16 Pea naʻa nau pehē kiate ia, ʻOku mau maʻu ʻa e fonó, mo e kau palōfitá; ka ko e tangatá ni ʻe ʻikai te mau maʻu ia ke hoko ko homau pule; he ʻokú ne fokotuʻu ia ko ha fakamaau kiate kimautolu.

17 Pea toki folofola ange ʻa Sīsū kiate kinautolu, ʻOku fakamoʻoni ʻa e fonó mo e kau palōfitá kiate au; ʻio, mo e kau palōfita kotoa pē kuo nau tohi, ʻio ʻo aʻu kia Sione, kuo nau tomuʻa fakahā ʻa e ngaahi ʻaho ko ʻení.

18 Pea talu mei ai mo hono malanga ʻaki ʻo e puleʻanga ʻo e ʻOtuá, pea feinga ʻa e tangata kotoa pē ʻoku fekumi ki he moʻoní ke hū ki ai.

19 Pea ʻoku faingofua ange ke mole ʻa e langí mo e māmaní, ʻi he mole ʻa e kihiʻi kupuʻi lea siʻisiʻi taha ʻo e fonó.

20 Pea ko e hā ʻoku mou akoʻi ai ʻa e fonó, kae fakaʻikaiʻi ʻa ia kuo tohí; pea fakahalaiaʻi ia ʻa ia kuo fekau mai ʻe he Tamaí ke fakakakato ʻa e fonó, koeʻuhí ke huhuʻi ʻa kimoutolu kotoa pē?

21 ʻA e kau vale! he kuo mou pehē ʻi homou lotó, ʻOku ʻikai ke ʻi ai ha ʻOtua. Pea kuo mou fakakeheʻi ʻa e hala totonú; pea tau ʻa e puleʻanga ʻo e langí mo e fakamālohi, meiate kimoutolu; pea ʻoku mou fakatangaʻi ʻa e angamaluú, pea ʻoku mou kumi ʻi hoʻomou fakamālohí ke fakaʻauha ʻa e puleʻangá; pea mou ʻave fakamālohi ʻa e fānau ʻo e puleʻangá. ʻE malaʻia ʻa kimoutolu, ko e kau feʻauaki!

22 Pea nau toe leakovi kiate ia, ʻi heʻenau ʻitá koeʻuhi ko ʻene pehē ko e kau feʻauaki ʻa kinautolú.

23 Ka naʻe hoko atu ʻene folofolá, ʻo pehē, Ko ia ia ʻokú ne tukuange hono uaifí, kae mali mo ha tahá, ʻokú ne tono ai; pea ko ia ia ʻe mali mo ia kuo tukuange mei hono husepānití, ʻokú ne tono ai. Ko e moʻoni ʻoku ou pehē kiate kimoutolu, te u fakatatau ʻa kimoutolu ki ha tangata koloaʻia.