JJS, Mateo 7:1–2. Chi’ilmanq sa’ Mateo 7:1–2
Mexraqok aatin chi moko tiik ta.
1 Anajwan ut a’in li aatin li kixk’ut li Jesus chiruheb’ lix tzolom naq te’xye reheb’ li tenamit.
2 Mexraqok aatin chi moko tiik ta, re naq ink’a’ taaraqe’q aatin cherix; tiikaq b’an li raqb’a-aatin nekexraqok wi’ aatin.
JJS, Mateo 7:4–8. Chi’ilmanq sa’ Mateo 7:3–5
Li Jesus naxk’ut chiruheb’ lix tzolom naq te’xyal ru rik’ineb’ laj tz’iib’, laj Fariseo, laj tij, ut eb’ laj Levita sa’ xk’ab’a’eb’ lix ka’pak’alil.
4 Ut jo’kan wi’chik, teeye reheb’, K’a’ut naq nakak’e reetal li mul wan sa’ xsa’ ru laa was aawitz’iin, a’ut ink’a’ nakak’oxla li tz’amb’a wan sa’ xsa’ aawu laa’at?
5 Malaj ut chanru tab’i’ taaye re laa was aawiitz’in, Wisihaq wan li mul sa’ xsa’ aawu; ut ink’a’ nakatru chixk’eeb’al reetal jun tz’amb’a sa’ xsa’ aawu laa’at?
6 Ut li Jesus kixye reheb’ lix tzolom, Ma nekek’e reetaleb’ laj tz’iib’, ut eb’ laj Fariseo, ut eb’ laj tij, ut eb’ laj Levita? Neke’k’utuk sa’eb’ lix ch’utleb’aal, a’b’an ink’a’ neke’ab’in chiru li chaq’rab’, chi moko eb’ li taqlahom; ut chixjunileb’ ak xe’el sa’ li b’e, ut wankeb’ rub’el li maak.
7 Ayu laa’at ut ye reheb’, K’a’ut naq nekek’ut li chaq’rab’ ut li taqlahom chiruheb’ li winq, naq laa’ex ajwi’ li ralal xk’ajol li k’a’ru naq’a?
8 Ye reheb’, ex aj ka’pak’al-u, isi chaq xb’een wa li tz’amb’a sa’ xsa’ aawu; toja’ ut naq saqen ru naq tat-iloq re risinkil li mul wan sa’ xsa’ ru laa was aawiitz’in.
JJS, Mateo 7:9–11. Chi’ilmanq sa’ Mateo 7:6
Li Jesus naxk’ut chiruheb’ lix tzolom naq te’xjultika li jalb’a-k’a’uxlej ut naq ink’a’ te’xk’ut li muqmuukil na’leb’ re li awa’b’ejihom chiru li ruchich’och’.
9 Ayuqex sa’ li ruchich’och’, chixyeeb’al re chixjunileb’, Jalomaq eek’a’uxl, xb’aan naq xnach’ok chaq eerik’in li awa’b’ejihom re choxa.
10 Ut eb’ li muqmuukil na’leb’ re li awa’b’ejihom teek’uula sa’ eech’ool, xb’aan naq moko xk’ulub’ ta xk’eeb’al li k’a’ru sant reheb’ li tz’i’; chi moko chekut lee saqi lemtz’ q’ol reheb’ li aaq, maare anchal te’xyeq’i rub’el li roqeb’.
11 Xb’aan naq li ruchich’och’ ink’a’ naru chixk’ulb’al li k’a’ru laa’ex ajwi’ ink’a’ nekexru chixkuyb’al; jo’kan ut meek’e lee lemtz’ q’ol reheb’, maare anchal te’xsutq’isi wi’chik rib’ ut texxt’upiheb’.
JJS, Mateo 7:12–17. Chi’ilmanq sa’ Mateo 7:7–8
Li Jesus naxk’ut chiruheb’ lix tzolom naq li Yuwa’b’ej naxk’e li k’utb’esinb’il na’leb’ re chixjunileb’ li neke’tz’aamank.
12 Ye reheb’, Chextz’aamanq chiru li Dios; chextz’aamanq, ut taak’eemanq eere; chexsik’oq, ut textawoq; chextoch’oq, ut taateemanq cheru.
13 Xb’aan naq yalaq ani natz’aaman, nak’uluk; ut li ani nasik’ok, natawok; ut chiru ani natoch’ok, taateemanq.
14 Toja’ naq ke’xye lix tzolom re, Te’xye qe, Laa’o tiik ajwi’ qach’ool, ut ink’a’ naqaj ru naq junaq winq tooxtzol. Li Dios naqanaw naq kirab’i laj Moises ut junjunq reheb’ li profeet; a’ut laa’o ink’a’ toorab’i.
15 Ut te’xye, Wan qe li chaq’rab’ choq’ qakolb’al, ut tz’aqal a’an choq’ qe.
16 Toja’ naq li Jesus kichaq’ok, ut kixye reheb’ lix tzolom, Chi jo’ka’in teeye reheb’,
17 K’a’ru tab’i’ chi winq sa’ eeyanq, li wan jun ralal, ut taawanq chi xaqxo chirix kab’l, ut tixye, Yuwa’, te laa wochoch re taaruuq tin’ok ut tinwa’aq aawik’in, ink’a’ tixye, Okan, at walal; xb’aan naq aawe li we, ut we laa we?