4 Ia ni sa soqoni ira kece na nodra bete liu, kei na nodra vunivola na tamata, sa tarogi ira, ka kaya, Evei na vanua era sa vola kina na parofita, ni na sucu kina na Karisito? Ni sa rere vakalevu ko koya, ia e sega ni vakabauti ira na parofita.

5 Era sa kaya vua, Era vola na parofita, ni dodonu me sucu e Peceliema mai Jutia, ni ra sa kaya vakaoqo,

6 Sa rogo vei keitou na vosa ni Turaga, ka kaya, Ia ko iko Peceliema, sa tu ena vanua ko Jutia, ena sucu mai vei iko e dua na ravouvou, sa sega ni lailai sara ko koya vei ira kecega na ravouvou ni Jutia; mai vei iko ena tadu mai kina na Mesaia, o koya ena vakabulai ira na noqu tamata na Isireli.

24 Ka sa yaco ni sa tubu cake ko Jisu vata kei ira na tacina, ka yaco me kaukauwa, ka sa waraka na Turaga me yaco mai na gauna ni nona veiqaravi.

25 Ka sa veiqaravi ena rukui tamana, ia sa sega ni vosa me vakataki ira na vo ni tamata, ena sega talega vakakina ni vakavulici; ni sega ni gadreva me vakavulici koya e dua ga na tamata e rawa.

26 Ia ni sa oti e vuqa na yabaki, sa qai toro voleka mai na auwa ni nona veiqaravi.

34 Na cava na vuna dou sega ni ciqoma kina na nona ivakavuvuli o koya sa tala mai na Kalou? Kevaka dou sega ni ciqoma oqo e vu ni yalomudou, dou sa sega ni ciqomi au, dou sa sega ni ciqomi koya au sa talai mai meu mai tukuna; ia na nomudou ivalavala ca dou sa sega ni rawa ni ubia.

35 O koya, mo dou veivutuni kina, ka vakayacora na ivalavala sa vaka na veivutuni;

36 Ka kakua ni vakasama mo dou kaya e lomamudou, Oi keitou na luvei Eparaama, sa tu duadua ga vei keitou na kaukauwa me keiotu vakatubura na kawa i Eparaama na neitou qase; niu sa kaya vei kemudou ni sa rawa vua na Kalou me vakatubura mai na veivatu oqo na kawa i Eparaama.

38 Au a papitaisotaki kemudou vakaidina ena wai, ena nomudou sa veivutuni; ia ena gauna sa lako mai kina o koya au sa mai tukuna tiko, o koya sa kaukauwa cake mai vei au, na nona ivava au sa sega ni kilikili meu kauta, (se na nona itutu sa sega ni rawa niu vakatawana,) me vaka au sa tukuna, au a papitaisotaki kemudou vakaidina ni se bera mai ko koya, me rawa kina ni mai papitaisotaki kemudou ena Yalo Tabu kei na bukawaqa ni sa lako mai.

39 Ka ni sai koya sa dodonu meu tukuna, na nona iri ena tiko e ligana, ka na dau samaka vakavinaka sara na nona buturara, ka sokumuna na nona witi ki na kena vale; ia ena taucoko ni nona gauna ena vakama na qana ena bukawaqa veivakarusai.

40 Sa vakaoqo na lako mai nei Joni, a vunau ka veipapitaisotaki ena uciwai na Joritani; ka tukuna voli na itukutuku, ni o koya e muri koya tiko mai e tu vua na kaukauwa me veipapitaisotaki ena Yalo Tabu kei na bukawaqa.

43 Ia ko Jisu, sa sauma, ka kaya vua, Vakatarai au meu papitaisotaki mai vei iko, ni sa dodonu vei kedaru me daru vakayacora taucoko sara na ivalavala dodonu. Sa qai vakatarai koya.

44 Sa qai lako sobu ki loma ni wai ko Joni ka papitaisotaki koya.

45 Ia ko Jisu ni sa papitaisotaki oti, sa cabe sara mai wai; ka sa raica, ka wadrava ko Joni, ni sa tadolavi vua na lomalagi, ka raica na Yalo ni Kalou ni sa siro sobu mai me vaka na ruve ka mai ro vei Jisu.

46 Ia raica, sa rogoca e dua na domo mai lomalagi, ni sa kaya, Oqo na Luvequ lomani, ko koya Au sa dau taleitaka vakalevu. Dou rogoci koya.