4 Me vaka sa volai ena nona ivola na parofita ko Aisea; sai koya oqo na vosa, sa tukuna, A domona e dua sa kacikaci ena lekutu, Dou vakarautaka na nona sala na Turaga, ka vakadodonutaka na nona salatu.

5 Ia dou raica ka dikeva toka, ena lako mai ko koya, me vaka sa volai ena nodra ivola na parofita, me kauta laivi na ivalavala ca ni vuravura, ka kauta mai na veivakabulai ki na veimatanitu tawa lotu, me vakasoqoni ira vata ko ira era sa yali, ka ra sa qele ni sipi ni Isireli;

6 Io, ko ira era sa veiseyaki tu ka vakararawataki; ka me vakarautaka talega na sala, ka me rawa kina ni vunautaki na kosipeli vei ira na kai Matanitu Tani;

7 Ka yaco me rarama vei ira kece era sa tiko ena butobuto, ki na veiyasai vuravura e vuqa; me vakayacori kina na tucake tale mai na mate, ka cabe cake ki lomalagi, ka laki tiko ena liga imatau i Tamana,

8 Me yacova na taucoko ni gauna, ka sa dregati na lawa kei na ivakadinadina, ka kau cake tale vei Tamana na idola ni matanitu;

9 Me vakayacori kina na lewa dodonu ki na tamata kecega; me lako sobu mai kina ena lewa ki na tamata kecega, me tukuna vei ira era sa sega ni vakalou me baleta na ivalavala sega ni vakalou era sa vakayacora; ia na veika kece oqo ena siga ena lako mai kina ko koya;

10 Ni na siga ni kaukauwa; io, ena vakasinaiti na buca kecega, ka na vakalolovirataki na veiulunivanua kei na veidelana; ena vakadodonutaki na veika e veve, ka vakalogalogavinakataki na veika sukusukura;

11 Ia na tamata kecega ena raica na veivakabulai ni Kalou.

19 Ni o sa kila vinaka tu, Ceofilo, me vaka na nodra ivalavala na Jiu, vakakina na itovotudei ni nodra lawa ena kena ciqomi na ilavo ki na lololo ni iyau, mai na levu ni ka e ciqomi, sa lesi kina vei ira na dravudravua, ki na tamata yadua na nona ivotavota;

20 Ia ena iwalewale talega oqo era a vakayacora vakakina na daukumuni ivakacavacava, o koya sa kaya kina vei ira ko Joni, kumuna vakadodonu, me kakua ni sivia na veika sa lesi vei kemudou.