JJS, Mateo 21:33. Chi’ilmanq sa’ Mateo 21:32–33
Li winq tento tixjal xk’a’uxl rub’elaj naq taaruuq chixpaab’ankil li Kristo.
33 Xb’aan naq li ani ink’a’ kipaab’ank re li raatin laj Jwan chiwix, ink’a’ naru chinpaab’ankil, ka’ajwi’ wi xb’een wa tixjal xk’a’uxl.
JJS, Mateo 21:47–56. Chi’ilmanq sa’ Mateo 21:45–46
Li Jesus naxch’olob’ naq a’an li xnimal ru pek sa’ li xuk. Li evangelio yeechi’inb’il reheb’ laj Judio ut chirix a’an reheb’ laj Gentil. Eb’ laj maak te’sache’q naq taasutq’iiq li Jesus.
47 Ut naq eb’ li xb’eenil aj tij ut eb’ laj Fariseo ke’rab’i lix jaljookil ru aatin, ke’xtaw ru naq chirixeb’ a’an yoo chi aatinak.
48 Ut ke’xye chirib’ileb’ rib’, Ma tixk’oxla tab’i’ li winq a’in naq xjunes naru chixsachlenkil li xnimal ru awa’b’ejihom a’in? Ut ke’chal xjosq’il rik’in.
49 A’b’an naq ke’xsik’ xk’eeb’al li ruq’ sa’ xb’een, ke’xxuwa ru li ch’utch’uukil tenamit, xb’aan naq xe’xtzol naq li ch’utch’uukil tenamit ke’xk’ul choq’ profeet.
50 Anajwan ut ke’chal lix tzolom rik’in, ut li Jesus kixye reheb’, Ma nasach eech’ool rik’in li aatin sa’ li jaljookil ru aatin kinye reheb’?
51 Chi yaal, ninye eere, laa’in li pek, ut eb’ laj maak a’an nikine’xtz’eqtaana.
52 Laa’in lix jolomil li xuk. Eb’ laj Judio a’in te’t’ane’q sa’ inb’een, ut te’jore’q.
53 Ut li rawa’b’ejihom li Dios taa’isimanq chaq chiruheb’ a’an, ut taak’eemanq re jun li tenamit li na’uuchin rik’in li ruuchinihom a’an; (a’aneb’ laj Gentil.)
54 Jo’kan ut, ani sa’ aj b’een taat’ane’q li pek a’in, taapuk’iiq xb’aan.
55 Naq taak’ulunq ut laj eechal re li awimq, tixsacheb’ li yib’ ruhil winq aj maak a’an, ut tixk’e chi to’ li rawimq re jalaneb’ chik aj ilol ch’och’, sa’ roso’jik ajwi’ li kutan, li te’xq’ajsi re a’an li ruuchinihom sa’ xq’ehil.
56 Toja’ naq ke’xtaw ru eb’ a’an li jaljookil ru aatin li kixye reheb’, naq eb’ laj Gentil te’sache’q ajwi’, naq li Qaawa’ taakub’eeq chaq sa’ choxa re awa’b’ejink sa’ li rawimq, a’an li ruchich’och’ ut li ani wankeb’ chi sa’.