16 Ma sa latou fai atu ia te ia, Ua ia i matou le tulafono ma le au perofeta; aʼo lenei tagata matou te lē taliaina o ia e fai ma o tatou pule; aua ua ia faia o ia lava e avea o se faamasino ia te i matou.

17 Ona fetalai atu lea o Iesu ia te i latou, O le tulafono ma le au perofeta e molimau ia te aʼu; ioe, ma perofeta uma o e na tusia, e oo lava ia Ioane, na latou vavalo mai e uiga i nei aso.

18 Talu mai lena taimi, na talaiina atu ai le malo o le Atua, ma o tagata uma lava o e e saili atu i le upumoni e fetaomi atu i ai.

19 Ma e sili ona faigofie i le lagi ma le fogaeleele ona mavae atu, i lo se mataitusi e tasi o le tulafono ona faaleaogaina.

20 Ma aiseā tou te aoao atu ai le tulafono, ma faafitia na mea ua tusia ai; ma taʼusala i lē na auina mai e le Tamā e faataunuu le tulafono, ina ia mafai ona togiolaina ai outou uma?

21 O outou o vale e! aua ua outou fai ifo i o outou loto, E leai se Atua. Ma ua outou faapiopioina ai le ala saʼo; ma ua mafatia i sauaga le malo o le lagi ona o outou; ma ua outou faasaua i e agamalu; ma o a outou sauaga ua outou saili ai e faaumatia le mālō; ma tou te ave faamalosi le fanau a le mālō. Oi talofa ia te outou, outou o tagata mulilulua!

22 Ma sa latou toe faifai ia te ia, ua feita ona o le faapea mai, o i latou o tagata mulilulua.

23 Ae na faaāuāu pea o ia, ua faapea mai, Ai se tasi na te faateʼa lana avā, ma faaipoipo atu i se isi, ua mulilua o ia; ma o se tasi foi e faaipoipo atu i lē ua faateʼaina mai lana tane, ua mulilua o ia. E moni ou te fai atu ia te outou, ou te faatusaina outou i le tagata mauʼoa.