ປຈສ, ມັດທາຍ 7:1–2. ປຽບທຽບໃສ່ກັບ ມັດທາຍ 7:1–2
ຢ່າຕັດສິນຢ່າງບໍ່ຊອບທຳ.
1 ບັດນີ້ ນີ້ຄືຖ້ອຍຄຳຊຶ່ງພຣະເຢຊູໄດ້ສອນສານຸສິດຂອງພຣະອົງ ເຖິງສິ່ງທີ່ພວກເຂົາຄວນກ່າວກັບຜູ້ຄົນ.
2 ຢ່າຕັດສິນຢ່າງບໍ່ຊອບທຳ, ເພື່ອເຈົ້າຈະບໍ່ຖືກຕັດສິນ; ແຕ່ຈົ່ງຕັດສິນຢ່າງຊອບທຳ.
ປຈສ, ມັດທາຍ 7:4–8. ປຽບທຽບໃສ່ກັບ ມັດທາຍ 7:3–5
ພຣະເຢຊູສອນສານຸສິດຂອງພຣະອົງ ໃຫ້ປະເຊີນໜ້າກັບພວກທຳມະຈານ, ພວກຟາຣີຊາຍ, ພວກປະໂລຫິດ, ແລະ ພວກເລວີ ເພາະຄວາມໜ້າຊື່ໃຈຄົດຂອງພວກເຂົາ.
4 ແລະ ອີກເທື່ອໜຶ່ງ, ພວກເຈົ້າຕ້ອງກ່າວກັບພວກເຂົາວ່າ, ເປັນຫຍັງເຈົ້າຈຶ່ງຫລຽວເຫັນຂີ້ເຫຍື້ອຢູ່ໃນຕາຂອງພີ່ນ້ອງຂອງເຈົ້າ, ແຕ່ໄມ້ທັງທ່ອນຢູ່ໃນຕາຂອງເຈົ້າເອງແລ້ວເຈົ້າບໍ່ເຫັນ?
5 ຫລື ດ້ວຍເຫດໃດເຈົ້າຈຶ່ງເວົ້າຕໍ່ພີ່ນ້ອງຂອງເຈົ້າວ່າ, ຂໍອະນຸຍາດໃຫ້ຂ້ອຍເອົາຂີ້ເຫຍື້ອອອກຈາກຕາຂອງເຈົ້າແດ່; ແຕ່ບໍ່ສາມາດຫລຽວເຫັນ ໄມ້ທັງທ່ອນທີ່ຢູ່ໃນຕາຂອງເຈົ້າເອງ?
6 ແລະ ພຣະເຢຊູໄດ້ກ່າວກັບສານຸສິດຂອງພຣະອົງວ່າ, ຈົ່ງເບິ່ງ ພວກເຈົ້າເປັນພວກທຳມະຈານ, ແລະ ພວກຟາລີຊາຍ, ແລະ ພວກປະໂລຫິດ, ແລະ ພວກເລວີບໍ? ພວກເຂົາສອນຢູ່ໃນທຳມະສາລາຂອງພວກເຂົາ, ແຕ່ບໍ່ຮັກສາກົດ, ຫລື ພຣະບັນຍັດ; ແລະ ທຸກຄົນໄດ້ອອກໄປ, ແລະ ຢູ່ພາຍໃຕ້ບາບ.
7 ພວກເຈົ້າຈົ່ງອອກໄປ ແລະ ກ່າວກັບພວກເຂົາວ່າ, ເປັນຫຍັງພວກທ່ານຈຶ່ງສອນກົດ ແລະ ພຣະບັນຍັດໃຫ້ຜູ້ຄົນ, ແຕ່ຕົວເອງເປັນລູກໆຂອງຄວາມເສື່ອມສູນ?
8 ຈົ່ງກ່າວກັບພວກເຂົາວ່າ, ຄົນໜ້າຊື່ໃຈຄົດເອີຍ, ຈົ່ງເອົາໄມ້ທັງທ່ອນອອກຈາກຕາຂອງເຈົ້າເອງສາກ່ອນ; ແລະ ແລ້ວເຈົ້າກໍຈະສາມາດເຫັນໄດ້ແຈ້ງ ເພື່ອເອົາຂີ້ເຫຍື້ອອອກຈາກຕາພີ່ນ້ອງຂອງເຈົ້າ.
ປຈສ, ມັດທາຍ 7:9–11. ປຽບທຽບໃສ່ກັບ ມັດທາຍ 7:6
ພຣະເຢຊູສອນສານຸສິດຂອງພຣະອົງໃຫ້ສັ່ງສອນເລື່ອງການກັບໃຈ ແລະ ບໍ່ໃຫ້ບອກໂລກກ່ຽວກັບຄວາມລຶກລັບຂອງອານາຈັກ.
