4 Ingon nga kini gikasulat diha sa basahon ni propeta Esaias; ug kini mao ang mga pulong, nga nag-ingon, Ang tingog sa usa nga nagsinggit diha sa kamingawan, Pag-andam kamo sa agianan sa Ginoo, ug himoa ang iyang mga agianan nga tul-id.

5 Kay tan-awa, ug sud-onga, siya moanhi, ingon nga kini gikasulat diha sa basahon sa mga propeta, aron sa pagkuha sa mga sala sa kalibutan, ug aron sa pagdala og kaluwasan ngadto sa hentil nga mga kanasuran, aron pagpundok niadto kinsa nawala, kinsa anaa sa panon sa karnero sa Israel;

6 Oo, bisan ang gitibulaag ug sinakit; ug usab aron sa pag-andam sa agianan, ug aron mahimo ang pagsangyaw sa ebanghelyo ngadto sa mga Hentil;

7 Ug aron mahimo nga usa ka kahayag ngadto sa tanan kinsa naglingkod diha sa kangitngit, ngadto sa kinatumyan nga mga bahin sa yuta; aron sa pagpahinabo sa pagkabanhaw gikan sa mga patay, ug sa pagkayab ngadto sa kahitas-an, aron pagpuyo sa tuo nga kamot sa Amahan,

8 Hangtud sa kahingpitan sa panahon, ug ang balaod ug ang pagpamatuod pagasilyohan, ug ang mga yawe sa gingharian itugyan pag-usab ngadto sa Amahan;

9 Aron pagpangalagad og kaangayan ngadto sa tanan; aron pagkanaog sa paghukom diha sa tanan, ug aron sa pagpatuo sa tanan nga dili diosnon sa ilang dili diosnon nga mga binuhatan, diin ilang nahimo; ug tanan niini diha sa adlaw nga siya moanhi;

10 Kay kini usa ka adlaw sa gahum, oo, matag walog mapuno, ug matag bukid ug bungtod pagapatagon; ang hiwi pagahimoon nga tul-id, ug ang libaong nga mga agianan mahimo nga hapsay;

11 Ug ang tanan nga tawo makakita sa kaluwasan sa Dios.