4 E pei ona tusia i le tusi a Isaia le perofeta; ma o upu nei, ua faapea mai, O le leo o lē alaga i le vao, Inā teuteu ia e outou le ala o le Alii, ma faasaosaoina ona ala.

5 Aua faauta, ma vaai, e afio mai o ia, e pei ona tusia i le tusi a perofeta, e aveese agasala a le lalolagi, ma aumaia le faaolataga i atunuu faapaupau, e faapotopotoina faatasi e ua leiloa, o e o le lotoā mamoe a Isaraelu;

6 Ioe, e oo lava i e na faataapeapeina ma faapuapuagatia; ma e saunia foi le ala, ma faia ia mafai ai foi ona talai atu le talalelei i Nuuese;

7 Ma ia avea ai o se malamalama i e uma o loo nonofo i le pogisā, e oo atu i vaega sili ona mamao o le fogaeleele; e faataunuuina ai le toetutu mai le oti, ma afio aʼe ai i le lagi, e afio ai i le itu taumatau o le Tamā,

8 Seia oo i le atoaga o taimi, ma e faamauina ai lea o le tulafono ma le molimau, ma e toe tuuina atu ai ki o le malo i le Tamā;

9 E tuuina atu le faamasinoga i tagata uma; e afio ifo i le faamasinoga i luga o tagata uma, ma faatalitonu tagata faaleatua uma ia latou galuega faaleatua, ia ua latou faia; ma o ia mea uma i le aso e afio mai ai o ia;

10 Aua o lena aso o le aso o le mana; ioe, o vanu uma e faatutumuina, ma o mauga ma maupuepue uma e faamaualaloina; o ala piopio e faasaosaoina, ma ala gaoā e faalauleleia;

11 Ma e vaaia e tagata uma le faaolataga a le Atua.