9 Ma ane e kaakeaai imataia aomata, e na kaakeaki imataia ana anera te Atua.

10 Ngkai ana reirei ataia bwa e taekina aei, ibukina bwa a tia n taekina ae buakaka ni kaitara imataia te botanaomata; bwa a maaku ni kaotia ae a ataia imataia aomata.

11 Ao a maroro imarenaia, ni kangai, E ata nanora, ao e taetae ni motiki taekara, ao e na aki kabwaraki ara bure. Ma e kaekaia, ao e taku nakoia,

12 Ane e taekina te taeka teuana ni kaitara Natin te aomata, ao e raira nanona, e na kabwaraki ana bure; ma nakon teuare e taetaebuaka te Tamnei ae Raoiroi, e na aki kabwaraki ana bure.

41 Bwa, nooria, e na roko n te moan tei n te tairiki, ao e na roko naba n te kauoua n tei, ao e na manga roko n te kateniua n tei.

42 Ao e koaua ae I taku nakoimi, E a tia n roko, n aron are e koreaki ibukina; ao ngkana e manga roko n te kauoua n tei, ke e roko n te kateniua n tei, a kakabwaiaaki taan mwakuri akekei ngkana e roko, are e na kuneia bwa a tantani;

43 Bwa aia Uea taan mwakuri ake e na katauraoa kunikaina, ao ni katekatekaia bwa a na amwarake, ao e na roko ao e na beku ibukiia.

44 Ao ngkai, e koaua ae I taekini baikai nakoimi, bwa kam aonga n ata aei, bwa rokon te Uea kanga ai aron te tia ira n te tairiki.

45 Ao ai bon aron te aomata are taua taekan te auti, are, ngkana e aki tararuai ana bwai, te tia ira e na roko n te aoa are e aki ataia, ao e anai ana bwai, ao e tibwatibwai imarenaia raona.

46 Ao a taku imarenaia, Ngkana te aomata ae raoiroi n te auti e a kaman ata te aoa are e na roko iai te tia ira, e na kaman taratara, ao n aki kariaia ana auti bwa e na uruakaki ao buan ana bwai.

47 Ao e taku nakoia, E koaua ae I taekinna nakoimi, ngaia are kam na tauraoi naba; bwa Natin te aomata e na roko n te aoa are kam taku bwa e na aki.

48 I mwina Betero e taku nakoina, te Uea, ko taekina te taeka ni kaikonaki aei nakoira, ke nakoia ni kabane?

49 Ao te Uea e taku, I taetae nakoia naake e na karikiia te Uea bwa taan tautaeka i aoia kaain batana, bwa a na anganiia natina tibwaia te amwarake n taina ae riai.

50 Ao a taku, Antai ngkanne te tia mwakuri ane e kakaonimaki ao e wanawana?

51 Ao te Uea e taku nakoia, Bon te tia mwakuria are e taratara, bwa e na anga tibwana te amwarake n taina ae riai.

52 E na kakabwaiaaki te tia mwakuri are e na kunea ana Uea, ngkana e roko, bwa e karaoia.

53 E koaua ae I taekinna nakoimi, bwa e na karikia bwa te tia tautaeka i aon ana bwai ni kabane.

54 Ma te tia mwakuri ae buakaka bon teuare e aki kuneaki n taratara. Ao ngkana te tia mwakuri anne e aki kuneaki n taratara, e na taku i nanona, Au Uea e kakiriaria rokona; ao e na moana orean ana tia mwakuri te mwaane, ao taan mwakuri aine, ao n amwarake, ao ni mooi, ao ni manging.

55 Ana Uea te tia mwakuri anne e na roko n te bong ae aki kaantaningaia, ao n te aoa ae e aki ataia, ao e na korouaia ni kabwaka, ao e na anganna tibwangana irarikiia taan aki kakoaua.

56 Ao te tia mwakuri anne are e ata nanon ana Uea, ao e aki katauraoi ibukin rokon ana Uea, ao e aki karaoa nanona, e na oreaki ni kabatiaki kataereana.

57 Ma ane e aki ata nanon ana Uea, ao e karaoi baike e riai kataereana iai, e na karako oreana. Bwa nakon are anganaki ae bati, e na kainnanoaki ae bati mai irouna; ao nakon are e anganaki ae bati iroun te Uea, e na kabatiaki butiana irouia aomata.