4 Ut naq kixch’utub’ chixjunileb’ li xb’eenil aj tij, ut eb’ laj tz’iib’ re li tenamit sa’ komonil, kipatz’ok chiruheb’, ut kixye, B’ar wan li na’ajej li tz’iib’anb’il resil xb’aaneb’ li profeet, sa’ li taayo’laaq wi’ li Kristo? Xb’aan naq k’a’jo’ naxuwak, a’ut ink’a’ naxpaab’eb’ li profeet.

5 Ut ke’xye re a’an, tz’iib’anb’il xb’aaneb’ li profeet, naq a’an taayo’laaq sa’ Belen re Judea, xb’aan naq chi jo’ka’in xyehomeb’ chaq,

6 Kichal li raatin li Qaawa’ qik’in, ut kixye, Ut laa’at Belen, li wankat sa’ li ch’och’ re Judea, aawik’in taayo’laaq jun li awa’b’ej, li moko jwal ka’ch’inat ta sa’ xyanqeb’ li awa’b’ej re Judea; xb’aan naq aawik’in taachalq chaq li Mesias, li tixkol lin tenamit Israel.

24 Ut kik’ulman naq li Jesus kiniman rik’ineb’ li riitz’in, ut kiniman xmetz’ew, ut kiroyb’eni li Qaawa’ re taawulaq xq’ehil lix k’anjel.

25 Ut kik’anjelak rub’el xwankil lix yuwa’, ut ink’a’ ki’aatinak jo’eb’ li jun ch’ol chik chi winq, chi moko kiru kitzole’, xb’aan naq ink’a’ kiraj ru naq ani junaq chi winq taatzoloq re.

26 Ut chirix k’iila chihab’, kinach’ok xhoonal lix k’anjel.

34 K’a’ut naq ink’a’ nekek’ul lix jultikahom li ani taqlanb’il xb’aan li Dios? Wi ink’a’ nekek’ul a’in sa’ lee ch’ool, ink’a’ nikineek’ul laa’in; ut wi ink’a’ nikineek’ul laa’in, ink’a’ nekek’ul li taqlanb’ilin chixch’olob’ankil xyaalal; ut choq’ re lee maak maak’a’ lee b’aatal.

35 Jalomaq ut eek’a’uxl, ut chex’uuchinq rik’in li k’a’ru k’ulub’ej choq’ re li jalb’a-k’a’uxlej;

36 Ut meek’oxla xyeeb’al sa’ lee ch’ool, Laa’o ralal xk’ajol laj Abraham, ut ka’ajwi’ laa’o wan qawankil chixk’amb’al chaq riyajil li qayuwa’ laj Abraham; xb’aan naq laa’in ninye eere naq li Dios naru rik’ineb’ li pek a’in chixwaklesinkil chaq li alalb’ej k’ajolb’ej re te’ok rik’in laj Abraham.

38 Chi yaal laa’in ninkub’si eeha’ rik’in ha’, chirix naq jalb’il eek’a’uxl; ut naq taak’ulunq li ani ninch’olob’ xyaalal, li q’axal kaw wi’chik xmetz’ew chiwu, li moko k’ulub’ejin ta chixk’amb’al lix xaab’, (malaj ut li moko k’ulub’ejin ta chixk’ulb’al xna’aj,) jo’ kinye, laa’in ninkub’si chi yaal eeha’ naq toj maji’ taak’ulunq, re naq jo’q’e taak’ulunq taaruuq chixkub’sinkil eeha’ rik’in li Santil Musiq’ej ut rik’in xam.

39 Ut a’an li tinch’olob’ xyaalal, li taawanq xwaal sa’ ruq’, ut tz’aqal taarisi xtz’ajnil lix ch’oxleb’aal, ut tixch’utub’ lix trigo sa’ li xokleb’aal; a’b’an sa’ xtz’aqalil lix kutankil a’an tixk’at chaq li xmulel q’olom rik’in xam li ink’a’ naru xchupb’al.

40 Chi jo’kan kichal laj Jwan, yoo chi jultikank aatin ut chi kub’sink ha’ sa’ li nima’ re Jordan; yoo chixch’olob’ankil xyaalal naq li ani taachalq chirix a’an wan xwankil chi kub’sink ha’ rik’in li Santil Musiq’ej ut rik’in xam.

43 Ut li Jesus kichaq’ok, ut kixye re, Kanab’ wan chi kub’siik inha’ aab’aan, xb’aan naq xk’ulub’ choq’ qe, re taatz’aqloq ru chixjunil li tiikilal. Toja’ naq kixkanab’ chi uxk re.

44 Ut laj Jwan kikub’e sa’ li ha’ ut kixkub’si xha’.

45 Ut li Jesus naq kikub’siik xha’, tikto ki’el chaq sa’ li ha’; ut laj Jwan kiril, ut ilomaq, kiteeli li choxa chiru, ut kiril lix Musiq’ li Dios chi kub’eek jo’ jun mukuy ut chi hilank sa’ xb’een li Jesus.

46 Ut ilomaq, kirab’i jun xyaab’ kuxej chalen chaq sa’ choxa, li kixye, A’in li Walal raaro inb’aan, li nasaho’ wi’ chi tz’aqal inch’ool. Cherab’i a’an.