4 Pea hangē ko ia kuo tohi ʻi he tohi ʻa e palōfita ko ʻĪsaiá; pea ko ʻene ngaahi leá ʻeni, ʻo pehē, Ko e leʻo ʻo e tokotaha ʻoku kalanga ʻi he feituʻu maomaonganoá, Teuteu ʻa e hala ʻo e ʻEikí, pea fakatonutonu hono ngaahi hāʻeleʻangá.

5 He vakai, pea ʻiloange, ʻe hāʻele mai ia, ʻo hangē kuo tohi ʻi he tohi ʻa e kau palōfitá, ke ʻave ʻa e ngaahi angahala ʻa e māmaní, pea ke ʻomi ʻa e fakamoʻuí ki he ngaahi fonua hītení, ke tānaki fakataha ʻa kinautolu kuo heé, ʻa ia ʻoku nau ʻo e lotoʻā ʻo ʻIsilelí;

6 ʻIo, naʻa mo kinautolu kuo fakamoveteveteʻi mo fakamamahiʻí; pea ke teuteuʻi foki ʻa e halá, pea fakaʻatā hono malanga ʻaki ʻo e ongoongoleleí ki he kau Senitailé;

7 Pea ke hoko ko ha maama kiate kinautolu kotoa pē ʻoku nofo ʻi he fakapoʻulí, ʻo aʻu ki he ngaahi potu mamaʻo taha ʻo e māmaní; ke fakahoko ʻa e toetuʻu mei he maté, pea hāʻele hake ki ʻolunga, ke ʻafio ʻi he nima toʻomataʻu ʻo e Tamaí,

8 Kae ʻoua ke aʻu ki he kakato ʻo e kuongá, pea fakamaʻu ʻa e fonó mo e fakamoʻoní, pea toe ʻohake ʻa e ngaahi kī ʻo e puleʻangá ki he Tamaí;

9 Ke fakahoko ʻa e fakamaau totonú ki he kakai kotoa pē, ke hāʻele hifo ʻi he tautea ki he kakai kotoa pē, ke fakalotoʻi ʻa e kakai anga taʻe faka-ʻOtua kotoa pē ki hono taʻe-faka-ʻOtua ʻo ʻenau ngaahi ngāue, ʻa ia kuo nau faí; pea ʻe hoko ʻeni kotoa ʻi he ʻaho te ne hāʻele mai aí;

10 He ko e ʻaho ia ʻo e mālohi; ʻio, ʻe tanu ʻa e ngaahi teleʻa kotoa pē, pea holoki hifo ʻa e moʻunga mo e tafungofunga kotoa pē; pea fakatonutonu ʻa e pikopikó, pea fakatokaleleiʻi ʻa e ngaahi hala tokakoví;

11 Pea ʻe mamata ʻa e kakano kotoa pē ki he fakamoʻui ʻa e ʻOtuá.

19 He ʻokú ke ʻiloʻi eni, Tiofilusi, ko e tōʻonga ʻa e kau Siú, pea fakatatau ki he anga ʻo ʻenau fonó ʻi hono tānaki ʻo e paʻanga ki he tukuʻanga koloá, ko e meʻa ʻoku hulu mei he meʻa naʻe maʻú, ʻoku tuku ia ki he masivá, ko e ʻinasi ʻo e tangata kotoa pē;

20 Pea naʻe fai peheni ʻe he kau tānaki tukuhaú foki, ko e meʻa ia ne pehē ai ʻe Sione kiate kinautolu, ʻOua naʻa mou maʻu ʻo lahi ʻi he meʻa kuo tuʻutuʻuni maʻamoutolú.