9 ພວກເຈົ້າຈົ່ງອອກໄປໃນໂລກ, ກ່າວກັບທຸກຄົນວ່າ ຈົ່ງກັບໃຈ, ເພາະອານາຈັກສະຫວັນມາໃກ້ພວກທ່ານແລ້ວ.
10 ແລະ ຄວາມລຶກລັບຂອງອານາຈັກ ເຈົ້າຈົ່ງເກັບມັນໄວ້ກັບຕົນເອງ; ເພາະບໍ່ສົມຄວນທີ່ຈະເອົາສິ່ງທີ່ບໍລິສຸດໂຍນໃຫ້ໝາ; ທັງຢ່າໂຍນໄຂ່ມຸກໃສ່ຕໍ່ໜ້າໝູ, ຢ້ານວ່າມັນຈະຢຽບຢ່ຳຖິ້ມໄວ້ໃຕ້ຕີນຂອງມັນ.
11 ເພາະໂລກບໍ່ສາມາດຮັບສິ່ງທີ່ພວກເຈົ້າ, ພວກເຈົ້າເອງ, ບໍ່ສາມາດຈະທົນຮັບໄດ້; ດັ່ງນັ້ນ ຢ່າໂຍນໄຂ່ມຸກຂອງພວກເຈົ້າໃຫ້ພວກເຂົາ, ຢ້ານວ່າພວກເຂົາຈະຫັນກັບມາສີກເນື້ອພວກເຈົ້າ.
ປຈສ, ມັດທາຍ 7:12–17. ປຽບທຽບໃສ່ກັບ ມັດທາຍ 7:7–8
ພຣະເຢຊູສອນສານຸສິດຂອງພຣະອົງວ່າ ພຣະບິດາປະທານການເປີດເຜີຍໃຫ້ແກ່ທຸກຄົນທີ່ທູນຂໍ.
12 ໃຫ້ກ່າວກັບພວກເຂົາວ່າ, ຈົ່ງທູນຕໍ່ພຣະເຈົ້າ; ຈົ່ງໝັ່ນຂໍ, ແລ້ວເຈົ້າຈະໄດ້ຮັບ; ຈົ່ງໝັ່ນຊອກຫາ, ແລ້ວເຈົ້າຈະໄດ້ພົບ; ຈົ່ງໝັ່ນເຄາະ, ແລ້ວຈະມີຜູ້ໄຂໃຫ້ເຈົ້າ.
13 ດ້ວຍວ່າ ທຸກຄົນທີ່ຂໍກໍຈະໄດ້ຮັບ, ທຸກຄົນທີ່ຊອກຫາກໍຈະໄດ້ພົບ ແລະ ທຸກຄົນທີ່ເຄາະກໍຈະມີຜູ້ໄຂໃຫ້.
14 ແລະ ແລ້ວສານຸສິດຂອງພຣະອົງໄດ້ກ່າວກັບພຣະອົງວ່າ, ພວກເຂົາຈະກ່າວກັບພວກຂ້ານ້ອຍວ່າ, ພວກເຮົາເປັນຄົນຊອບທຳແລ້ວ, ແລະ ບໍ່ຈຳເປັນຕ້ອງໃຫ້ຜູ້ຄົນມາສອນພວກເຮົາ. ພວກເຮົາຮູ້ວ່າ ພຣະເຈົ້າຮັບຟັງໂມເຊ ແລະ ສາດສະດາບາງທ່ານ; ແຕ່ພຣະອົງຈະບໍ່ຮັບຟັງພວກເຮົາ.
15 ແລະ ພວກເຂົາຈະກ່າວວ່າ, ພວກເຮົາມີກົດສຳລັບຄວາມລອດ, ແລະ ມັນກໍພຽງພໍແລ້ວສຳລັບພວກເຮົາ.
16 ແລ້ວ ພຣະເຢຊູໄດ້ຕອບ, ແລະ ໄດ້ກ່າວຕໍ່ສານຸສິດຂອງພຣະອົງວ່າ, ດັ່ງນັ້ນ ພວກເຈົ້າຕ້ອງກ່າວກັບພວກເຂົາ,
17 ມີພໍ່ຄົນໃດແດ່ໃນບັນດາພວກເຈົ້າ, ທີ່ມີລູກຊາຍ, ແລະ ໃຫ້ລາວຢືນຢູ່ນອກເຮືອນ, ແລະ ເວົ້າວ່າ, ພໍ່ເອີຍ, ຈົ່ງເປີດປະຕູໃຫ້ລູກແດ່ ເພື່ອວ່າລູກຈະໄດ້ເຂົ້າໄປ ແລະ ກິນເຂົ້ານຳພໍ່, ແລ້ວພໍ່ຈະບໍ່ເວົ້າວ່າ, ເຂົ້າມາ, ລູກເອີຍ; ເພາະສິ່ງທີ່ພໍ່ມີກໍເປັນຂອງລູກ, ແລະ ສິ່ງທີ່ລູກມີກໍເປັນຂອງພໍ່?