ປຈສ, ມັດທາຍ 21:33. ປຽບທຽບໃສ່ກັບ ມັດທາຍ 21:32–33
ມະນຸດຕ້ອງກັບໃຈກ່ອນທີ່ເຂົາຈະສາມາດເຊື່ອໃນພຣະຄຣິດ.
33 ເພາະຄົນທີ່ບໍ່ໄດ້ເຊື່ອໂຢຮັນກ່ຽວກັບເຮົາ, ຈະເຊື່ອເຮົາບໍ່ໄດ້, ເວັ້ນເສຍແຕ່ເຂົາຈະກັບໃຈເສຍກ່ອນ.
ປຈສ, ມັດທາຍ 21:47–56. ປຽບທຽບໃສ່ກັບ ມັດທາຍ 21:45–46
ພຣະເຢຊູປະກາດວ່າ ພຣະອົງເປັນຫີນເສົາເອກ. ພຣະກິດຕິຄຸນຖືກມອບໃຫ້ຊາວຢິວ ແລະ ຈາກນັ້ນໃຫ້ຄົນຕ່າງຊາດ. ຄົນຊົ່ວຈະຖືກທຳລາຍ ເວລາພຣະເຢຊູສະເດັດກັບມາ.
47 ແລະ ເມື່ອຫົວໜ້າປະໂລຫິດ ແລະ ພວກຟາຣີຊາຍ ໄດ້ຍິນຄຳອຸປະມາຂອງພຣະອົງ, ພວກເຂົາກໍຮູ້ໄດ້ວ່າ ພຣະອົງເວົ້າເຖິງພວກເຂົາ.
48 ແລະ ພວກເຂົາໄດ້ກ່າວໃນທ່າມກາງພວກເຂົາເອງວ່າ ຊາຍຄົນນີ້ຄິດວ່າ ເຂົາຄົນດຽວຈະສາມາດທຳລາຍອານາຈັກອັນຍິ່ງໃຫຍ່ນີ້ໄດ້ບໍ? ແລະ ພວກເຂົາໄດ້ໃຈຮ້າຍໃຫ້ພຣະອົງ.
49 ແຕ່ເມື່ອພວກເຂົາພະຍາຍາມຈັບພຣະອົງ, ພວກເຂົາຢ້ານປະຊາຊົນ, ເພາະພວກເຂົາຮູ້ວ່າ ປະຊາຊົນຖືວ່າພຣະອົງເປັນສາດສະດາຂອງພວກເຂົາ.
50 ແລະ ບັດນີ້ ສານຸສິດຂອງພຣະອົງໄດ້ມາຫາພຣະອົງ, ແລະ ພຣະເຢຊູໄດ້ກ່າວກັບພວກເຂົາວ່າ, ພວກເຈົ້າປະຫລາດໃຈບໍກັບຄຳອຸປະມາທີ່ເຮົາໄດ້ກ່າວກັບພວກເຈົ້າ?
51 ຕາມຈິງແລ້ວ, ເຮົາກ່າວກັບພວກເຈົ້າວ່າ ເຮົາຄື ຫີນ, ແລະ ຄົນຊົ່ວເຫລົ່ານັ້ນປະຕິເສດເຮົາ.
52 ເຮົາຄືຫີນຂອງເສົາເອກ. ຊາວຢິວເຫລົ່ານີ້ຈະໂຈມຕີເຮົາ, ແລະ ຈະແຕກຜ່າຍໄປ.
53 ແລະ ອານາຈັກຂອງພຣະເຈົ້າຈະຖືກເອົາໄປຈາກພວກເຂົາ, ແລະ ຈະຖືກມອບໃຫ້ປະຊາຊາດໜຶ່ງ ທີ່ນຳຜົນຂອງມັນອອກມາ; (ໝາຍເຖິງ ຄົນຕ່າງຊາດ.)
54 ດັ່ງນັ້ນ, ຜູ້ໃດກໍຕາມທີ່ຖືກຫີນກ້ອນນີ້ລົ້ມທັບ, ມັນຈະບົດເຂົາໃຫ້ລະອຽດດັ່ງແປ້ງ.
55 ແລະ ສະນັ້ນ ເມື່ອພຣະຜູ້ເປັນເຈົ້າຂອງສວນອະງຸ່ນສະເດັດມາ, ພຣະອົງຈະທຳລາຍຄົນຊົ່ວທີ່ເສົ້າສະຫລົດໃຈເຫລົ່ານັ້ນ, ແລະ ຈະຍົກສວນອະງຸ່ນຂອງພຣະອົງໃຫ້ຜູ້ເຊົ່າສວນຄົນໃໝ່, ແມ່ນແຕ່ໃນຍຸກສຸດທ້າຍ, ຜູ້ຈະນຳຜົນຕາມລະດູການຂອງມັນມາຖວາຍແດ່ພຣະອົງ.
56 ແລະ ຈາກນັ້ນ ພວກເຂົາຈຶ່ງເຂົ້າໃຈຄຳອຸປະມາທີ່ພຣະອົງໄດ້ກ່າວກັບພວກເຂົາ, ວ່າຄົນຕ່າງຊາດຈະຖືກທຳລາຍຄືກັນ, ເມື່ອພຣະຜູ້ເປັນເຈົ້າຈະສະເດັດມາຈາກສະຫວັນ ເພື່ອປົກຄອງສວນອະງຸ່ນຂອງພຣະອົງ, ຊຶ່ງເປັນແຜ່ນດິນໂລກ ແລະ ຜູ້ອາໄສຢູ່ໃນນັ້ນ.