1 Oqo na veivosa sa vakavuvulitaka ko Jisu vei ira na nona tisaipeli me ra tukuna vei ira na tamata.

2 Kakua ni vakataulewa vakatawadodonu, mo kakua kina ni lewai; ia dau vakatauca na lewa dodonu.

4 Ka mo dou tukuna talega vei ira, a cava na vuna dou sa raica kina na malamala mai na mata ni wekamu, ia ka sega mada ni bau nanuma na icoka e tu ena matamu?

5 Se mo na kaya vakacava vua na wekamu, meu leuta mada na malamala mai na matamu; ka sega ni raica rawa e dua na icoka e tu e matamu?

6 Sa qai kaya ko Jisu vei iratou na nona tisaipeli, Dou raici ira na vunivola, kei ira na Farisi, kei na bete, kei ira na Livai? Era veivakavulici ena nodra valenilotu, ia era sega ni muria tiko na lawa, se na ivakaro; era sa lakosese kecega, ka ia na ivalavala ca.

7 Mo lako ka tukuna vei ira, A cava dou sa vakavuvulitaka kina vei ira na tamata na lawa kei na ivakaro, ni dou sa luve ni dau cakava na ca?

8 Tukuna vei ira, Oi kemudou na dauveivakaisini, dou kauta laivi rawa mada na icoka mai na matamudou; dou na qai rawa ni rai vakavinaka mo dou leuta na malamala mai na mata ni wekamudou.

9 Dou lako yani ki vuravura, ka kaya vei ira na tamata kecega, Dou veivutuni, ni sa voleka yani vei kemudou na matanitu vakalomalagi.

10 Ia na veika vuni ni matanitu mo dou maroroya tiko ga vei kemudou; ni sa sega ni ganita me soli na veika tabu vei ira na koli; se mo dou biuta na nomudou mataniciva e matadra na vuaka, de ra buturaka sobu e yavadra.

11 Ni na sega ni ciqoma rawa ko vuravura na veika dou, na sega ni colata rawa koi kemudou; o koya mo dou kakua kina ni solia na nomudou mataniciva vei ira, de ra na vuki tale mai ka basuraki kemudou.

12 Tukuna vei ira, Kerea vua na Kalou; kerekere, ka na soli vei kemudou; vakasaqara, ka dou na kunea; tukituki, ka na dolavi vei kemudou.

13 Ko koya vakayadua sa kerekere, ena soli vua; kei koya sa vakasaqara, ena kunea; kei koya sa tukituki, ena dolavi vua.

14 Eratou qai kaya vua na nona tisaipeli, Era na kaya vei keitou, Keitou sa tamata ivalavala dodonu koi keitou, ka sega ni gadreva me dua na tamata e vakavulici keitou. Na Kalou, keitou kila, ni a rogoci Mosese kei na so na parofita; ia koi keitou ena sega ni rogoci keitou.

15 Era na kaya, sa tu vei keimami na lawa me baleta na neimami vakabulai, ka sa rauti keimami oya.

16 A qai sauma ko Jisu, ka kaya vei iratou na nona tisaipeli, Mo dou kaya vakaoqo vei ira,

17 O cei vei kemudou sa dua na luvena tagane, sa tu e tautuba, ka kaya, Tamaqu, dolava nomu vale meu curu yani ka vakayakavi vata kei iko, ka qai sega ni kaya, Curu mai, na luvequ; ni sa nomu na noqu, ka noqu na nomu?