Ngaahi Konga Naʻe Filifili mei he Liliu ʻa Siosefa Sāmita ʻo e Tohi Tapú

Ko ha ngaahi konga ʻeni naʻe filifili ʻo e Liliu ʻe Siosefa Sāmita ʻa e pulusi ʻa Kingi Sēmisi ʻo e Tohi Tapú (LSS). Naʻe fakahinohino ʻe he ʻEikí ʻa e Palōfita ko Siosefa Sāmitá ke ne fakafoki mai ʻa e ngaahi moʻoní ki he fakamatala ʻi he Tohi Tapá ʻa ia ne mole pe liliu talu mei hono tohi ʻo e ngaahi ʻuluaki fakaleá. Naʻe fakamahinoʻi ʻe he ngaahi moʻoni ne fakafoki maí ʻa e tokāteliné mo fakaleleiʻi ʻa e mahino fakafolofolá.

Koeʻuhí ko hono fakahā mai ʻe he ʻEikí kia Siosefa ʻa e ngaahi moʻoni naʻe ʻosi tohi ʻe kinautolu naʻa nau ʻuluaki hiki ʻa e ngaahi hikí, ʻoku ʻikai ke tatau ai e Liliu ʻa Siosefa Sāmitá mo ha toe liliu kehe ʻo e Tohi Tapú ʻi he māmaní. ʻI heʻene peheé, ʻoku ngāue ʻaki heni ʻa e foʻi lea ko e liliú ʻi ha ʻuhinga ʻoku fālahi mo kehe ange ia mei hono ʻuhinga mahení, he ko e liliu ʻa Siosefá naʻe lahi ange ko e fakahā kae ʻikai ko ha liliu mei ha lea ki ha lea ʻe taha.

ʻOku fehokotaki e liliu ʻa Siosefa Sāmita ʻo e Tohi Tapu ʻa Kingi Sēmisí ki he, pe ʻoku hā ʻi ha, ngaahi vahe lahi ʻo e Tokāteline mo e Ngaahi Fuakavá (vakai, vahe 37, 45, 73, 76, 77, 86, 91, mo e 132). ʻOku toʻo mai foki mo e tohi ʻa Mōsesé mo e Siosefa Sāmita—Mātiu mei he Liliu ʻa Siosefa Sāmitá.

Vakai ki he “Liliu ʻa Siosefa Sāmitá (LSS)” ʻi he Fakahinohino ki he Ngaahi Folofolá ke maʻu mei ai ha fakamatala lahi ange ʻo kau ki he Liliu ʻa Siosefa Sāmitá.

ʻOku hanga ʻe he fakatātā ʻoku hā atu ʻi lalo ní ʻo fakaʻaliʻali atu ha sīpinga ʻo e ngaahi meʻa naʻe toʻotoʻo mei he Liliu ʻa Siosefa Sāmitá:

LSS, Mātiu 4:1, 5–6, 8–9. Fakafehoanaki mo e Mātiu 4:1, 5–6, 8–9; naʻe fai ʻa e ngaahi liliu tatau ʻi he Luke 4:2, 5–11

ʻOku tataki ʻa Sīsū ʻe he Laumālié, ka ʻoku ʻikai ko Sētane.

1 Pea naʻe toki tataki atu ʻa Sīsū ʻe he Laumālié ki he feituʻu maomaonganoá, ke ne ʻi he ʻOtuá.

5 Pea naʻe toki ʻohake ʻa Sīsū ki he kolo tapú, pea tuku ia ʻe he Laumālié ʻi he tumutumu ʻo e temipalé.

6 Pea naʻe toki haʻu ʻa e tēvoló kiate ia ʻo pehē ange, Kapau ko e ʻAlo koe ʻo e ʻOtuá, fakatō hifo koe ki lalo, he kuo tohi, Te ne tuku ki heʻene kau ʻāngeló ʻa e fekau ke nau tokangaʻi koe, pea te nau hapahapai koe ʻi honau nimá, telia naʻa touʻia ho vaʻé ʻi ha maka.

8 Pea naʻe toe ʻi he Laumālié ʻa Sīsū, peá ne ʻohake ia ki ha moʻunga māʻolunga ʻaupito, ʻo ne fakaʻaliʻali kiate ia ʻa e ngaahi puleʻanga kotoa ʻo e māmaní pea mo honau nāunaú.

9 Pea naʻe toe haʻu ʻa e tēvoló kiate ia, ʻo pehē ange, Te u ʻoatu ʻa e ngaahi meʻá ni kotoa pē maʻau, ʻo kapau te ke fakatōmapeʻe ki lalo ʻo hū kiate au.

Ko e potufolofola ʻuliʻuli matolu ko ʻení ko e potufolofola ia ʻi he liliu ʻe Siosefa Sāmita ʻa e Tohi Tapu Kingi Sēmisí. Ka koeʻuhi ko e hanga ʻe heʻene liliú ʻo fakafoki mai ʻa e ngaahi foʻi lea ʻe niʻihi ki he Tohi Tapú, kuo pau leva ke kehekehe ʻa e fika ʻo e ngaahi vēsí mei he pulusi ko ia ʻokú ke ngāue ʻakí.

ʻOku fakahaaʻi ʻe he potufolofola fakafekauʻaki ko ʻení ʻa e potufolofola ʻi hoʻo Tohi Tapú ʻoku totonu ke ke fakafehoanaki mo e liliu ʻa Siosefa Sāmitá.

ʻOku hanga ʻe he fakamatala ko ʻení ʻo fakamatalaʻi ʻa e tokāteline naʻe fakamahinoʻi ʻe Siosefa Sāmita ʻi heʻene liliú.

Ko e fakalea ʻeni ʻo e tohí ʻo hangē ko hono liliu ia ʻe Siosefa Sāmitá. (Kuo tānaki atu e ngaahi mataʻitohi fakahihifí ke fakahā e faikehekehe mei he fakalea ʻo e Tatau ʻa Kingi Sēmisí.)