kaniya nga mahimo kanamo nga magmamando; kay siya naghimo sa iyang kaugalingon nga mahimo nga usa ka maghuhukom ibabaw kanamo.

17 Unya miingon si Jesus ngadto kanila, Ang balaod ug ang mga propeta nagpamatuod kanako; oo, ug ang tanan nga mga propeta kinsa nakasulat, gani hangtud ni Juan, nakapanagna niini nga mga adlaw.

18 Sukad niana nga panahon, ang gingharian sa Dios gisangyaw, ug ang matag tawo kinsa nangita sa kamatuoran magpadayon ngadto niini.

19 Ug masayon pa alang sa langit ug sa yuta nga molabay, kay alang sa usa ka tulbok sa balaod nga mapakyas.

20 Ug ngano nga nagtudlo kamo sa balaod, ug naglimud niana diin nahisulat; ug nanghimaraut kaniya kinsa gipadala sa Amahan aron sa pagtuman sa balaod, nga kamo untang tanan matubos?

21 O mga hungog! kay kamo nakaingon diha sa inyong mga kasingkasing, Walay Dios. Ug kamo nagtuis sa matarung nga agianan; ug ang gingharian sa langit nag-antus sa inyong kapintas; ug kamo migukod sa mga maaghup; ug diha sa inyong kapintas kamo nagtinguha sa paglaglag sa gingharian; ug kamo mikuha sa mga anak sa gingharian pinaagi sa kusog. Alaot diha kaninyo, kamo nga mga mananapaw!

22 Ug sila miyubit kaniya pag-usab, ingon nga nasuko tungod sa panultihon, nga sila mga mananapaw.

23 Apan siya mipadayon, nag-ingon. Si kinsa kadto nga makigbulag sa iyang asawa, ug makigminyo sa lain, nakabuhat og panapaw; ug si bisan kinsa ang makigminyo kaniya kinsa gibulagan sa iyang bana, nakabuhat ug panapaw. Sa pagkatinuod Ako moingon nganha kaninyo, Ako mopahisama kaninyo ngadto sa usa ka adunahan nga tawo.