3 Ko e meʻa ʻi hono tomuʻa ʻiloʻi ení, ʻi he ngaahi ʻaho fakaʻosí ʻe haʻu ha kau manuki, ʻo ʻaʻeva ʻi heʻenau ngaahi holi koví.

4 ʻO fakaʻikaiʻi e ʻEiki ko Sīsū Kalaisí, mo pehē, Ko e fē ʻa e talaʻofa ʻo ʻene hāʻele maí? he kuo talu e mohe ʻa e ngaahi tamaí, kuo pau ke hoko atu e meʻa kotoa pē ʻo hangē ko honau tuʻungá, pea kuo hoko mai ʻi honau tuʻungá talu mei he kamataʻanga ʻo e fakatupú.

5 He ʻi he meʻá ni ʻoku nau taʻeʻilo fiemālie pē ki ai, ʻa ē ʻi he kuonga muʻá ʻo e ngaahi langí, mo e tuʻu ʻa e māmaní ʻi he ngaahi vaí, pea mei he vaí, naʻe fakatupu ʻi he folofola ʻa e ʻOtuá.

6 Pea ʻi he folofola ʻa e ʻOtuá, naʻe lōmekina e māmani ko ia naʻe ʻi aí, ʻi he vaí;

7 Ka ko e ngaahi langí, mo e māmani ko ʻení, ʻoku fakatolonga ia ʻaki ʻa e folofola tatau, ʻo fakatatali ki he afi ʻi he ʻaho ʻo e fakamāú mo e malaʻia ʻo e kakai angahalá.

8 Ka fekauʻaki mo e hāʻele mai ʻa e ʻEikí, kāinga ʻofeina, he ʻikai te u tuku ke mou taʻeʻilo ki he meʻa ko ʻení ʻe taha, ko e ʻaho ʻe taha ko ia ki he ʻEikí ʻoku tatau ia mo ha taʻu ʻe tahaafe, pea ko e taʻu ʻe tahaafé ʻoku tatau ia mo ha ʻaho ʻe taha.

9 ʻOku ʻikai fakatuotuai ʻa e ʻEikí ki heʻene talaʻofá mo e hāʻele maí, he ʻoku lau ʻe he niʻihi ko e fakatuotuai; ka ʻokú ne kātaki fuoloa kiate kitautolu, ʻo ʻikai finangalo ke ʻauha ha taha, ka ki he taha kotoa ke haʻu ʻo fakatomala.

10 Ka ʻe hoko mai e ʻaho ʻo e ʻEikí ʻo hangē ko ha kaihaʻa ʻi he poó, ʻa ia ʻe ngalulu ʻa e ngaahi langí, pea ʻe tetetete ʻa e māmaní foki, pea ʻe holo ʻa e ngaahi moʻungá, pea mole atu ʻi ha fuʻu longoaʻa lahi, pea ʻe fakafonu ʻa e ngaahi ʻelemēnití ʻaki ʻa e fuʻu vela lahi; ʻe kāpui foki e māmaní, pea ko e ngaahi ngāue faʻa ʻauʻauha ʻi aí ʻe vela ia ʻo ʻosi.

11 Kapau leva ʻe fakaʻauha kotoa pē ʻa e ngaahi meʻá ni, ko e hā e anga ʻoku taau mo kimoutolú ʻi he ʻulungaanga māʻoniʻoní mo e anga faka-ʻOtuá,

12 ʻI he nofo ʻamanaki atu, mo teuteu ki he ʻaho ʻo e hāʻele mai ʻa e ʻEikí ʻa ia ʻe vela ai e ngaahi meʻa faʻa ʻauʻauha kotoa pē ʻo e langí, pea movetevete, pea vaia, pea holo mo e ngaahi moʻungá ʻi he fuʻu vela lahí?

13 Ka neongo ia, kapau te tau faʻa kātaki, ʻe fakahaofi kitautolu ʻo fakatatau ki heʻene talaʻofá. Pea te tau fekumi ki ha langi foʻou mo ha māmani foʻou ke nofo ai ʻi he māʻoniʻoni.